رهام كانت مدنقرة وبتصلح لي في شملة الدخان قلت ليها واي ياخ اتخنقت انا عايزه اقوم، قالت لي يا بت خلي الحنكشه ما تميتي نص ساعه من قعدتي ،قلت ليها عليك الله خلاص ما قادرة والله، قامت وقالت لي اخدي ليك نص ساعه تاني وقومي ، ريناد جاتنا في العريشه قالت لي راجلك دا من قبيل بدق، قلت ليها ما فاضيه ليهو انا هسي ، رهام فتحت الخط وختت لي التلفون في اضاني تكلتو بي راسي وحمرت ليها قعظت تضحك ومشت جوا، قلت ليهو نعم، قال لي نعم؟ مالك زهجانه كدا ، قلت ليهو ما زهجانه القال ليك منو انا زهجانه، قال لي ما الا تقولي انا بعرفك بدون ما تتكلمي، قلت ليهو امممم(بقيت بكح فجأة لحدي ما التلفون وقع طلعت يدي ورفعتو) قال لي بسم الله مالك عيانه انتي؟ قلت ليهو لا كويسه، قال لي مالك طيب ، قلت ليهو الدخان دا شرقني، قال لي بي مكر: اممممم الدخان، قلت ليهو امشي يا تافه ، قعد يضحك قفلت الخط وختيت التلفون ناديت ريناد قلت ليها جيبي لي سماعاتي جابتهم لي وركبتهم بقيت بسمع في اغاني وبدندن ...
بعد الشهر خلص ناس ايهاب جو وحددو العرس يكون بعد اسبوعين انا اعترضت وبكيت عديل لكن ايهاب كان مُصر واقنعني في النهايه رهام قالت لي بنجهزك ما تخافي ، طوالي اتحبست وقعدوني في الدخان والليله كان اخير يوم لي فيهو فرحت فرح لأني كنت بعاني منو ، باقي للعرس كم يوم وانا كل يوم يعدي علي كنت بتوتر اكتر وبسأل نفسي هل انا اتسرعت في القرار دا ؟ لحدي ما ايهاب يتكلم معاي ويطمني.. بعد قمت لبست شراباتي والجوينتات كنت جعانه صليت العشاء ومشيت اكلت جيت داخله الغرفه لقيت ريناد ماسكه تلفون رهام ومركبه السماعات قلت ليها انتي يا ريناد مش ممتحنه؟ شنو كل ما اشوفك القاك ماسكه التلفون وبتحضري في المسلسلات دي، قالت لي ما عندك شغله بي، قلت ليها ريناد احسن ليك انا ما عايزه معاك قلة ادب وطولة لسان قومي رجعي التلفون دا لي رهام وشوفي قرايتك بي وين ، قالت لي ياخ انتي حتعرسي متين وتتخارجي من البيت دا، قلت ليها ما متخارجه يختي هدا بيتي خطوتين حاعمل ليكم وجع وش بالمشيه والجيه، ما ردت علي قلت ليها سمح ماشه اكلم ليك ابوي، ولا كأني بتكلم معاها طوالي مشيت لي ابوي كان بحضر في الاخبار ورهام جمبو بتطبق ليها في ملابس قلت ليهو ابوي عاين بتك دي ما عايزه تقرا قال لي ريناد ولا منو، قلت ليهو اي قال لي مالها؟ قلت ليهو اليوم كلو ماسكه التلفون وتحضر في المسلسلات ،قال لي ما تضغطوها خلوها تفرق شويه، رهام ضحكت وقالت لي انتي عارفه ابوك دا ما بطلع ريناد غلطانه ولا تتعبي نفسك ساي، قلت ليهو يا ابوي قلت ليك اليوم كلو ماسكاهو الكتاب دا بي عينها ما بتشوفوا ،قال لي ناديها لي ، مشيت ناديتها لمن جات قالت ليهو نعم يا ابوي، قال ليها انتي مالك ما بتقري؟ قالت ليهو قاعده اقرا لكن زهجت من القرايه، قال ليها انتي ممتحنه مفروض تركزي على قرايتك ما على شي تاني، قالت ليهو يعني يا ابوي الزول يكون اليوم كلو بقرا بقرا بقرا زي الاله ، قال ليها انتي اصلا ما قاعده تقري ، شهقت وعاينت لي قالت ليهو دي بتك الكذابه دي قالت ليك انا ما بقرا مش ؟؟؟ قال ليها يا بت دي اختك الكبيره كذابه دي شنو كمان، قالت ليهو والله قاعده اقرا هسي اجيب ليك الكتاب سمع لي الاناشيد دي كلها، قال ليها جيبيهو، قالت ليهو وهي ما مصدقه: اجيبو؟ قال ليها اي مش قلتي حافظه؟ قامت وانا ورهام قعدنا نضحك جابت الكتاب وابوي وطا الصوت للاخر وقال ليها جيبي لي نظارتي من الغرفه مشت جابتها وفتح الكتاب قال ليها اها توتي في الصباح ، من البدايه بقت تتمتم ، ابوي قال ليها امشي جيبي مسطرتك ، قعدت تضحك قالت ليهو انت جادي يا ابوي؟ قال ليها اي ، قامت وهي بتضحك جابتها ليهو قال ليها يلا افتحي يدك، كنت فاكراهو حيضربها بي ورا وبي طرف المسطرة لكن ضربها في كفها وبالجهه العاديه ، ضحكت قلت ليهو دا شنو هسي يا ابوي ، قال لي ريناد قومي هسي احفظيهو لو جيتيني ما حافظه بدقك بالجهه الحاره ، قالت ليهو انا نعسانه ، قال ليها يا بت اسمعي الكلام ، قامت وهي بتتأفف.. بقينا بنتونس انا ورهام وابوي بعد شويه رهام قامت جابت لي المديده قلت ليها بقيتوني زي المرا الوالده قالت لي اكلي ساي من حبسناك ياداب بديتي تتصلحي، قلت ليها لو ما كنت بحب المديده ما كنت اتصلحت يعني ،، ريناد جات شايله الكتاب وابوي سمع ليها لقاها حفظتو قالت ليهو انا نعست خلاص قال ليها سمح امشي نومي ، رهام قالت لي عماتك وخالتك بكرا جايين وبجو معاهم ناس البلد ، ابوي قال ليها اي كلموني، قلت ليهم بكرا الخبيز؟ رهام قالت لي اي عمك ومرتو زاتو بجو بكرا ، قلت ليها مرت عمي دي جايه عشان الحنه ،ابوي قال لي ياا بت ،رهام قالت لي اختي واولادها برضو جايين..
