طلعنا بعد الدكتور وصف لي الادويه وقال لي الفترة دي ترتاحي وما تجهدي نفسك ،ايهاب الطريق كلو بتكلم ومبسوط شديد ظاهر في وشو وفي كلامو انا كنت ما قادرة اتكلم مره ارد عليهو باختصار ومره اهز ليهو راسي بس قال لي لسه تعبانه؟ قلت ليهو اي، قال لي طيب قربنا حاوديك بيتكم عشان ترتاحي كويس بيتنا لسه مليان ،تلفونو ضرب رد وقال اي كويسه جايين على البيت ،قفل وقال لي دي مرام بتسأل منك قلت ليهو هم عارفين؟ قال لي نجوى شكلها كلمتهم، هي زاتا كانت جايه معاي لكن حميتها .. وصلنا بيتنا لقيتهم واقفين لي في نص الحوش اول ما دخلنا استلموني اسئله قلت ليهم شنو يا جماعه غريبه عليكم وقعاتي دي؟ مرام قالت لي مالك من التعب يعني ولا شنو، رهام قالت يا جماعه خلوهم يدخلو كدي، قعدنا في الحوش ايهاب قال ليهم الحاج وين ريناد قالت ليهو في الصلاه، قال لينا خلاص تصبحو على خير ،ايهاب طلع وانا رقدت في سريري بتاع الحوش زاتو رهام قالت لي انتي يا بت ما قلتي لينا مالك هبوط يعني؟ كنت راقده وماسكه راسي قلت لي ريناد بعد دا حتجري من البيت عديل بقو ليك ٣ حوامل، كلهم سكتو رهام قالت لي حامل ؟؟؟ قلت ليها اي ، مرام قالت لي الف مبروك ياخ فرحت ليك شديد والله ، ريناد قالت لي هوي هوي تمشي تحملي وتتوحمي لينا في بيتك سامعه اوعى تقعدي هنا ، قلت ليها البشتغل لي في البيت منو ،قالت راجلك يشتغل ليك، قلت ليها حيخلي شغلو ويحرسني كمان، قالت والله انا جاده معاكم جيبو ليكم خدامه تشتغل في البيت دا انا بقيت عصايه من كترة الشغل، بقينا نضحك فيها قمت قلت ليهم انا ح اصلي وانوم تعبانه شديد ... بعد يومين البيت بقى فاضي رجعت بيتي وكنت نازله الفاينل بعد اسبوع واحد ايهاب قال لي ركزي على قرايتك واي شي تاني ما تشيلي همو ،جاب واحده تنظف كل يوم وبتجي يوم للغسيل والمكوه ،بقيت مع القرايه وشغالين في المشروع وقفنا ايام الامتحانات ورجعنا اشتغلنا بعد خلصنا، المناقشات بدت بعد يومين من نهاية الامتحانات نحن كنا نهاية الاسبوع يوم الخميس يوم المناقشه من الصباح مشيت الجامعه كنا لابسين بِدل لونها بيبي بلو وطرح بيضاء، قريب لوقتنا جو رهام وريناد ونجوى قلت ليهم وين ايهاب ما جابكم؟نجوى قالت لي لالا جينا برانا، لحدي ما دخلنا ما جا زعلت شديد وما كنت مركزه كل شويه ريا تلكزني بعد خلصنا وطلعنا قعدو يزغردوا لقيتو واقف ورا وشايل بوكيه في يدو بعد باركو لينا مشيت عليهو باسني في راسي ومدا لي بوكيه الورد والشوكولاته قال لي الف مبروك وحياه عمليه موفقه يارب ،ابتسمت وهزيت راسي، قال لي عارف نفسي اتأخرت، اشر على البوكيه وقال لي دا الاخرني وصفو لي المكان غلط وقعدت ساعه لافي،لكن لمن وصلت ادبتهم، ضحكت وقلت ليهو معناها تاني استحالة يوصفو لي زول غلط، قال لي ها زنقوكم؟ قلت ليهو لالا الدكاتره الفي اللجنه كلهم كويسين ماف واحد صعب، قال لي طيب الحمدلله ما حتديني حلاوة المناقشه؟ قلت ليهو تعال ،مشينا لي ناس رهام بارك لي ريا وصحباتنا قعدنا شويه في الجامعه بعدين طلعنا جمب البوابه كان استاذ حسام واقف مع اولاد من دفعتنا لمن وصلنا العربيه سمعتو بناديني عاينت لقيت ايهاب قبل عليهو جا وسلم علينا قال لي حمدلله على السلامه قلت ليهو الله يسلمك ،عاين لي ايهاب وقال ليهو الف مبروك كمان سمعت انك كسبت القضيه قال ليهو الله يبارك فيك، عاينت لي ايهاب وكشرت حواجبي باستغراب افتكرتو ما عارف بعدين اتذكرت لمن قال لي انا عارف اي صغيره وكبيره في القضيه معناها اكيد بشكل ما عرف انو عندهم علاقه مع حسام ، قطع سرحتي ايهاب قال لي يلا واقفه مالك، عاينت لقيت استاذ حسام رجع لمن ركبنا قلت لي ايهاب كنت عارف حسام متزوج بتها؟ قال لي اي حتى هو الوصفني ليهم ويوم جا معاهم المكتب، قلت ليهو شي غريب، قال لي شنو؟ قلت ليهو يوم اتكلم معاي في موضوع القضيه وقال لي حذري راجلك منهم يعني لو اصلا خايف عليك ليه جابهم ليك، قال لي اتكلم معاي انا برضو ما كان مفتكر اننا حنقدر نصل لنقطة المخدرات دي.. نزلنا في مطعم فطرنا بعدين رجعنا البيت لمن قربنا نصل قلت لي ايهاب عايزه انزل مع ناس بيتنا مرام قالت لي لمن تخلصي تعالي لي.. لمن وصلنا نزلنا نجوى اول حنست ناس بيتنا عشان ينزلو لكن ابو، ايهاب وصلنا جمب باب البيت قلت ليهو حتمشي البيت؟ قال لي عندي جلسه العصر حامشي اغير وماشي المكتب اجهز ليها، دخلنا لقينا مرام نايمه وهديل كانت قاعده معاها وبتحضر باركت لي وطلعت نحن زاتنا بعد صلينا نمنا، صحيت العصر بصوت مرام وريناد، ريناد قالت لي مرام يا زوله ما ماشه انا زاتي تعبانه ،قمت وقلت ليهم في شنو مالكم، ريناد قالت ليها لو دايره تمشي امشي براك انا براي مصدعه من جيت نمت عشره دقايق وقمت على الشغله مكنه انا ياخ خلوني ارقد عليكم الله ما ممكن الواحد نفس ما قادر يتنفسو في البيت دا ،قلت لي مرام دايره شنو انتي، قالت لي حبوبي خلصت دايراها تمشي لي الصيدليه قلت ليها انا بمشي ليك، قالت لي لالا ما بتمشي خليها براها بتقوم بعد شويه ،قلت ليها انا اصلا راجعه البيت برسلهم ليك مع مؤيد، قالت لي تمشي وين ما حكيتي لي حصل شنو في المناقشه وما باركت ليك كمان، قلت ليها الله يبارك فيك ما حصل شي كانت كويسه يعني، قالت لي كويس طيب ما تمشي قبل الغدا قايمه اعملو قلت ليها فطرنا متأخر ما جعانه، لحدي ما البس العبايه جابت لي القروش قلت ليها خليها معاك قالت لي لالا شيليها قلت ليها مراام، بعد داك سكتت وشالتهم.. مشيت الصيدليه شلت لي مرام حبوبها وطلعت اول ما دخلت شارع بيتنا حسيت بي زول ماشي وراي في البدايه قلت يمكن بتوهم ،لمن حسيتو بقى قريب وقفت قبل ما اقبل ورا سمعت زول بقول بصوت واطي:ما تلتفتي واصلي وامشي عادي اي تصرف منك غلط حتلقي نفسك واقعه وغرقانه في الدم وماف زول في الشارع يجيب خبرك.. حركتي اتشلت وبقيت ما عارفه اواصل ولا اقيف ولا اكورك ولا اعمل شنو فعلاً الشارع كان فاضي خفت شديد وما عارفه قدرت امشي كيف ما عرفتو داير مني شنو بعد مشينا مسافه قال لي فاكرين الموضوع انتهى؟ انتو دخلتو نفسكم في نار ما حتقدروا تطلعو منها تاني ،كل قرايبك واحبابك واحد ورا التاني حتشوفيهم بموتوا قدام عيونك ،واحد ورا التاني فهمتي؟ حتسأليني ذنبك شنو؟ ذنبك انك مرتو ما عندك اي ذنب تاني ما حاقتلك لأنو حيتعذب شهر شهرين ويواصل حياتو عادي لكن حاخليك تتعذبي انتي عشان لمن يشوفك كدا هو برضو يتعذب ولمن يشوف احبابكم بموتوا قدامك برضو حيتعذب ما حاسمح يغمض ليكم جفن طول ما انا حي ،انا بالزات طالما عملتو نفسكم شجعان واسود وقدرها خليكم بالجد قدرها اتفقنا؟ ... كنت بمشي خطوه وبتعتر في خطوتين ورجولي بترجف ،بعد قال كلامو دا حسيت بيهو رجع قبلت وراي وانا لسه ماشه لقيت مافي زول طوالي وقعت في الارض بقيت قاعده وبتلفت في الشارع دموعي جات جاريه ما وعيت تاني الا على صوت اسماعيل بتاع الدكان بهز فيني لقيت نفسي لسه في الارض وهو بحاول يقومني قال لي بسم الله يا بتي مالك قومي على حيلك قومي معاي ،مسكني من يدي وقومني قال لي الحاصل عليك شنو بسم الله الرحمن الرحيم ، قلت ليهو ماف ماف شي وقعت بس، قال لي انا من جيت داخل الشارع شايفك قاعده كدا في الواطه مالك يا بتي انتي كويسه؟ قلت ليهو كويسه كويسه ،قال لي خلاص ارح اوصلك، مشى معاي لحدي بيتي قلت ليهو معليش حاعذبك معاي بس ودي الكيس دا بيتنا ،قال لي ولا يهمك جيبيهو، سعيد بعد سلم على اسماعيل قال لي جمان كيفك الف مبروك المناقشة كمان، قلت ليهو الله يبارك فيك .. اديت اسماعيل الكيس ودخلت كنت لسه بتلفت لمن وصلت السلم اترددت جا في بالي السيناريو الحصل المره الفاتت لمن دخلت ولقيت صورتي معلقه في الباب رجعت دخلت على ناس الحجه لقيتهم بشربو شاي الغدا نجوى قالت لي ناس رنين بكرا جايينا ما تكوني طالعه مكان، قلت ليها لالا،قالت لي طيب تعالي لي بدري عليك الله جهزي معاي،قلت ليها ان شاء الله ،نجوى قالت لي حجه سيده يا امي الليله كانت مناقشة جمان، بي طرف لسانها قالت لي مبروك ،قلت ليها تسلمي يا حجه الله يبارك فيك ،عاينت لي نجوى وقلت ليها تعالي معاي دقيقه قالت لي وين، قلت ليها عامله كيكة شوكولاته وما بقدر اطلع وانزل تاني،قالت لي طيب ارح .. مشينا قبل ما ادخل المطبخ دخلت الغرف والحمام عشان اتأكد مافي زول في البيت لكن ما حسست نجوى بي حاجه بعد داك عملت عصير وختيت الكيكه في الصحن وجيت قعدت معاها قلت ليها ناس اكرم مسافرين متين، قالت لي شكلهم كدا ماشين يوم الاتنين، قلت ابوك راجع معاهم ؟قالت لي لالا ،ناس خالي وخالتي برضو جايين بكرا، قلت ليها كويس حلا وينها ما شفتها، قالت لي اجي ما كانت قاعده مع سعيد في الشارع؟ قلت ليها ما انتبهت ،قالت لي طلعت معاهو بعد الغدا.. قمت فجأة فتحت الباب وجريت نزلت نجوى كانت وراي بتقول لي جمان مالك استني، لمن وصلت الباب وطلعت لقيت سعيد بلعب في حلا وهي بتضحك ختيت يدي في صدري وبقيت باخد نفس سعيد قام ونجوى قالت لي في شنو يا جمان خلعتيني؟ قلت ليها ماف شي ،سعيد قال لينا الحاصل شنو ، نجوى قالت ليهو بري كنا بنتونس لمن سألتني من حلا وقلت ليها معاك قامت جاريه، سعيد قال لي جمان مالك؟ هسي مش حلا كانت بتناديك لمن دخلتي ما انتبهتي ليها يعني، قلت ليهم ماف شي يا جماعه نجوى تعالي اسنديني عشان ارجع ، وصلتني لحدي الشقه وقالت لي ما صح تجري كدا في السلم يا جمان خطر على البيبي، بالجد مالك انتي اتخلعتي كدا؟ قلت ليها ختيت في بالي مشت على الزلط عشان كدا، قالت لي معقول سعيد يخليها تمشي لحدي هناك وهو ما منتبه،قلت ليها ما عارفه فجأة جا في بالي كدا، قالت لي طيب انا حامشي لأنو امي براها ابوي الليله طلع مشا لي ولد عمتو.. بعد نجوى طلعت قفلت الباب كويس ومشيت جبت سكينه وقعدت في نص الكنبه لمن المغرب اذن قمت وانا بتلفت وكل مره بوجه السكينه على الاتجاه الاتلفت عليهو اتوضيت وصليت كان همي كلو اخلص متين ما فهمت اي شي لي صلاتي قلت بعد ما ايهاب يجي بصلي تاني رجعت في نفس وضعيتي لحدي الساعه ٩ كدا ايهاب جا لمن شافني جا علي وهو مستغرب قعد جمبي وعاين للسكين قال لي ناويه تضبحيني ولا شنو، ختيتها في التربيزه وقلت ليهو الليله في واحد هددني، قال لي منو وقال ليك شنو، حكيت ليهو الحصل قال لي ما شفتي شكلو يعني؟ هزيت راسي يعني لا قال طيب ما كان في زول في الشارع؟ قلت ليهو لو في زول كان قدر يعمل الحركه دي؟ مسك يديني وقال لي عشان كدا قاعده بالحاله دي ؟ قلت ليهو شايف الحصل عادي يعني؟ قال لي ما بقدروا يعملو حاجه لأنهم مراقبين اي غلطه منهم حتوديهم في داهيه خاصة لو اتعرضو لي ولا لأي زول بقرب لي، قلت ليهو وهسي ما اتعرضو لي؟ قال لي نحن متوقعين حركات زي دي منهم اصلا هم فالحين في التهديدات بس لكن ما بقدروا يعملو حاجه، قلت ليهو يعني حنمشي ليهم تصرفهم دا ساي كدا، قال لي ماف حاجه بتثبت انك اتهددتي، كشرت حواجبي باستغراب، قال لي قصدي للمحكمه اكيد طبعاً ما ختيتي في بالك اني ما مصدق ، قلت ليهو لوهلة حسيت كدا، انا خايفه من الناس ديل يعني زي ما هسي هددوني وما حنقدر نعمل حاجه يمكن برضو ينفذو القالوهو بدون ما يخلو وراهم اثر ولا دليل، قال لي لا قدر الله اذا عملو القالوهو اول المتهمين حيكونوا هم وحتتفتح القضيه من الاول ويمكن المره دي ما يقدروا يطلعو منها زي ما حصل هسي لأنو اصلا مشكوك فيهم ومستنين ثغره منهم ف حيكون من الغباء جدا انهم يفتحوا على نفسهم باب زي دا، قلت ليهو ممكن يلبسوها لي ناس تانيين بنفس الطريقه دي، قال لي وليه يتعبو نفسهم تاني ويخسروا ويتجهجهوا في حين انهم هسي ممكن يواصلو شغلهم بي تحت تحت عادي؟ قلت ليهو مش قلت لي مراقبين؟ قال لي جمان الموضوع دا كبير شديد يعني هسي الناس ديل يدهم دي نظيفه وما بتخش في الشغل دا ابداً تحتهم في ناس وتحتيهم ناس وتحت تاني في ناس وهلم جرا والاتقبضوا ديل يمكن يكونوا اصلا هم ما بعرفوهم لكن الموظفين تحتهم هم الموظفنهم فاهماني انتي ؟ قلت ليهو كدا خوفتني ذياده معناها عادي يعملو اي حاجه ويلبسوها لي غيرهم، مسح وشو بي زهج وقال لي جمان ما تخافي طالما انا معاك دا وعد مني ما حاخلي اي زول يلمس شعره منك ، قلت ليهو هم اصلا قالو ما حيلمسوني ، قال لي طيب ما حاخلي زول يلمس اي واحد بقرب لينا ، هز راسو وقال لي تمام؟ اتنهدت وهزيت راسي قام قلع الجكت بتاعو ومشا على الغرفه قال لي قومي اعملي لينا الغدا لحدي ما استحمى... ايهاب كان بحاول يطمني لكن كلامو خوفني ذيادة.. تاني يوم من الصباح مشيت لي نجوى كانو ضابحين بقينا بنجهز لحدي قريب الفطور كدا ناس خالهم وخالتهم جو سلمنا عليهم نجوى قالت ليهم ما ح نكب ليكم العصير اصلا الفطور قرب يطلع ،الرجال مشو الصالون وانا ونجوى وحسناء وحور دخلنا نجهز الفطور قلت لي حور اشتغلتي كيف في الامتحانات قالت لي اسكتي بس خرمجه تقيله ،ضحكت وقلت ليها ربنا يوفقكم قالت لي على فكرة انا زعلانه منك، قلت ليها ليه بس؟ قالت لي ما حصل جيتي بيتنا الا وانتو عرسان وقلتي لي(بقت تحاكيني بي عواره) بجي بقيل معاكم، قلت ليها والله عايزه اجيكم لكن ما لقيت طريقه، قالت لي مالك عندك حسن ولا حسين، نجوى قالت ليها عندها ايهاب بي حالو، حسناء قالت لي مالك يختي ما فاضيه صحي لا شفع ولا شغل، نجوى قالت ليها ياداب اتخرجت هي،حسناء قالت لي كويس والله حياه عمليه موفقه، حور قالت لي كنتي قاريه محاسبه مش؟ قلت ليها اي، قالت لي كويس بتلقي شغل ،نجوى قالت ليها شغل شنو كمان المرا بعد تعرس تقعد في البيت وتمسك راجلها كفااايه كملت تعليمها بعد دا تركز لينا على النونو الجاي في الطريق دا، طبعاً فاجأني كلامها ما اتوقعت طريقة تفكيرها تكون كدا ، حور قالت ليها مالو يختي تشتغل وتمسك بيتها ما هدا الحريم شغالات وماسكين بيوتهم زي العجب احسن من القاعدين بلا شغل ، حسناء قالت ليها بري هي والله مبشتنات ومبشتنين عيالهم معاهم ما شفتي فاديه جارتنا دي والله اتقول ما معرسه الحنه دي من سنه لي سنه واظن ما حصل اتدخنت اصلا وعيالها طبيعي حايمين في الشارع وسخانين ولدها الكبير دا في سادس ياداب قدر مؤيد بسجر الا البنقو وبسف الصعود، نجوى قالت ليها لا حول ولا قوة الا بالله حمانا الله من الزي دا، حور قالت ليها فاديه دي من يومها مبشتنه بعدين هي شغلها زاتو ما بشهادتها اصلا قبل كدا حكت لينا انها خلت القرايه من تانيه ثانوي يعني امتحان الشهاده ما امتحنتو ما تسلبطيها في الشغل ، نجوى قالت ليها هم زاتهم يشتغلوا لشنو مادام الراجل ما حارمهم من حاجه متعبات نفسهم ليه الما متزوجات زاتهم انا بستغرب فيهم المرا دي مكانها البيت والمطبخ بس،حور قالت ليها منو القال ليك كل الراجل ما حارمين نسوانهم؟ والله في بيوت بصرفن فيها الحريم اكتر من الرجال وفي رجال ما بصرفو عديل ياخ انا عندي صحبتي في المدرسه امها بتبيع الايسكريم والتسالي والفول جمب باب المدرسة يوم في كلام كدا بنتونس انا وهي قالت ابوها متزوج مرتين غير امها حلفت لي قالت ابوها دا قرش ما بدخلو في البيت امها دي قرتها هي واخوانها الاصغر منها بقروش الايسكريم والتسالي ديل وهي زاتها في الاجازات بتشتغل في مصنع بسكويت، بعدين حتى لو ما حارمها من شي الشغل دا ما عشان الرجال بس السيده خديجة كانت شغاله في التجاره، اي مرا من حقها تشتغل وتدلع نفسها وتجيب العايزاهو بقروشها،والوظائف دي في منها براعو للمتزوجات وبعملو ليهم دوام قصير، انا كمان عكسك بستغرب في البنات القارين تخصصات سمحه وقاعدين ساي في البيت سبب واحد يخليها ما تشتغل ماف دا طبعاً لو ابوها واخوانها ما عندهم مانع عشان ما تقولو لي فيمنست، نجوى قالت ليها اجي يا دا كيف ماف سبب يخليها تقعد في البيت يعني الراجل والمرا يشتغلو برا اها الينضف البيت واليطبخ واليربي الشفع منو، حور قالت ليها ياما حريم وحريم ماسكين بيوتهم وشغالين ومربين اولادهم احسن تربيه اقربهم صحبتي القلتها ليكم هسي دي والله دي عينها ما بترفعها علينا نحن البنات صحباتها خلي الرجال كترة ما مربيه لمن الاساتذه كلهم بحترموها ويقدروها واخوانها الصغار نفس الشي ،المرا الدايره تشتغل وتحافظ على بيتها بتقدر والدايره تكرس حياتها كلها للشغل كمان بتقدر، حسناء قالت ليها عان دي كمان بقى عندها لسان وبتتكلم مع الناس ، حور قالت ليها مالي ما بتكلم شايفاني خرساء قدامك، قالت ليها هي احترمي نفسك ما تتلامضي معاي،نجوى قالت ليها هسي يعني يا حور لو جاك عريس قال ليك حدك الجامعه دي بس ما بتعرسيهو؟ حور قالت ليها ما تشوفيني بهاتي بالعرس كدا انا يا بت بدور اقرا واشتغل وابقى استرونق اندبندت وومن حتى بعدين نشوف موضوع العرس والمسؤولية دا بي وين، حسناء قالت ليها لمن تقعدي لينا بايره كدا تحرسي امي وابوي.. لمياء جات داخله قالت لينا انتو دا فطور ولا شنو هو قاعدين ليهو دا كلو، حور قالت ليها لو جعانه تعالي دخلي يدك معانا ما تجي تنقي فوق راسنا، لمياء قالت ليها حور هي انا ما بسكت ليك زي اخواتك ما دايره معاك طولة لسان، حسناء قالت ليها خليها فايره فينا من قبيل الاسترونق اندبندت دي... تاني رجعو لشكلتهم ديك انا كنت بسمع كلامهم دا وبضحك بس وصراحة اتفاجأت بكلام حور صحي الكبر كبر العقل ما العمر،جهزنا الفطور للرجال بعدين ختينا صينيتين لينا الحجه وسهاد وصفاء ونجوى وحسناء وسوزان قعدو في وحده ونحن قعدنا في التانيه،سهاد قالت لميس دي وينها، لمياء قالت ليها اكلت سليم قبيل واكلت معاهو، حور قالت ليها ما اكلت يا بت وينها هي امشي اناديها، حجه سيده قالت ليها قلنا ليكم اكلت خلو الكلام واكلو انتو زاتكم.. بعد فطرنا حنان ولمياء غسلو العده بعد ما حسناء شاكلتهم قالت ليهم انتو ما عملتو حاجه من جينا ،انا وحور عملنا الشاي الرجال كانو في الصلاه لمن ختيناهو صفاء قالت الحجه وينها ناديها يا حور تجي تشرب الشاي، ما كان في زول في الصاله غير سهاد وصفاء ونجوى حور لمن قامت سهاد قالت ليها سيده في الحمام بتجي هسي ودي الشاي للبنات جوا صفاء كانت بتتونس معاي قالت لي اها الحمل كيف معاك ما يكون متعبك،قلت ليها لالا الحمدلله ذكرتيني عندي حبه بعد الفطور نسيت اجيبها معاي، قالت لي اها عايزه تبدي الاهمال من هسي امشي ابلعيها وتعالي.. مشيت شقتي قبل ما ادخل سمعت اصوات عاليه فتحت الباب لمن دخلت لقيت لميس والحجه قاعدين في الكنبه وايهاب واقف وخاتي يد في جمبتو واليد التانيه بدعك بيها راسو كان مديني ظهرو اتنهد بعدين نزل يدينو وقال انا الموضوع دا تاني ما داير كلام فيهو العندي قلتو ليكم وكررتو الف مرة وانتي يا امي لو ما عاجبك الوضع دا انا بطلع بخلي ليكم البيت وامشي اسكن في اي حته تانيه .. لميس وسيده كانو بعاينو لي ايهاب لمن شافهم بعاينو باتجاهي قبل علي قال لي جمان؟ الحجه قامت واشرت علي بيدها قالت ليهو عشانها داير تخاصمني؟؟ انا كلامي دا قايلني بقول فيهو ساي ولا قايلني ما بريدها بدون سبب ،من عرستها اتغيرت علينا كلنا زمان زمن معرس لميس كنت اي شي بتجيبو في بيتك بتجيبو لينا حتى لو ما جبت لميس كانت بتقسم لينا من حقها ،ايهاب قاطعها قال ليها امي هسي انتي محتاجه لشنو؟ انا مش كل شهر بجيب ليكم المواد التموينيه مع بيتي دا وبجي بسألك اقول ليك لو ناقصاك حاجه ولا دايرين شي للبيت كلموني وريني مقصر في شنو انا،لميس قالت ليها في دي غلطتي يا خالتي ايهاب دا ياهو الماسك بيتكم كان للمواد التموينيه ولا العلاج ولا غيرو سعيد دا ما بعرف ليكم اي شي نحن هسي ما بنتكلم في تقصير ايهاب لأنو اصلا ما مقصر موضوعنا حاجه تانيه،حجه سيده حمرت لي لميس قالت لي ايهاب جاي تمِن علي بواجبك تجاهي؟ ايهاب قال لي لميس سوقي امي وانزلو تحت ،الحجه قالت ليهو سمح اقيف معاها كويس وخاصمني عشانها لكن وقت تعرفها على حقيقتها ما تجي تطلب رضاي ، طلعت ولميس طلعت وراها ايهاب قعد ختا يدو في وشو بعدين مسح راسو عاين لي انا كنت لسه واقفه في مكاني قال لي اقعدي، قلت ليهو دا شنو دا؟؟ قال لي مافي حاجه حركات امي البتعرفيها ، قلت ليهو ايهاب انت شايفني هبله هنا؟ قال لي ما حتستفيدي شي كان حكيت ليك اعتبري نفسك ما شفتي ولا سمعتي شي، قلت ليهو والله؟؟؟ حتقعد كل مره تخليني زي الغبيه ما فاهمه شي متين انا حيكون عندي قيمه عندك وما تتعامل معاي كدا؟