"رشا"
"وتجيني تلاقيني لسه بخيري مش هتبقي لغيري ايوه انا غيري مفيش، بهوايا انتي قاعده معايا عينيكِ ليا مرايا يا جمال مراية العين.. سكر محلي محطوط على كريمه كلامك شاغلني وعنيك بموت فيها سيبي شبابك مفتوح ليه، ليه تقفيليه.."
جاني صوت نغمتي والاغنية اتقطعت طلعت السماعه تاوقت لقيت المتصل ايمن، بسرعه كبيت اخر عجنة كب كيك ودخلت الصينيه الفرن... طلعت القلفز الكنت لابساها ورديت هممم، قال لي في البيت؟.. قلت ليهو ياه، حاكون وين زي الوقت دا... كنت شايله الصحن العجنت فيه وقع .. قال لي دي شنو الكركبه دي.. قلت ليهو في المطبخ، بعمل لي كب كيك.. قال لي نص الليل؟ .. قلت ليهو اشتهيتو فجأة
فتحت السماعه ختيت التلفون جمب المغسلة وبقيت بغسل في العده سكت مسافه لمن استغربت قلت يمكن قفل عاينت لقيت الخط فاتح.. عايزه اقول الوو قال لي ما حتوريني؟ قلت ليهو اووف انت لسه ما نسيت؟ بعدين مالك فجأة بقيت مُصر كدا عشان تعرف.. قال لي رشا اقول ليك ظافر كان حيضرب البت عشان شافها قاعده معانا بس، دا شي طبيعي؟ قلت ليهو لا ما طبيعي دا واحد مريض بس وعايز يتعالج.. قال لي وريني البيناتكم دا سببو شنو، قلت ليهو اسألو هو انا ما عندي معاهو اي عداوة شفت بعينك لمن جا سلمت عليهو عادي هو الكان متضايق.. قال لي اقنعيني انك ما عارفه السبب شنو.. قفلت الماسورة نشفت يدي وشلت التلفون قلت ليهو ايمن بالجد كدا انت مالك مصر للدرجة دي؟ مش قلت الامور رجعت طيبه بيناتهم؟ ... قال لي يعني ما حتقولي.. اتنهدت وقلت ليهو ايوه ما حاقول... قفل الخط في وشي استغربت منو اول مرة يصر على حاجه كدا، سرحت وانا بتذكر الحصل قبل قبل ٦ سنين.. يوم نزلت السودان وانا داخله على الجامعه خلاص استقبلوني ظافر وايمن الكان يادوب مخلص الجامعه، كانت اول مره اشوفو فيها من فترة طويلة اتغير شديد، لكن مشاعري تجاهو ما اتغيرت لحدي لحظتها.. ولحدي اللحظه دي..... مشيت معاهم البيت وكلهم استقبلوني كويس وسألوني من امي عديت معاهم اول ايام لحدي ما انتقلت لي شقتي، بعديها بكم يوم جاني ظافر .. لسه بتذكر يومتها زي كأنو امبارح اول ما فتحت الباب اتفاجأت بيهو دخلني جوا قفل الباب وجا خنقني كنت بطلع في الروح ولو ما الجرس ضرب يمكن يومتها كنت مت.. فكاني بسرعه وعاين بفتحة الباب كنت بكح وما قادرة اخد انفاسي اشر لي بي بسبابتو يعني اسكت قلت ليهو وانا لسه بكح ما قادرة ما قادرة.. شالني دخلني الغرفه وطلع قمت بحيل مهدود قفلت الباب علي من جوا جا بعد مسافه حاول يفتح الباب ما قدر قال لي رشا افتحي الباب دا، قلت ليهو انت مجنون ما بفتح ليك.. قال لي واقسم بالله اكسرو.. بقيت ببكي وخايفه في اي لحظه يفتحو ويتهجم علي تاني قلت ليهو انت داير مني شنو عملت ليك شنو انا؟؟! قال لي افتحي الباب خلينا نتكلم... قلت ليهو ما بفتح يعني ما بفتح، قال لي والله ما