طلعت شقتي وانا رجولي ما شايلاني قلبي كان مقبوض شديد وراسي لف ،فتحت الباب وولعت الانوار ، لمن دخلت لقيت العرفة مقفوله و صورتي معلقه في الباب وفي دم نازل عليها بقيت راجعه ورا ومثبته في الحيطه وجسمي كلو برجف وقفت لمن حسيت في زول وراي غلبني اقبل فجأة لقيت في زول ملتم واقف قدامي بقى جاي علي وانا اتجمدت مكاني اول ما مسكني قعدت اصرخ فكنننني فكني داير مني شنوو انت ، لزاني لحدي ما وصلنا الكنبه وانا بقالع فيهو رماني فيها وانا جريت القناع المغطي بيهو وشو ، من الخلعه سكت من الصراخ لمن شفت الشخصيه القدامي
ايهاب: مصطفى؟؟ معناها ورطوهم معاهو
سعيد: ورطوه في شنو كمان وديل منو
ايهاب: سعيد اسمعني خلي مصطفى هسي وارجع البيت مصطفى انا بحل موضوعو
سعيد: ارجع اسوي شنو يا ايهاب ولدي حابسنو وانا امشي ادس في البيت
ايهاب: مصطفى قدرو يحبسو باقي ناس البيت حيعملوهو ليهم شنو انا ما عارف عشان كدا ارجع وخليك معاهم
سعيد: بتصل لي مؤيد يهديهم وما يخلي زول فيهم يطلع
ايهاب بي نهرة: سعيد ما تجنني في راسي دا قلت ليك ارجع البيت يعني ارجع مصطفى انا بجيبو بي يدي
كنت بشيل في انفاسي وبعاين ليهو قلت ليهو حامد!!! بقى متوتر وبقبل يمين وشمال وهو خاتي يدو في راسو بعد داك طلع حاجه من جيبو زي الجهاز ضغط عليهو وجا علي ، قمت من الكنبه سريع ومديت ليهو يدي قلت ليهو حامد خليك مكانك ، قال لي جمان انا ما عايز آذيك بس اسمعي كلامي وما تتهوري، عايز شنو انت ايهاب أمنك على البيت تعمل فينا كدا؟؟؟ ، قال لي قسماً بالله ما حالمسك ، رفع يدو وقال لي عايني دا جهاز تسجيل اي حوار يدور هنا بكونو سامعنو وهم هدفهم اصلا يخوفو ايهاب بس ما عايزين يعملو شي ، قلت ليهو ديل منو هم، قال لي دي قضية كبيره وايهاب ضد الناس ديل وراكب راس ما عايز يتنازل ،قلت ليهو دقيقه دي قضية الورثه؟ قال لي بتعرفيها انتي ؟ سكت وانا بحاول استوعب انو ايهاب كان بكذب علي، قال لي انا حاشغل الجهاز انتي اتصرفي عادي كأنك خايفه شوفي انا لو نيتي كعبه ما بقول ليك الكلام دا تعالي اقعدي، عاينت ليهو بي شك ، هز لي راسو وشغل الجهاز مشيت قعدت وبقيت ساكته ، تلفوني فجأة ضرب عايزه اقوم قال لي خليك مكانك ، طلع التلفون من الشنطه وقال لي حتقولي ليهو وقف البتعمل فيهو دا وتجي حالاً ، فتح الخط واداني التلفون طوالي اتفقعت بالبكا قلت ليهو ايهاب انت وين ، قال لي جمان مالك الحاصل شنو طلعتي من البيت؟ قلت ليهو لا ما طلعت جيت ،جيت لقيتهم في الشقه ،قال لي كيف يعني هسي انتي وين لسه قاعدين عملو ليك شنو، بقيت ببكي لمن بشهق قلت ليهو هدا واقف قدامي تعال سريع يا ايهاب انا خايفه شديد، قال لي ما تخافي انا في الطريق تمام بجي هسي ما بتأخر وينو الحيوان دا جمبك؟ حامد شال التلفون وقفل الخط كنت لسه ببكي كلام حامد طمني شويه لكن لسه كنت خايفه ،قلت ليهو حامد خليني اطلع الله يرضى عليك، قال لي ماف طلوع قبل ما ايهاب يجي
سوزان: سعيد انت ما نصيح تخليهو وتجي كيف يعني ولدي محبوس بهناك وانت جاي تقول لي اقعدو في البيت انت لو خايف خليك قاعد انا ما قاعده انا زح خليني اطلع
سعيد: قلنا ماف زول حيطلع من البيت ايهاب بتصرف وبجيب مصطفى
سيده: ايهاب مسافر يجي متين ويطلعوا متين
سعيد: يخوانا انتو ما بتفهمو؟ قلت ليكم الناس ديل خطيرين واحد فيكم كان طلع من هنا ما بجي راجع تاني
سوزان: سعيد لا اله الا الله انا دايره ولدي هسي دا
سعيد: انا حاعمل تلفونات خليكم هنا ماف زول يتحرك من الصاله دي، نجوى جيبي لي امي مويه
