"ياسمين الحب💙"
طق طق طق طق صوت خطوات سريعه بكعب عالي في السلم واصلت جري لحدي ما وصلت باب الشقه، الاوراق الفي يدها وقعت.. " يا الله ياخ"
نزلت ترفعهم بزهج
"هسي انا ماسكاهم في يدي ليه؟ واصلا نزلتهم معاي من العربيه ليه؟ اصلا اليوم البقوم فيهو متأخر بكون جايط كدا"
دخلتهم بعبث في الشنطه الفي يدها صلحت جكت البدله اللونها زينبي وختت سبابتها على زر الجرس ما رفعتها الا بعد مسافه بعد قنعت طلعت تلفونها وسلك السماعه عاكس معاها "اااااععع " فصلت السماعه وهي بتكورك دخلت سجل المكالمات ورجعت لآخر رقم كانت متصله عليهو...
كان راقد على بطنو والملايه نصها في الارض ونصها في السرير مكمكم نفسو بالبطانيه ومغطي جسمو كلو الا جزء من راسو الاصلع.... ختا المخده فوق راسو لمن سمع صوت رنة التلفون، مره واتنين وتلاته، رابع مره زح المخده ومدا يدو في محاولة انو يصل الكومدينه لكن بدون فايده زحف عليها بجسمو لحدي ما وصل التلفون عاين للاسم(rosh) رد وختا التلفون في اضانو وهو لسه راقد بوضعيتو ديك
"انت يا ايمن ما جادي؟ انا واقفه في الباب لي ساعه يعني ما سامع الجرس خليك من الجرس صوت نغمتك دي انا سامعاها جمب الباب قوم اتحرك افتح لي رجلي خدرت من الوقفه"
رما التلفون بدون ما يرد قام شال الترينق بتاعو من الأرض لبسو ومشا فتح الباب لقاها متكله على الحيطه ومربعه يدها دخلت وضربتو بكتفها في كتفو ختت شنطتها في الكنبه وقبلت عليهو وهي خاته ايدينها في نصها..
__ ممكن افهم اللا مبالاة بتاعتك دي حدها وين؟ ايمن انا مش امس ظبطت ليك قريب العشرين منبه عشان تقدر تقوم في الوقت المناسب وتجهز نفسك يعني ما عارفه انا ممكن انسان يكون كدا كيف
__ رشا عليك الله ما تقعدي تنقي لي في راسي دا من الصباح براي قايم زهجان
مشا على غرفتو وهي علت صوتها عشان يسمعها
رشا: اي دي الجمله الفالح فيها " رشا ما تنقي لي في راسي" انت لو خليت عندك حبة دم واتعاملت كـبني ادم طبيعي ماف زول بنق ليك
جا طالع وهو شايل ملابسو مشا على الحمام وبدون ما يقيف قال ليها: خلي الكلام الكتير وجهزي لي قهوتي، خليها سفري لأنو اتأخرنا
رشا: ما قادرة عليك يا أيمن نهائي، كل يوم بصحى على امل انو الليله حتتصلح شويه وتبطل برودك وتقلة دمك دي لكن بتحبط بي انها ذادت ذياده
جرت الطرحه البيضاء من رقبتها وطلعت جكت البدله بقت بالفنيلة البيضاء النص كم، بعد معافره في الشنطه طلعت منها قلم ورفعت بيهو شعرها لفوق، مشت على المطبخ الامريكي وشغلت ماكينة القهوه.. خلصت من قهوتو وفتحت التلاجه طلعت جبنه وسلطه قطعتها وعملت سندوتشين، رجعت قعدت في الكنبه خلفت رجولها وصلحت قميصها من فوق