عايز اعمل ليك حاجه، قلت ليهو لو عايز تقول حاجه قولها من برا واطلع من هنا سريع... قال لي وري امك اني ما ناسيها وطول ما انا وانتي قاعدين في مكان واحد حقدي كلو تجاهها حافرغو فيك.. قلت ليهو انا ذنبي شنو امشي حاسبها هي، قال لي ذنبك انك بتها، ادعي انو سفري يكون قريب لأني حاخليك تتمني الموت كل يوم..... بعد قال كدا سمعت صوت خطوات بعديها باب الشقه اتفتح واتقفل، فتحت باب الغرفة براحه تاوقت لمن اتأكدت مافي زول طلعت وانا قلبي في يدي مشيت على الباب وانا بعاين يمين وشمال لمن وصلت قفلتو للنهايه فتشت تلفوني لحدي ما لقيتو وعملت مكالمه اول ما الخط فتح قلت ليها وانا بكورك ارتحتي كدا؟.. عليت صوتي اكتر وقلت ليها ارتحتيييي... جاني صوتها قالت لي رشا بسم الله مالك في شنو؟ قلت ليها ما صدقت اني خلاص بعدت عنك وحاعيش حياتي زي باقي الناس لكن انتي وراي في اي مكان ما قادرة اخلص منك ومن وساختك دي حتى وانا في بلد انتي ما فيها.. قالت لي رشا اهدي ووريني الحاصل شنو.. قلت ليها يا ريتو قتلني ياريت قتلني وريحني من الحياه الانا عايشاها دي، ظافر جا الليله وقال حيحاسبني على عمايلك كلها.. شايفه الحياه واقفه معاك كيف؟؟ اي غلط انتي بتعمليه انا بدفع تمنو اضعاف واضعاف.. قالت لي ظافر؟؟؟ عمل ليك شنو الكلب دا.. قلت ليها ما عارفه ما تسأليني اطلعي من حياتي دي وريحيني ياخ اطلعي اطلعي.... قفلت الخط وقعدت في الارض وانا منهارة بالبكا اتكلت براسي في الكنبه وسرحت ،اتخلعت ورفعت راسي لمن سمعت جرس الباب قمت ومشيت عليهو بخطوات بطيئة عاينت بالفتحه لمن شفتو فتحت الباب بسرعه اول ما دخل وقعت في حضنو وانا ببكي ضماني عليهو بعد مسافه فكاني وقال لي في شنو يا روش؟ قلت ليهو وانا ببكي وبشهق: ايمن انا.. انا ما كويسه.. ختا يدو في خدي وقال لي هششش خلاص تعالي.. ساقني لحدي ما قعدنا في الكنبه قال لي احكي لي الحصل شنو؟ .. سكت ونزلت راسي.. دنقر علي وقال لي ما تقلقي بي قولي... اتوترت وقلت ليهو بس..حاسه بصداع شديد، عاين لي كأنو ما مصدقني قال لي بتغشي على منو؟ رشا انا حافظك اكتر من نفسي ما تفكري انو الكم سنه دي خلتني انساك وانسى طباعك، انتي كنتي وما زلتي اكتر انسان قريب لي..... اتوترت اكتر وما عرفت اقول شنو، رفع راسو وقام دخل المطبخ بقيت بعاين ليهو وهو بعمل لي عصير الليمون لمن انتبه اني بعاين ليهو ابتسم لي، كأنو فيهو سحر بخليني اضعف قدامو للدرجه دي.. صوتو وعيوني وبسمتو، حتى ضحكتو الـتكاد شبه معدومة، اغرمت بيهو بكل تفاصيلو السمحه وعيوبو، اذا كان في شي ريحني وخلاني مطمنه ف هو كلامو معاي.. قال لي انتي اقرب انسان لي، انا بحلم ياربي؟ اول مرة ايمن يتكلم معاي بالطريقه دي.. هو بكون معاي دائماً كل ما احتاج ليهو بس ما حصل قال لي كلام زي دا، ياربي الفترة الغبنا فيها عن بعض خلتو يحس تجاهي بحاجه؟؟
