*اعترافات*
كنت داخله على امتحانات السمستر الاول وكالعادة في كل مرحلة زي دي بكون خايفه.. بالليل حايمه في البيت داخله طالعه ما خليت قهوة ولا شاي ولا نسكافيه، ظافر قاعد في الصاله بحضر في كورة قال لي انتي مالك يا بت الليله.. جيت قعدت وقلت ليهو ظافر انا عايزه اجمد السنه.. كان راقد في الكرسي قام وصلح قعدتو قال لي شنو شنو؟؟ قلت ليهو انا .. ما جاهزه ياخ، قال لي انتي الاسبوع الفات كلو حابسه نفسك في الغرفه وبتقري تقولي لي ما جاهزه؟ قلت ليهو هو اسبوع الريدنق ليه ؟ قال لي مش في النهاية قريتي؟! قلت ليهو اي لكن .. ما عارفه ياخ.. ختيت يدي في وشي ونزلت راسي قال لي ياسمين حبيبتي انتي عملتي العليك بعد دا اتوكلي على الله بس.. قلت ليهو حاسه اني ما حاقدر اشتغل ، قال لي لا حتقدري واثق فيك انا.. بقى بتكلم معاي لحدي ما حس بي هديت شويه قمت عملت شاي للمرة الرابعه ودخلت الغرفه فتحت الشيت وحسيت نفسي ما قاريه اي شي شديت على شعري وصرخت "اااااععع" بقيت بضرب في راسي" ياسمين ركزي ركزي حتقدري تتذكري حاولي بس" رميت الشيت طار نهاية الغرفه بقيت سرحانه وبعاين ليهو تلفوني ضرب شلتو ورديت " اها" .. قال لي انتي هسي متوترة من امتحان يوم عرسك حتعملي شنو؟ قلت ليهو امير دا ما وقت ظرافتك.. قال لي وقت غزالتي يعني؟🐸.. قلت ليهو والله اقفل قال لي طيب طيب معليش اها خلصتي المادة؟ قلت ليهو حاسه اني بخرت اي شي.. قال لي طبيعي تحسي كدا لكن بكرا لمن تخشي الامتحان وتشوفي الاسئلة بتقدري تحلي، صحي حليتي امتحانات؟ قلت ليهو اي حليت كم واحد.. قال لي ظريف برضو راقبي قروب الدفعه مرات برسلو فيهو حاجات مهمه.. قلت ليهو مراقبة الأكاديمي لكن بتاع الونسه طلعت منو نادر ما يرسلو حاجه مفيدة.. قال لي ما كان تطلعي كان تشوفي الأسئلة البرسلوها بس وتتجاوزي الونسه، المهم يا زوله ربنا يوفقك .. قلت ليهو امين يارب.. قال لي يلا اخليك تواصلي قرايتك وما تنسي تقولي الاذكار الرسلتهم ليك، قلت ليهو طيب شكراً ليك يا امير على وقفتك معاي.. قال لي ما تشكريني يا عويرة يلا يلا على قرايتك،، تتذكري ايام كنتي بتطرديني؟ .. ضحكت وقلت ليهو بتتسدى هسي؟ قال لي ااااي..
بعد قفلت منو حاولت اروق اعصابي وواصلت قراية ظافر جا لقاني لسه بقرا قال لي عايزه حاجه قبل انوم؟ قلت ليهو لا قال لي طيب بالتوفيق...
تاني يوم الصباح قمت بدري راجعت شويه حتى لبست وطلعت، ظافر كان عامل لي ترحيل، وصلت قبل الامتحان بكم دقيقه دخلت القاعه طوالي فتشت مكاني وقعدت بقيت بقرا الاذكار شوية شوية القاعه اتملت حسيت بخوفه كدا بقيت بستغفر... جو وزعو لينا الاوراق وبديت احل طوالي، في البدايه قلبت الورقه وشفت كم سؤال في النص طممو بطني، كان في مراقب واقف جمبي قال لي ما تقلبي الورقه ابدي حلي طوالي عشان ما تتخلعي ، عاينت ليهو وحسيت اني شايفاه في محل لكن ما قدرت اتذكر ... الامتحان كان صعب شديد حاجات كتيرة ما قدرت اتذكرها مع اني متأكدة مريت عليها كم مرة، مسكت دموعي بالعافيه قلت لو بكيت كلهم حيركزوا معاي وحتبقى لي فضيحه احسن اتماسك واستر نفسي.. نص الزمن لمن جا ٣/٤ الفي القاعه طلعو اتخلعت والمراقبين زاتهم اتحيروا الكان واقف جمبي قال ليهم قنعانين للدرجة دي؟ قالو ليهو الامتحان سااااهل.. قال ليهم ما ساهل لكن انتو شكلكم دفعه حفارة.. واحد قال ليهو انت بتقري الماده دي؟ قال ليهو اي لكن في جامعه تانيه، يلا يلا اطلعو عشان ما تشوشوا على اخوانكم.. بكلامهم دا ما قدرت امسك نفسي اكتر دموعي جات نازلة كيف يعني ساهل طيب انا مالي؟؟! مستحيل كلهم يجتمعو على انو ساهل والامتحان يكون صعب معناها انا بس ما قريت كويس.. مسحت دموعي سريع المراقب قال لي انتي كويسه؟ قلت ليهو اي، قال لي عطشانه اجيب ليك مويه؟ قلت ليهو اي لو سمحت.. جاب لي موية شربت ورجعت احل، حليت القدرت عليهو ولمن قالو باقي للزمن ٥ دقائق شلفت الباقي ساي.. لمن طلعت كان في اولاد طلعو معاي سمعتهم بقولو والله ضربت ضربة، وقفت وبقيت احفر في الشنطه عشان اطلع الشيت وارجع لسه كانو واقفين في واحد قال شوفوهم هايجين كيف في القروب ، واحد تاني قال والله محمد مصطفى دا حقو نصاحبو لقى الامتحان وين ياربي؟؟ ... ما قدرت افهم قصدهم شنو بعد طلعت الشيت رجعتو قلت لو لقيت نفسي شغاله كعب حاقعد للامتحان الجاي اتحسر.. مشيت الاستراحه عشان اصلي لقيت بنات من دفعتنا بعد صليت سمعتهم بتكلمو عن نفس موضوع الاولاد القبيل اكتشفت انو الامتحان كان مكشوف واترسل امس في قروب الدفعه يعني انا ومعاي كم نفر بس الما عارفين💔💔
