ايهاب طلع وانا قعدت احضر واقلب في التلفون كنت بتكلم مع ريا قلت ليها رجعت بيتي قالت لي اخيرا ناس بيتكم حيكونوا ارتاحوا منك ،قلت ليها هي وهي قبيل اتصلو قالو لي تعالي راجعه البيت ما بتقعد بدونك، رسلت لي ايموشنات ضحك وقالت لي اي اضحكي على روحك كويس ،جاني اشعار رسالة من قروب غريب لمن دخلت لقيت في صور مرسله ما فتحت معاي طوالي بقيت بقرا الرسايل.. اححا من الجسم احححا من الشعر... الرقم يخوانا ما ترسلو صور ساي وتشحتفونا .. الرقم دخلتو ليكم يا شباب روقو .. الرسايل كانت كلها بتجي ورا بعض ومقرفه شديد غادرت طوالي افتكرت زول مدخلني بالغلط لمن جيت احذف الرسايل ظهرت لي الصور لقيتها صورتي!!! كنت واقفه في مطبخ ناس الحجه قدام المغسله ولابسه قميص قصير تحت الركبه والصور كلها مصوره من ورا ،التلفون وقع يدي من الخلعه وبقيت برجف ،فجأة سمعت صوت الباب بفتح ايهاب جا داخل بي سرعه مسكني من ذراعي وختا التلفون قدام وشي قال لي دا شنو دا؟؟ بقيت بعاين ليهو وعيوني مليانه دموع ، قال لي بتكلم معاك انا يا جمان دا شنو العفن دا، قلت ليهو ما واضح انو الصوره ماخدنها على غفلة ، كان بعاين لي وعيونو شرار فكاني بقوة وطلع رزع الباب وراهو قعدت في الكنبه وختيت يدي في راسي بقيت بفكر دا منو الممكن يكون صورني بالحاله دي مستحيل يكون زول من برا البيت لكن ليه ومنو؟؟؟ تكون وحده من بنات اهلهم؟ ما اظن يصلو للدرجه دي ،يااارب حاسه راسي حينفجر، فجأة اتذكرت .. يوم في رمضان كنت بغسل العده وقبلت لقيت مصطفى واقف وراي معقول يكون هو؟ وليه يعمل كدا وينشر صوري في قروب زي دا ،شلت تلفوني اتصلت على ايهاب ما برد علي عاينت بالبلكونه لقيتو ما ظاهر في الشارع لبست توبي ونزلت على ناس الحجه لقيتها هي وعمو سمير في الحوش سلمت عليهم عمو سمير قال لي وين انتي يا بتي اختفيتي كدا فجأة ايهاب دا زعلك ولا شنو ،قلت ليهو قعدت كم يوم مع ناس بيتنا وجيت امس، قال لي ايواا كيف هم كويسين؟ قلت ليهو كويسين الحمدلله ، قال لي من جيت مشيت عليهم مره واحده لكن بظهر عليهم تاني ان شاء الله ،قلت ليهو تنور يا عمي طوالي،نجوى وينها ما قاعده ؟ قال لي قاعده جوا كانت بتتكلم مع راجلها.. دخلت في الصاله كانت ماف مشيت غرفتها دقيت الباب قالت اتفضل، لقيتها بتسرح في حلا قالت لي اوو المختفيه خشي خشي ،وين انتي يا بت مشيتي فجأة كدا لا حس لا خبر، قلت ليها ما كان تجي تسألي ،قالت لي يوم كنت جايه لكن شفت عمال كتار قدام الباب رجعت، قلت ليها العمال حياكلوك ما كان تجي ساي ، قعدت تضحك قالت لي اها انا حركات اللوم دي ما بريدها خلاص سكت، قلت ليها تلفونك وين عايزه اتصل لي ايهاب رصيدي انتهى والوقت اتأخر ما بقدر اطلع ،قالت لي هداك في الشاحن شيليهو ، اتصلت على ايهاب منو برضو ما رد علي قلقت وقلبي قبضني ،رجعت بيتي واتصلت ليهو تاني من تلفوني ما رد رجعت تاني افكر في الموضوع مصطفى مصلحتو شنو من العملو دا معقول الموضوع يكون عندو علاقه بالقضيه؟ لكن الموقف دا لمن حصل القضيه ما كانت بدت اصلا الخلاهو يصورني شنو، شلت تلفوني وكنت متردده اتصل ولا لا بعد التفكير مسافه دخلت الواتس وشفت جهات الاتصال المحظوره نقلت رقمو واتصلت....
