ما اتكلمنا تاني لحدي ما وصلني نزلت البيت وانا متضايقه صليت الفاتني وظبطت المنبه على الساعه ٢ ورقدت طوالي كنت تعبانه تعب ما قدرت انوم رسلت لي امير " جيت داخله قبل شويه تصدق؟".. ما كان خاشي بقيت اشوف الحالات كان خاتي استوري بعد مكالمتنا بساعه كاتب فيهو" رُدت اليّ روحي بعد ثلث شهر من اللا حياة " رسلت ليهو" اللا حياة دي شنو كمان ما يا حياة يا موت.. ماشه كدا لاقاني استوري لايمن خاتي فيهو صورة يدو شابكها مع يد بت عرفتها نور وكاتب " لا اريد ان اتركها ابداً ، ابداً ❤️" رسلت ليهو "الله يحفظها ليك وجدعت التلفون طرف السرير بقيت بتقلب دموعي جات نازلة مسحتها وغطيت وشي بالمخده...
بعد شويه حسيت بـهزة هبشت بي يدي ما لقيتو قمت مسحت وشي ولميت شعري، شلتو ورديت قال لي ما عارفه اللا حياة دي شنو؟ قلت ليهو لا دي شنو كمان.. قال لي دي حاجه كدا بين الحياه والموت لكن اقرب للموت.. قلت ليهو امممم ودي جبتها من وين بالله ، قال لي من كيسي.. قلت ليهو ما شاء الله شكلو كيسك مليان، قال لي قولي بس دايرة شنو.. قلت ليهو امير, لمن تضايق شديد بتعمل شنو.. قال لي امممم مافي شي محدد لكن غالباً بستغفر كتير.. قلت ليهو طيب.. قال لي المضايقك شنو، قلت ليهو مافي شي .. قال لي نور قالت ليك حاجه؟ قلت ليهو ما قالت شي ااا صحي حتمشي معاي الاسبوع الجاي نختار العفش من الاول.. قال لي قلتي لي اختارتو كلو براها؟🤣 قلت ليهو اي والله.. قال لي انا مش قلت ليك احرجيها حتى لو الحاجه عجبتك؟ قلت ليهو هي ادتني فرصة؟.. قعد يضحك قلت ليهو الليله شلنا سيئات البت كلها انا ما بحب اتكلم في زول والله، قال لي خلاص نبطل سيرتها.. قعدنا نتونس لحدي ما نعست بعدين قفلت لسه كنت ما قادرة انوم فتحت الشبكه عشان اشوف لو رد استنيت الرسائل تنزل ما جاني اشعار منو لمن دخلت لقيتو قرا الرساله وما رد ..دست على الحاله عشان اشوفها تاني ابت تفتح مشيت محل الاستوريهات فتشت لقيتها ماف قلت هسي ماسحها ليه؟..
تاني يوم بعد التست امير جاني سألني اشتغلت كيف قلت ليهو كويس الحمدلله.. مشينا محل ايسكريم قعد يحكي لي عن البحث ماشين فيهو كيف وامتحاناتو حتبدا الشهر الجاي وكدا.. حكيت ليهو عن ناس جدو محمد ووريتو عن رهام اتصدم اكتر مني بقى كل دقيقتين يقول لي ياخ معقول رهام مرت جدك؟ ما مصدق والله.. قلت ليهو تعال لينا يوم هي زاتا قالت نفسها تشوفكم بعد كبرتو، قال لي كيف ياخ بجيها والله..
الاسبوع البعديهو مشينا انا وامير اخترنا الحاجات من الاول كانت في وحده ماشه معانا لمن وريناها الوان البيت اختارت معانا، ما اخدنا وقت طويل لمن راجعين قال لي اسبوعين تلاته كدا و بكون البيت بقى جاهز وترحلي فيهو.. قلت ليهو عاين لحدي هنا خلاص انت ما قصرت الباقي خلي ظافر يشوف زول تاني عشان يتمو انت ركز على قرايتك والبحث بتاعك .. قال لي حاعمل نفسي ما سمعت شي قلت ليهو جاده معاك والله .. شال علبة سجائر وقال لي قفلي يا بت قبل ما الطشك بالبتاعه دي.. قلت ليهو من متين بقيت بتسجر؟ قال لي انا اصلا بسجر، قلت ليهو بالجد؟؟ قال لي دي حاجات ايمن، فتح الدرج وقال لي عايني الولاعه دي .. كانت على شكل مسدس قال لي امس قلب الشقه عليها وما لقاها في النهاية ولع بالكبريت.. قلت ليهو ما وريتو ليه، قال لي عشان ادتها ليهو نور.. قلت ليها اهاا عشان كدا قالب البيت عليها، قال لي ما معاهو غيرها الباقين كلهم في بيت عمتي، قلت ليهو ما يمشي يجيبهم.. قال لي من يوم مشكلتك ديك تاني ما مشينا.. قلت ليهو جادي؟؟؟؟ قال لي اي والله تتذكري يوم جبت ليك حاجاتك؟ دي كانت اخر مره امشي هناك، قلت ليهو ليه يعني.. قال لي ليه دي شنو كمان ؟ قلت ليهو مشكلتهم معاي انا انتو ما عندكم دخل.. قال لي بقت مشكلتنا كلنا ما انتي براك....
