لمن وصلنا ودخلت لقيت سعيد جاي من جهة السلم وجاري على الباب، قلت ليهو سعيد في شنو مالك جاري كدا، وقف ووشو ما كان بتفسر قال لي حامد دا اتوفى والشرطه جات قبل شويه لقت في شقتكم مخدرات وشنطة مليانه قروش وهسي بحققو مع ايهاب ،قلت ليهو انا جايه معاك ، عاين لي مسافه مشيت قدامو وقلت ليهو يلا، طلعنا ومشينا على القسم قال لي خليك في العربيه ما تنزلي،قلت ليهو انا ما جايه عشان اقعد في العربيه، نزلت واستنيتو لحدي ما نزل قبل ما ندخل لقينا ايهاب طالع لمن وصلنا سعيد قال ليهو الحصل شنو ؟ ايهاب قال لينا في الطريق بحكي ليكم، كان باين عليهو انو متضايق ركبنا وكان ساكت لحدي ما سعيد سألو تاني، قال ليهو وصلني بيت حامد وانتو ارجعو ، سعيد قال ليهو انا ما برجع بمشي معاك قلت ليهم انا برضو بمشي ، اول ما وصلنا دموعي جات جاريه الناس كانو نصهم في الشارع وبكوركو ويبكو ايهاب وسعيد دخلو مكان الرجال وانا دخلت البيت لقيت في بت صغيره لابسه التوب الابيض وفي بت في عمر السنه ولا سنه ونص راقده في نفس السرير حضنتها وبكيت معاها مسااافه ، الناس دي كانت متأثرة شديد وما سكتو نهائى انا كنت ببكي ولسه ما قادره اصدق يعني حامد الكان معاي امس وبحميني حالياً ميت؟!!!💔 قعدت لحدي ما شالو الجنازه بعدين ايهاب اتصل لي قال لي نحن حنمشي الدفن الراجل الساقك قبيل واقف ليك برا ، صوتو كان مبحوح قلبي وجعني ذياده ..رجعت البيت لقيت نجوى وسيده وسوزان في الحوش قعدت معاهم نجوى قالت لي ايهاب وينو بالجد حامد مات؟ قلت ليها ربنا يرحمو ويغفر ليهو ، نجوى قالت لي لا حول ولا قوة الا بالله هسي امس مش كان هنا مات بشنو ياربي؟ سوزان قامت على حيلها وقالت ليها ما واضح يعني مات بشنو؟ انا ما قادره اقعد مصطفى لسه ما جا وبتصل ليهو تلفونو ما بخش معاي، حجه سيده قالت ليها حتعملي شنو يعني تكوسيهو وين استني لمن الاولاد ديل يجو يمكن يجيبوه معاهم .. قعدت معاهم لحدي ما ايهاب وسعيد جو الساعه كانت ٩ لمن جو داخلين سوزان قامت وقالت ليهم ولدي وينو؟ سعيد قال ليها ولدك منو؟ قالت ليهو مصطفى ،لسه ما جا وما برد علي، ايهاب قال ليهم اقعدو كلكم .. سعيد وسوزان قعدو وهو قعد في الكرسي قال ليهم مصطفى ما حيجي، سوزان قالت ليهو كيف يعني ما حيجي ليه ما يجي؟ قال ليها مصطفى سافر، سعيد قال ليهو دا كلام شنو سافر وين ومتين وليه ما كلم زول فينا، ايهاب بقى بتكلم بي يدو قال ليهو ولدك طلع بتاجر مع الناس ديل وهو الشهد ضدي الليله في المحكمه قدام الناس دي كلها قال ليهم عمي تاجر مخدرات ولو مشيتو بيتو حتلقوها ماليه البيت ، حجه سيده ضربت صدرها وقالت سجمييييي ، سوزان قالت ليهو هي هي هي مصطفى ولدي ما بعمل كلام زي دا ، قال ليها لو انا ما جاي اقنع زول جيت اكلمكم انو ولدكم دا يا شفتوه يا ما شفتوه تاني وادعو ربنا انو ما نشوفو لأنو لو وقع في يدي حتقروا عليهو الفاتحه... ايهاب قام وانا قمت وراهو لمن دخلنا البيت قلت ليهو ايهاب دا شنو العملتو دا؟ ما رد علي دخل الغرفه شال غيار ومشى الحمام استنيتو لحدي ما طلع وجيت وقفت قدامو عيونو كانت محمره ووشو وارم ختيت اصابع رجولي فوق رجولو وحضنتو ضماني عليهو شديد وقفنا قرابة الخمسه دقايق بالوضع دا فكاني وقال لي حامد مات بسببي قتلوهو وانا كنت السبب ، حاوطت وشو بي يدي وقلت ليهو هششش ما تقول حاجه هسي تعال، قعدت في السرير وقلت ليهو تعال ، جا رقد وخت راسو فوق رجولي بقيت بمشي يدي على شعرو وهو مغمض عيونو ،بعد مسافه فتح عيونو وقال لي انا حكيت لي سعيد ومصطفى بأي شي ما عارف غلطت غلطه زي دي كيف وريتهم انو لو ما حامد ما كنت عارف حاتصرف كيف ، مصطفى مشى كلمهم وخلاهم يقتلوهو، كيف كنت غبي للدرجه دي وما قدرت الاحظ للحاجه دي؟ عارفه، حامد قبل دقايق من نهاية الجلسه وبعد قنعت من انو ممكن اطلع منها جا وشهد انو هو الختا الكيس والشنطه في بيتي لأنو كان مهددنو ، قال لي انا ما حاسامح نفسي على الغلطه العملتها دي حتى لو انت سامحتني ، سمموهو وهو هناك قبل ما يتحبس .. قلت ليهو دا يومو ماف زول بموت ناقص عمر دا ما وقت تضعف فيهو منو الحيجيب لي حامد حقو لو عملت في نفسك كدا هسي خلينا ننوم والصباح حترجع وتواصل البديتو.. الليله ديك لا انا ولا هو قدرنا ننوم بعد جا من الصبح لبس وطلع طوالي حتى الشاي ما شربو، حامد كان صاحب ايهاب من الثانوي فرقتهم الجامعه لكن كانو لسه متواصلين ظروفهم ما كانت على قدر كدا ابو ايهاب اتكفل بي مصاريف الجامعه بتاعتو هو واخوانو كلهم لحدي ما اتخرجوا ،انا ما شفت ايهاب بثق في زول زي حامد دا عشان كدا وفاتو اثر فيهو شديد ، الليله ريا كانت حتجي الجامعه لأنو مفروض امس جو من السعوديه بعد نظفت لبست وطلعت وصلني نفس الراجل الكان معاي امس قبل ما ادخل اتصلت لي قلت ليها انا هدي داخله، مشيت ليها مكان قاعده وقعدنا نسلم على بعض ساعه كامله، انا اساساً من شفتها قلبي ارتاح وحسيت اني بقيت كويسه يخوانا بالجد كدا يتعافى المرء باصحابه، كانت بتحكي لي عن عمرتهم وانو سامر جاهم هناك وامها عرفت بعلاقتهم ،انا كنت بسمعها شويه واسرح شويه ، قالت لي جمان انتي مالك ماا طبيعيه ما تكوني حامل بس، قلت ليها انتي كمان حامل شنو ما حامل ولا شي، قالت لي مالك طيب الحاصل عليك شنو، لمن قالت لي كدا ما قدرت امسك دموعي جات نازلها وما قدرت اوقف بكى الا بعد مسافه ، ما سألتني الا بعد خلصت قالت لي انتو وايهاب متناقشين ؟ قلت ليها ياريت لو الموضوع بالسهوله دي، قالت لي يا بت خوفتيني في زول من ناس بيتكم حاصله ليهو حاجه؟ .. حكيت ليها الحصل معاي بالتفصيل وهي كل شويه تقول لي لا حول ولا قوة الا بالله، قالت لي دا كلو حاصل عليك يا جمان وانتي كويسه وقادرة تطلعي وتجي الجامعه عادي؟؟؟ قلت ليها اعمل شنو، قالت لي راجلك دا مُخاطر مخاطرة كبيرة بي كلامك دا العصابه دي خطيره شديد يعني ماف شي بقدر يقيف في وشهم ما قادرة افهم كيف قادر يدخل معاهم في حوار زي دا، قلت ليها بعد دا ماف طريقه يتراجع، قالت لي ما تزعلي مني لكن ايهاب غلطان والحاصل دا كلو كان ممكن ما يحصل لو اتنازل ليهم من البدايه في النهايه هو وراهو ام واخوان وزوجه يعني داخل معركه وهو خسران خسران فيها اي انا ما بنكر انو محامي شاطر لكن المره دي ما بالشطاره بالعقل ، قلت ليها ريا عليك الله انا ما حكيت ليك عشان تذيدي لي فوق الهم همين، قالت لي ما قصدي والله غايتو ربنا يعينكم ويقوي ايهاب.. كسرنا حنك المحاضرتين وبقت تونسني في مواضيع تانيه لحدي ما اتجاوبت معاها ما حسينا بالوقت لمن لقينا الساعه ٢ جات مشينا الاستراحه صلينا الظهر وبعدين مشينا على الكافتريا فطرنا وودعنا بعض جمب البوابه هي مشت في اتجاه وانا في اتجاه طلعت تلفوني وعملت مكالمه قبل ما اصل العربيه سمعت صوت بناديني لقيت استاذ حسام واقف وراي قفلت الخط و قلت ليهو اهلاً يا استاذ ، قال لي فاضيه شويه نتكلم؟ سكت قال لي ما حاخد من وقتك كتير ، رجعنا الجامعه وقعدنا في بنشات جمب البوابه قال لي حادخل ليك في الموضوع طوالي جمان انتي كنتي غاليه على قلبي وللان مكانتك ما اتغيرت يمكن انا كنت غبي وما قدرت افهمك ولا حتى افهم نفسي لكن صدقيني مكانتك في قلبي لسه زي ما هي واكتر كمان ، عايزك توصلي كلامي دا لي زوجك ، كلميهو انو الناس الواقف ضدهم ديل اجرم خلق الله مهما كان شاطر وبكسب في اي قضيه كبيره ولا صغيره دا ما معناها حيقدر يكسب في القضيه الحاليه دي، قصي وعدي وغيرهم ديل مجرد قطع شطرنج ولا كلاب ليدو بحركوها ناس كبار وبعاد شديد واحتمالية انو يقدر يفوز عليهم ولا يثبت ضدهم شي دي ولا ١٪ حتى انا بقول ليك كلامي دا لأني بعرفهم وعاشرتهم كويس ، قلت ليهو دقيقه انا ما فاهمه انت عرفت الكلام دا كلو من وين؟ قال لي قصي وعدي ديل اعمام جويريه او اخوان الراجل الرباها والقضيه اصلا اتفتحت بسببهم المهم كلامي دا حاولي تفهميهو لي راجلك لأنو لي قدام حيندم شديد زي ما انا ندمت لمن فقدت امي ديل ما ناس يلعبو معاهم ابداً يلا بالاذن... حسام قام وانا ما قدرت انطق بي حرف تاني بعد القالو طلعت وانا لسه في صدمتي ديك تلفوني ضرب طلعتو لقيتو ظافر رديت عليهو قال لي لقيت مكالمه منك، قلت ليهو انت وين، قال لي في الكافيه في شنو ؟ قلت ليهو انا عايزه الاقيك، قال لي طيب تعالي هناك، قلت ليهو تعال انت في الكافيه الجمب الجامعه.. قفلت ومشيت اتكلمت مع واحد من الويتر بعدين قعدت استنيتو جا بعد نص ساعه اول ما شفتو رسلت رساله لي ريا ، جا قعد و قال لي معليش على التأخير قلت ليهو ولا يهمك ، قال لي تشربي شنو قلت ليهو لا شكراً ما عايزه حاجه فطرت هسي وشربت عصير، قال لي كيف الكلام دة اطلب ليك قهوه خلاص قلت ليهو ما عايزه تسلم ،ها قلت لي جاي بيتنا قريب ، ابتسم وقال لي ان شاء الله ، قلت ليهو طلعت جادي يعني، قال لي انا اصلا جادي لكن انتي ظالماني، قلت ليهو ونهى وين؟ قال لي نهى زمان ارتبطت ونستني ، قلت ليهو امممم متوقعه حاجه زي دا.. تلفوني لمن ضرب طلعتو من الشنطه وقلت ليهو عن اذنك قال لي اتفضلي رديت وقلت اي يا نجوى ، شنو؟ مصطفى جا ؟؟؟ مش قلتو سافر جا متين؟ ماف زول عارف يعني خلاص تمام انا جايه هسي، قفلت ودخلت التلفون في الشنطه وقمت قلت ليهو بعتذر مضطرة اقوم قال لي خير ان شاء الله قلت ليهو الحمدلله كل الخير ولد حماي سافر فجأة ما ورى زول من ناس بيتهم لكن هسي قالو جا يلا عن اذنك ، طلعت من الكافيه ومشيت على الجامعه ركبت العربيه واتحركنا بقيت ماسكه تلفوني ومستنيه المكالمه بعد شويه ظهر لي رقم غريب رديت على طول، قال لي جمان؟ قلت ليهو ايوه انا ، قال لي اول ما طلعتي طلع وراك مشيت وراهو لقيتو ماشي سريع وبتكلم بالتلفون لحدي ما ركب واتحرك، قلت ليهو طيب شكراً ليك شديد، قال لي العفو ، قفلت وقلت في نفسي طلعت معاهم يعني ..لمن وصلت البيت لقيت ايهاب طالع من الغرفه وبتكلم بالتلفون دخل مكتبو شال ملفات وكان طالع اشرت ليهو بي يدي يعني على وين، وقف جمبي وكمل مكالمتو ،يا صديق قلت ليك ما تديهم ليهو خليهو يمشي لو وكيل النيابه انا جاي اقل من نص ساعه وبكون وصلت، قفل وقال لي طالع مستعجل، قلت ليهو جيت متين، قال لي عندي ١٠دقايق كدا بعدين لو بقيت حاتأخر بتصل ليك تبيتي عند ناس ابوك تمام ؟ قلت ليهو فطرت ولا لسه؟ قال لي فاطر، قلت ليهو ايهاب ، قال لي ما عندي نفس وما تحنسيني لأني ما حاقدر اكل بالغصب يلا لا اله الا الله، قلت ليهو محمد رسول الله... الساعه ١٠ لمن جات اتصلت لي ايهاب قال لي انا ما حارجع بدري مشيت بيتنا وعدا اسبوع وانا هناك اتكلمت معاهو مرتين بس يوم انا في الجامعه نتيجتنا طلعت كانت نجاح ومعدلي كان كويس نوعاً ما وريا نفس الشي ، اتصلت لي ايهاب كتير لكن ما رد علي لمن رجعت مشيت بيتي دخلت سلمت على ناس نجوى قالت لي ايهاب قبل شويه طلع من هنا، قلت ليها سوزان وسعيد كيف من وفاة حامد تاني ما لاقيتهم، قالت لي والله سوزان دي تبكي وتنوح اليوم كلو امس لمن مشينا ليها انا وامي طردتنا عديل قالت لينا لو عايزين تجوني جيبو لي ولدي وسعيد دا غايتو صابر، قلت ليها الحصل ليهم ما هين والله ربنا يصبرهم، طلعت شقتي لقيت الغسيل ما كتير قلت خلاص بغسل بكرا مشيت جهزت عشاء ظابط من العصر واقفه ما خلصت الا قريب العشاء بعدين نظفت وبخرت البيت وولعت ند في السفره لأنو بحبو بعد داك استحميت وسحرت شعري مسكتو بي مشبك وخليت خصلات بقدام وعملت ميكب خفيف قلوس وماسكرا، اتصلت ليهو قلت ليهو انت وين، قال لي في المكتب في حاجه ؟ قلت ليهو انا تعبانه، قال لي بسم الله مالك؟ قلت ليهو تعال يا ايهاب انا في بيتي، قفلت منو جهزت العشاء وختيتو في السفره ختيت شموع وجدعت ورد ناشف على السفره وقفلت الانوار شغلت الضوء البنفسجي الخافت وبقيت مستنياهو اول ما سمعت صوت الباب بفتح جريت وقفت قدامو اول ما دخل حضنتو بعدين شلت منو شنطتو وقلعت منو الجكت قلت ليهو اتفضل، كان بعاين لي باستغراب دخل وعاين للبيت عينو وقعت على السفره قبل علي وقال لي كذبتي علي يعني ،قلت ليهو فاكر نفسك براك بتعرف تكذب؟ يلا جهزت ليك الحمام استحمى وتعال لحدي ما اخت الاكل، دخل الغرفه وانا ختيت الاكل في الصحانه بعد استحمى جا وقعد قصادي وكان مبتسم قلت ليهو اخبارك شنو ، مسك يديني و قال لي ما عارف نفسي كنت كيف لكن هسي كويس ،كويس شديد ، قلت ليهو لأنو عارفاك ما حترضى نطلع نتعشى برا عملتو هنا ، قال لي هنا ولا برا المهم انتي معاي ، قلت ليهو البسمع كلامك دا ما بقول كنت جادعني اسبوع وما بتسأل مني ، حكا جبينو بي طرف سبابتو وقال لي حقك علي قلت ليهو ما مشكله عارفه العليك انا وما لايماك .. اكلنا وعملت الشاي ختيت معاهو كيكة الشوكولاته ،كان قاعد جمب الشاشه جبتو وقعدنا نشرب قلت ليهو طولت ما قعدت انت وسعيد بالعصر جمب الباب بالشاي، قال لي اي ياخ بعد العيد قعدنا مره واحده بس ، قلت ليهو اول مره لمن شفتك قلت لي واحده من اخواتي ريناد ولا مرام ما بتذكر دي شنو حركات العجايز دي ، عاين لي ورفع حاجبو، ضحكت وقلت ليهو ايام كنت ما بطيقك ، قال لي اهاا دا ايام ابوك كان في المستشفى صح، قلت ليهو اي ، قال لي انتي تعالي ليه كنت بتكرهيني كدا؟ قلت ليهو السبب الرئيسي الكف وثانياً عدم قبول كدا من الله، قال لي عدم قبول قلتي؟ قلت ليهو اي ،كان متكل على الكنبه وبعاين لي زح لي خصله من شعري لي ورا وقرب مني قال لي وهسي، قلت ليهو ما واضح انو لسه في عدم قبول؟ كان لسه بقرب مني قال لي لا ، جراني من خصري عليهو وتاني الحصل حصل... تاني يوم ونحن بنشرب في الشاي قلت ليهو الحصل شنو في القضيه؟ قال لي ماشين كويس ، قلت ليهو بالجد ؟ كويس طيب، سكت مسافه وانا بفكر بعدين قلت ليهو بتعرف ظافر انت صح قال لي مش دا الكان بتكلم مع اختك مرام؟ قلت ليهو اي ولد اختو رهام ، قال لي مالو لسه متواصل معاها؟ قلت ليهو اي وقال جاي يتقدم، قال لي والله؟ قلت ليهو لكن دا ما العايزه اقولو ليك ، عاين لي وانا ختيت الكبايه ومتردده اتكلم ولا لا، قلت ليهو ظافر طلع معاهم يعني زي مصطفى ، قال لي عرفتي من وين؟ قلت ليهو ما مهم عرفت كيف انا عايزه الولد دا يبعد من مرام لكن ما حاقدر اقول ليها الكلام دا ما عارفه اصلا لو حتصدقني ولا لا، قال لي احكي لي هسي عرفتي كيف .. حكيت ليهو الحصل قال لي تاني ما تتصرفي تصرف زي دا براك تعالي واحكي لي انا بعرف اعمل شنو، قلت ليهو عفواً بدل ما تشكرني لكن يلا اصلا متوقعه، قال لي لا ما بشكرك لأني ما عايزك تكوني جزء من القضيه دي، قلت ليهو سمح خلاص ما تندمني اني كلمتك ..لبسنا وطلعنا سوا وصلني الجامعه ومشا، كان عندنا محاضرتين بعد المحاضره الاولى ريا قالت لي اها موضوع البحث حنبدا فيهو متين الناس دي كلها بدت قلت ليها هو كان معانا منو، قالت لي تسنيم ورحاب، قلت ليها خلاص كدي اتصلي ليهم خلينا نشوف حنبداهو متين ونعمل شنو ، ريا اتصلت ليهم وجونا في القاعه رحاب قالت لينا بكرا اوف رايكم شنو نجي المكتبه البي ورا الجامعه ونبدا فيهو؟ اتفقنا على بكرا وبعد حضرنا المحاضره التانيه رنين اتصلت لي قالت لي انتو في الجامعه ؟ قلت ليها لي اي قالت لي خلصتو ولا لسه،قلت ليها خلصنا جايه ولا شنو، قالت لي اي انا قريبه للجامعه ما تطلعو، قلت ليها طيب ، قفلت ريا قالت لي دي رنين ؟ قلت ليها اي، بعد قعدنا استاذ حسام جا ماري بينا قالت لي والله بقى بحنني قلت ليها اتكلمت معاهو قبل فتره، قالت لي مع منو استاذ حسام؟؟؟ قلت ليها اي، قالت لي اتكلمتو في شنو، حكيت ليها قالت لي وانتي ما كلمتي ايهاب يعني؟ قلت ليها لا ،قالت لي واي منك يا جمان والله انتي قلبك قوي انا لو مكانك بعد سمعت الكلام دا ما كنت قدرت اقعد ثانيه، قلت ليها انتي قايلاني ما خايفه والله انا من القضيه دي اتفتحت عيوني دي ما شافت ليها نوم زي الناس واليوم كلو بكون قاعده على اعصابي اقل صوت بخلعني، قالت لي ومستحمله كيف؟ الموضوع بقى فيهو قتل وارواح ناس هسي ضامناهم ما يقبلو على أهلك لا قدر الله، قلت ليها رياا؟؟ تفي من خشمك ، قالت لي اسمعيها مني كلمي ايهاب خليهو يتنازل على القضيه دي صدقيني انا بقول كلامي دا خوفاً عليك وعلى اهلك واهلو ، في اللحظه دي رنين اتصلت لي وريتها مكان قاعدين جات سلمت علينا وقالت لينا الخريجين اها اخباركم شنو ريا قالت ليها الله الكلمه دي سمحه شديد ، قلت ليها مضغوطين من اول ايام ، قالت لينا اي اتعودوا السمستر دا كلو حيكون كدا، قالت لينا انا مستعجله ،عاينت لي وقالت اي اكرم اخو راجلك دا زول كويس؟ قلت ليها نجوى لحقت تكلمك ، قالت اي انا اتكلمت معاهو وفاجأني طوالي بموضوع العرس قلت ليهو اديني وقت قال لي انا نازل في الضحيه وعايز اعقد طوالي واعمل المناسبه ، قلت ليها متين متين بالسرعه دي، قالت لي انا ما رديت عليهو قلت ليهو عايزه وقت افكر ، قلت ليها والله انا ما قعدت معاهو غير يومين تلاته ما بقدر اقول ليك كويس ولا لا حتى ايهاي وناس بيتهم ما حكو لي بيو كتير انتي عارفه انو متزوج ؟ قالت لي اي لكن اتطلقو قريب، قلت ليها خلاص انتي كلمي اخوانك وخليهم يسألو عنو، ريا قالت لينا هي هي دا شنو فهموني حاجه، قلت ليها رنين جاها عريس والعريس دا اخو ايهاب، قالت لينا اجشش متين الكلام دا، رنين قالت ليها اختو يوم اتصلت علي وفتحت معاي الموضوع وتاني يوم طوالي اتصل هو ، ريا قالت ليها كلام جمان صح كلمي اخوانك هم بتصرفوا، قالت لينا قلتو كدا؟ قلنا ليها اي... قعدنا شويه بعدين طلعنا في الطريق طلعت تلفوني لقيت مكالمه من ايهاب لمن رجعت ليهو قال لي رجعتي؟ قلت ليهو في الطريق لسه شويه كدا، قال لي انا ما بايت في البيت لمن تصلي امشي بيتكم، قلت ليهو ليه في شنو؟ قال لي ماشي على مدني وبجي بكرا ان شاء الله، قلت ليهو عندك شنو هناك، قال لي شغل يا جمان يلا حاقفل عشان سايق.. لمن وصلت بيتنا لقيتهم بتغدو ريناد قالت لي عايزه اقول ليك نسيبتك بتريدك لكن الكذب حرام..