قالت لي ياس ما تعايني لي كدا براي متوترة.. قلت ليها الساعه كم.. امي قالت لينا لسه ياداب ١٢ونص باقي ساعتين
ياسين قال ليها امي دا شنو هو المنتظرنو من الصباح دا، امي قالت ليهو دا المؤتمر بزيعو فيهو اوائل السودان، قال ليها يارا وياسمين من الاوائل يعني؟ يارا قالت ليهو ياسين عليك الله اسكت ما توترنا ذيادة، كدي اديني التلفون دا يا امي ارسل رقمي تاني، امي قالت ليهو انتي ما قالو ليك الا بعد المؤتمر ينتهي اصبري يمكن يذيعوكم ، يارا قال ليعا يذيعونا شنو عليك الله ، امي قالت ليها قولي ان شاء الله.. قلت ليها امي متاكده كتبتي رقمي كويس؟.. قالت يا بنات عليكم الله ما تجننوني انا زاتي متوترة اكتر منكم هاكم هدا التلفون سوو الدايرنو .. يارا خطفتو سريع ورسلت رقم جلوسها للمرة التالته قلت ليها رقمي دا صح؟ قالت لي اي ياهو
بقينا قاعدين في نار كلنا وكل ما ياسين يتكلم يارا تنهرو لمن الساعه ٢ جات يارا قالت ناس السودان ديل ما فالحين غير في الدعايات بس كدي جيبو لينا قناة الشمالية.. امي قالت ليها هدا بدا بدا اسكتو
بقينا بنسمع في الاسامي لمن وصلو الخمسين كانو زايعين ٢ من مدرستنا امي شغاله تدعي يارب يا كريم يارب لو ما الاتنين وحده فيهم انت القادر على كل شئ ياااارب.... يارا كانت متربعة في الارض وخاته يدينها تحت حنكها وانا واقفه فوقها سليم جا خاشي: اها يا ناس نجيب الحلاوة ولا ندق الصيوان.. يارا كوركت فيهو: قفل ياخ.... لمن وصلو الواحد وتمنين وقالو يارا ايهاب سمير رحيم النسبة ٩٤.٩ اسم الام جمان محمد احمد ابراهيم... امي فكت الذغاريد ويارا نطت من الارض وبقت تكورك وااااي دي انا واااي يا امي زاعوني.. نطت في سليم حضنتو وانا دموعي جات جارية من الفرح... رجعت ركزت في المؤتمر وخليتهم لسه بكوركوا وماسكين يارا، خلصو التمنينات ووصلو التسعينات واسمي لسه ما جا جسمي كلو كان برجف بالخوف ودموعي دي ما وقفت نهائي.. ناس امي شايفاهم طلعو الحوش لمن الجيران جو وتاني ماف واحد فيهم جا خاشي💔 اتمنيت ابوي يكون معاي اللحظه دي او اي واحد فيهم يخفف علي الانا حاسه بيهو... لمن المؤتمر انتهى شلت التلفون سريع لقيت نتيجة يارا جات لكن حقتي لسه رسلت رقمي تاني مرتين وتلاته واربعه طلعت الحوش حريم الحله كانو كتار ولسه بباركو وامي بتوزع في الحلاوة ودموعها نازلة وقفت في باب الصاله وبقيت بنادي فيها ما سامعاني وحده من جاراتنا قالت لي اها يا ياسمين جبتي كم قلت ليها ما عارفه نتيجتي ما رسلوها لي، وحده قالت لي كيف يعني ما رسلوها اجي؟ يمكن نسيتي تكتبي اسمك في امتحان ولا شي.. قلت ليها لالا والله كنت بتأكد من بياناتي قبل ما اسلم اي ورقة... وحده قالت لي ياسمين الحاصل شنو مالك بتبكي.. قلت ليها ما عرفت نتيجي، قالت لي مش رسلتي رقمك.. قلت ليها اي.. قال لي كدي اديني ليهو... مليتو ليها ورسلت الرسالة برضو ما جاتها هنا بديت اشك مع اني متأكدة ١٠٠٪ اني ما نسيت اكتب اسمي ولا رقم جلوسي في اي امتحان... المرا نادت امي جات قالت لي ياسمين اها نسبتك كم؟ قلت ليها ما عارفه يا امي ما رسلو لي النتيجة ارح معاي المدرسة خلاص نشوف الحاصل شنو..... امي سكتت مسافه بعدين قالت الجيران مليانين ولسه ح يجوا ناس اكتر انا رسلت سليم يجيب حلاوة بتصل ليهو يلاقيك في الشارع ويمشي معاك بكون واقف جمب الباب