، عاين لي باستغراب قلت ليهو حتوريني ولا اقوم الم ملابسي وامشي بيتنا، وقف على حيلو وقال لي جمان قولي بسم الله مالك انتي هسي؟ قلت ليهو انا تعبت تعبت من البحصل دا كل مره بتحمل واسكت اتحمل واسكت واعمل كل الفي يدي عشان اخلي امك ما تعاين لي بالطريقه دي واستحمل كلامها الحار وامشِّي لكن انا خلاص وصلت الحد هسي حتكلمني ولا امشي؟ جا مسكني من كتفي وقال لي حقك علي امسحيها في وشي ،بقيت بعاين ليهو قال لي جمان والله الموضوع ما بستاهل ما... قبل ما يتم كلامو مشيت شلت شنطة ظهر ختيت ملابس من الدولاب ولبست عبايتي وهو واقف جمب باب الغرفه مربع يدينو وبعاين لي لمن جيت طالعه بدون ما اعاين ليهو قلت ليهو زح، قال لي ما زاحي، قلت ليهو ايهاب زح لي من الباب انا ما عايزه اتكلم كتير، قفل الباب وقال لي غيري الطرحه اللابساها دي لأنها قصيره، قلت ليهو دا الهاميك هسي؟ اصلا ما بتعرف تطلع عُقدك دي الا في الوقت دا، مشيت شلت طرحه من الشماعه ولمن قبلت اشر لي بي يدو يعني مع السلامه وطلع قفل الباب وراهو جريت على الباب وبقيت بضرب فيهو وبكورك ليهو قلت ليهو دا شنو العملتو دا ايهاب انا ما بهزر معاك افتح الباب دا ، قال لي لو ما هديتي ما حتطلعي من هنا، قلت ليهو انا هاديه افتح الباب دا ياخ، قال لي واضح شديد انك هاديه ، عليت صوتي ذياده وبقيت بضرب الباب شديد وبكورك ليهو افتح ياخ افتح الباب دا ، فجأة فتحو ومسكني من زراعي لزاني جوا رجع قفلو اتفكيت منو ورجعت ورا بقى جاي علي وانا راجعه لي ورا لحدي ما وصلت السرير قال لي مالك انتي عايزه تصلي لشنو؟ قلت ليهو زح مني ،قال لي ولو ما زحيت، دموعي جات جاريه ختيت يدي في وشي وما قدرت امسك نفسي اتفقعت بالبكا حسيت بيهو لمن قعد جمبي مسك راسي وضماني عليهو قمت بسرعه مسحت دموعي قال لي معليش اعفي لي عارفك ما كنتي حتهدي الا اعمل ليك كدا ،طيب بوديك بعد المغرب هسي تعالي معاي تحت، عاينت ليهو باستغراب ، قال لي ناس اكرم بكونو جو اقعدي مع صحبتك شويه بعدين امشي بيتكم، قلت ليهو ما عايزه انزل ولا شي صحبتي بشوفها يوم تاني ، قمت شلت الشنطه وطلعت لمن قربت اصل باب السلم سمعت صوت همس بقيت بنزل براحه لحدي ما الصوت وضح لي..
حنان: سعيد انا بقيت ما قادره استحمل الوضع دا لمتين حتقعد تجرجني كدا قلت لي حاطلقها وكان عندك فرصه وقت مصطفى اختفى وجات بيتنا لكن ما عملت كدا
سعيد: حنان افهميني وضعي هسي ما بسمح بالحاجه دي بعدين لو كنت طلقتها الوقت داك كان موضوع مصطفى حيتعرف لأنو الناس كلها حتسأل من السبب والخبر الشين ما بتدسى
حنان: اها يعني حاقعد لمتين راجياك كدا
سعيد: اديني وقت بس اشوف لي طريقه اخلص بيها منها
حنان: سعيد انت شكلو موضوعك طويل على فكرة اخر عريس جاني امي وابوي شاكلوني لأنو ما كان فيهو اي شي يخليني ارفض كان على وجاهة ولا اخلاق ولا وضع مادي ولي هسي برسل لي ومستني مني كلمه لو قعدت تماطل فيني كدا انا ما حاتردد في اني اوافق عليهو
سعيد: حنان هوي ما تتجنني فاهمه
حنان: اسوي شنو يعني دايرني اقعد بايره لمتين
سعيد: انا ما بخليك تقعدي بايره ولا بخليك لي زول تاني بقتلك انتي وهو
حنان بي دلع: اممممم طيب اثبت لي كدا، عندك شهر بالكتير يا طلقت سوزي وجيت عرستني يا جيت حضرت جنازتي يلا سي يوو