بعد اتغدينا دخلت لقيت مرام راقده قلت ليها انتي قاعده يعني قايلاك في الجامعه، كانت مقبله على الحيطه لمن سمعتني قامت على حيلها ووشها كان محمر وعيونها وارمه قالت لي انتي عايزه مني شنو وريني يعني قدر ما احاول افهمك ما قادره بتدخلي في حياتي في كل صغيره وكبيره، كلمتك اني ما شافعه وبعرف اتخذ قراراتي براي لكن مُصره تتحشري وتخربي علي اي شي ، قلت ليها في شنو يا مرام مالك عملت شنو انا تاني؟ قالت لي بسببك ظافر حيسافر وتاني ما حاشوفو قطع علاقتو بي بسبب فتنك وكذبك فيهو دا الولد عمل ليك شنو بس عايزه افهم ياخ لو بتكرهيهو اكرهيهو ما عندي بيك شغله لكن انا ذنبي شنو تكرهيهو فيني والله انا لو عدوتك ما بتعملي فيني البتسويهو دا ،ياخ ابعدي مني وشوفي حياتك بي وين انشغلي بي راجلك وبيتك وارحميني .. قالت كلامها دا وشالت عبايه من الشماعه وطلعت قعدت في السرير ودموعي جات نازله بعد شويه مسحت دموعي و شلت تلفوني اتصلت على ايهاب قلت ليهو وصلت؟ قال لي قربت، قلت ليهو ظافر برضو مسفرنو ،قال لي تاني مشيتي حققتي بي وراي؟ قلت ليهو ما حققت ياخ مرام كلمتني، قال لي كويس انا بتصرف ، قعدت في السرير وختيت يدي في راسي واتأففت ريناد جات قالت لي مرام دي مالا؟ قلت ليها ما عارفه ما تسأليني، قالت لي جاده معاك انا
مرام وهي بتبكي: ظافر انا ذنبي شنو طيب افتح لي الباب خلينا نتفاهم ,ظافر فتح الباب وقال ليها دايره مني شنو
مرام دخلت وقفلت الباب قالت ليهو عايزاك تفهم انو انا ما عندي ذنب في الموضوع جمان دي انا زاتي زهجت منها ومن حركاتها دي ، خليني اسافر معاك ما عايزه اقعد هنا انا ما بقدر بدونك،قال ليها ما حينفع يا مرام انا طيارتي الساعه ٣ صباحا السفر عايز إجراءات ما بالسهوله دي ،قالت ليهو انا ما بقدر اقعد بدونك💔 ،ظافر حضنها وباسها في خدها مرام عايزه تتفك منو قال ليها خليك قريبه مني ،قالت ليهو ظافر فكني البتعمل فيهو دا ما صح، قال ليها ما حاسافر واخليك بس ما تبعدي مني
بعد المغرب ابوي لمن جا ريناد قالت لي مرام دي اتأخرت هسي كان سألنا نقول ليهو شنو، قلت ليها قولي ليهو مع هديل، بعد ما ابوي اتغدا عملت الشاي ومشيت قعدت معاهو في الحوش قعدنا نتونس انا وهو رهام لمن العشا اذن طلع يصلي ، اول ما طلع ريناد جات شايله تلفونو كان بضرب قلت ليها لحقيهو ليهو ما بكون مشى بعيد.... صليت وقعدت في الحوش قلقت لمن ابوي اتأخر قلت لي رهام مالو ياربي قالت لي يكون دخل للجيران ، دخلت جوا وبعد مسافه سمعت صوت كواريك طلعت برا لقيت ابوي بضرب في مرام ووشها دا مليان دم ،رهام كانت بتجر فيهو وريناد بتبكي مشيت جريت مرام منو وقلت ليهو في شنو يا ابوي قال ليها انتي لا بتي ولا بعرفك تطلعي من البيت دا هسي وما اشوف خلقتك دي تاني في وشي، قلت ليهو ابوي استهدى بالله الحاصل شنو، قال لي انا في اخر عمري يضربو لي ناس الاداي ويقولو لي قبضنا بتك في وضع مُخل؟؟؟
يتبع...
