رنين جات طالعه من الغرفه وشايله اللوحه في يدها جات قدام خالد كان قاعد في الكنبه وبحضر رفعت اللوحه قدامو وقالت ليهو تراا اها رايك شنو ، عاين فيها مسافه ومطا شفايفو قال ليها ما كعبه قالت ليهو ما سمحه يعني؟ قال ليها ما سمحه وما كعبه نزلت اللوحه وقعدت تعاين ليهو باستيااء فجأة صرخ فيها وقال ليها زحي ياخ خلينا نحضر ما تكرهينا ،مشت والعبره خانقاها رجعت لوحتها مكانها ودخلت تعمل الغدا بعد خلصت نادتو وقعدو الاتنين في السفره الصغيره الفيها كرسين بعد اول لقمه خالد خت الملعقه بي زهج وقام على طول رنين اتنهدت ومشت وراهو الغرفه ،في شنو مالك قمت، قال ليها الرز مسيخ
رنين قالت ليهو ما انت اصلا بتحب الاكل المسيخ خالد قال ليها المسيخ ما البدون ملح يا بت الناس.. ختت ايديها في نصها ونزلت راسها هزتو وهي بتقول اممممم بعدين رفعت راسها وعاينت ليهو طيب المره الجايه رايك شنو اناديك تخت الملح انت ها؟؟ قال ليها دا كلام شنو كمان مدت ايديها وقالت بحرقة اعمل شنو وريني انت اعمل شنو اي شي بعملو ما عاجبك ولازم تنق فيهو وتطلع لي الف غلطه اااي شي يا خالد اي شي في البيت دا ولا فيني انت ما راضي بيهو وبتعلق فيهو اتكلم ما عاجبك اسكت تقول كلامي كتير اعمل الاكل الليله تقول ملحو كتير تاني يوم اخففو تقول مسيخ اقعد في البيت تقول لي متوحده اطلع تقول علي حوامه ، سكتت مسافه وقالت بصوت واطي وريني بس اسوي شنو عشان ترضى قام من السرير ووقف قدامها وربع يدينو بعدين بقى بمشي سبابتو في حنكو وبعاين ليها وهو مضيق عيونو قال ليها دا كلو في قلبك؟ مالك ما اتكلمتي من زمان مادام ما عاجباك العيشه معاي ، قالت ليهو حاولت اتعود ولا اغير تصرفاتي لكن مافي فايده بقيت ما قادرة استحملك ولا قادرة اخليك تتغير ،قال ليها هسي انتي عايزه شنو؟ اخدت نفس وقالت ليهو لو ما عايز تغير طريقة تعاملك معاي طلقني
__
من نحن اتولدنا ما حصل امي ولا ابوي مدو يدهم علينا ، ما عشان نحن بارين بيهم وما بنغلط لا ابداً لكن من ضمن الحاجات الكتيرة الكانو متفقين عليها بعد الزواج انو ما ح يستعملوا اسلوب الضرب مع اطفالهم كانو ماشين بمبدأ انو اي مشكله بالكلام بتتحل ، ولو بالغو بشاكلونا بصوت عالي.. بتذكر مره كنت في تامن وقلت لي ابوي عندي درس ومشيت مع صحباتي شارع النيل قضينا اليوم كلو هناك وجيت العصر ، دا كان اليوم الوحيد الابوي رفع يدو علي واداني كف عمري ما حانساهو وفي نفس اليوم قلعت ضرسي الكان ياداب بدا يتهز ، امي اسبوع كامل ما اتكلمت مع ابوي بسبب الكف دا واتفاقهم الخالفو.
لمن شفت عمتي بالمنظر داك وهي بتكورك لي ابوي كنت متوقعه اي شي منو اتمنيت بس اني اكون بحلم وزول يصحيني سريع ،جا قدامي سيناريو بشع شديد قطع سرحتي صوت عمتي سعاد جات داخله وهي مخلوعه بتقول في شنو مالكم ووراها رهام عمتي خديجه عاينت ليهم وقالت ليهم وهي لسه هايجه محمد وينو ؟؟ عمتي سعاد قالت ليها طلع هسي الصلاه رهام قالت لينا في شنو خير يا جماعه عمتي قعدت وبقت تضرب في رجلينها خير؟؟؟ خير بي وين ياااا فضيحتنا الليله قامت وجات علي مسكتني من شعري وجرتني وراها كلهم جايين ورانا عمتي سعاد بتقول ليها خديجه في شنو استهدي بالله واخواتي بجرو فيني منها وقفت وصرخت فيهم فكووو البت فكوها قلت ليكم ورجعت تجر فيني انا كأني كنت في عالم تاني ما عندي اي ردة فعل ولا طلع مني اي صوت لمن وصلنا باب غرفة مرام وريناد رهام وقفت قدامنا وقالت ليها فكيها وخلونا نفهم الحاصل شنو عمتي وقفت وسكتت مسافه ما كان في صوت طالع غير شهيق مرام من البكا ،لزتني لمن وقعت واشرت بي سبابتها علي رهام قالت لي عشانها بس، مرام وريناد قوموني وقعدنا كلنا في الكراسي الفي الصالة عمتي سعاد قالت لينا انطقو يا جماعه وقفتو قلبي ،عمتي خديجه قامت وبقت تأشر علي بي يدها .. بت اخوك.. بت اخوك شغالة ست شاي في جامعتها ، عمتي سعاد شهقت وختت يدها في خشمها انا ياداب دموعي نزلت عاينت لي وقالت لي كمان بتبكي؟؟ بتبكي على شنو ؟ قلت شيتاً غلط انا ؟ جات علي وكوركت فيني قلت شي غلط انا اتكلمي ، رفعت يدها عشت تضربني رهام قامت سريع مسكتها وقعدتها في الكرسي قالت لي ريناد قومي جيبي لي عمتك مويه ، عمتي سعاد جات جمبي وقالت لي دا كلام شنو يا جمان ؟ القالتو خديجه صح؟ مرام قالت ليها بصوت مبحوح لالالا عمتي فاهمه غلط هي .. شهقت وبعدين واصلت كلامها ، هي ما شغاله ست شاي عندهم مكان بتاع قهوة في الكافتريا بتاعتهم في الجامعه هي بس بتعمل القهوة والناس بجو بشيلو منهم عمتي سعاد ختت يدها في راسها وما قالت شي ، ريناد جابت المويه لي عمتي خديجه شربتها والجو صن شويه بعد مسافه عمتي قامت وقالت لي ابوك بعرف يتصرف معاك كيف رفعت راسي وقلت ليها عمتي عليك الله ما...