لمن حسيت بيهم طالعين رجعت لي ورا، دا شنو السمعتو دا؟ ما قادره اصدق للان يعني دي حنان اخت سوزان تعمل فيها كدا؟ ما كان قصدي اتنصت لكن ما قدرت اظهر قدامهم الجو كان حيتوتر ويمكن يعرفو اني سمعت كلامهم طلعت لقيت عربية سعيد جمب الباب مؤيد كان مشا يجيب رنين واكرم معناها وصلو قلت الحمدلله ما صادفت رنين في الحوش مشيت بيتنا لقيت مرام بتحضر سلمت علي لمن شافت شنطتي قالت لي جايه تقعدي معانا؟ قلت ليها اي ،قالت لي انتي كنتي بتبكي ولا شنو؟ قلت ليها لالا ابوي ما جا من الصلاه؟ قالت لي العصر ما اذن، عاينت للتلفزبون لقيت الساعه ٣ الا قلت ليها رهام وريناد وين؟ قالت لي نايمين ،قلت ليها انا برضو عايزه انوم تعباانه.. صحيت الساعه ٤ طلعت لقيتهم بختو الغدا صليت وقعدت جمبهم ابوي قال لي مالك قعدتي بعيد تعالي اتغدي، قلت ليهو شبعانه فطرنا متأخر ، بعد اتغدو فرشنا السراير في الحوش وجبنا الشاي ،كنت مشتاقه لتفاصيل بيتنا دي شديد واكترها قعدة العصريه في الحوش مع الشاي💙 انا ورهام وريناد كنا بنتنونس ومرام كالعاده جوا ابوي قال لي ريناد نادي اختك دي ،ريناد قامت نادتها مرام جات وقفت وقالت ليهو نعم يا ابوي قال ليها اقعدي قعدت وهي مدنقرة كلنا بقينا ساكتين مستنين ابوي يقول حاجه ،قال لي ايهاب واهلكم بهناك كيف قلت ليهو كويسين الحمدلله قال لي شايف قبيل في الصلاه اولاد اهلهم معاهم ،قلت ليهو اي الليله كلهم كانو قاعدين، قال لي مشو بدري ولا شنو ،سكت ساي الباب دق ريناد مشت فتحتو ونحن لبسنا تيابنا كان ايهاب دخل سلم وقعد في الكرسي كان شايل في يدو كيس الادويه بتاعتي قال لي نسيتيها قبيل ومشيتي،سكت ما رديت ابوي قال ليهو مالك طولت مننا كدا، ايهاب قال ليهو طولنا والله يا عمي لكن بقينا مضغوطين شديد اخر فتره دي،ابوي قال ليهو ربنا يعينك ويقويك يا ولدي،ريناد قالت ليهو انت يا ايهاب كنت واعدني بي حاجه لكن شكلك نسيتها ،قال ليها لسه النتيجه ما طلعت، قالت ليهو ما انا قلت ليك درجتي حتكون كم ما بتثق في كلامي ولا شنو ، قال ليها لالا بثق في النتيجه بس نحن ناس دلايل وبراهين الكلام ساي ما بنفع، قالت ليهو دا كلامك؟؟سمممح يا ايهاب ،قعد يضحك الباب دق تاني ريناد قالت ووووب انا يوم بشرد من البيت دا عديل،ايهاب قام وقال ليها خليك ،قامت جرت وقالت ليهو لا فتحتو ووقفت تتكلم بعد شويه قالت اتفضلوا.. جويريه ومعاها مرا داخلين بيتنا!!!! قلبي قبضني وحسيت في شي غلط وفي مصيبه حتحصل اي شي عندو علاقه بالقضيه دي بقى يوترني عاينت لي ايهاب لقيتو هو زاتو بعاين لي ومستغرب سلمو علينا وقعدوا كنا ساكتين ريناد دخلت تجيب المويه دخلت وراها قالت لي دي منو البت البتشبهك دي انا لمن شفتها اتخلعت عديل قلت جمان دي هسي مش كان قاعده جمبي الجابها جمب الباب شنو، قالت كلامها دا وضحكت قالت لي بتعرفيهم؟ قلت ليها هم قالو ليك شنو لمن دخلو؟ قالت لي المرا الكبيره دي قالت دا بيت محمد احمد؟ قلت ليها اي ،بس دا الحصل... طلعت مع ريناد ادتهم المويه وبقينا قاعدين عاينت لي ابوي لقيتو بعاين للمرا وبنزل راسو وبكرر الحركه دي كتير وهي نهائي ما رفعت عينها منو ، ايهاب قال ليها حليمه اخبارك شنو ان شاء الله بس ما يكون مضايقنكم، قالت ليهو لا الحمدلله ماف اي عوجه، عاينت لي ابوي وختت يدها في كتف جويريه قالت ليهو جبت ليك بتك يا محمد، بتك الابيت تشوفها قبل ٢٦ سنه...
يتبع...
يا جماعه انا في ولاية تانيه والشبكه كعبه كعبه شديد اعفو لي على التأخير 🙌
