قعدت مع ناس عمو اكرم كم يوم ورجعت بيتنا لقيت الوضع رجع طبيعي من ناحية امي ويارا وابوي لكن سليم كان لسه زعلان... بعد رجعت يارا حكت لي قالت لي حجه زينب جات بكت واعتذرت لي امي على سوء التفاهم الحصل وقالت ليها بنجي نطلب يد يارا بعد يمتحنو، قلت ليها وامي قالت شنو.. قالت ليها نشوف لحدي بعد الامتحانات بحصل شنو.... عدا علينا اسبوعين وسليم لسه بالحالة دي يوم شلت تلفون امي عشان اترجم كلمات من كتاب الإنجليزي لمن انتبهت للتاريخ لقيتو يوم عيد ميلادو قلت لي يارا الليله يوم كم؟ قالت لي ١٦ مش؟
__ لا ١٧
_ المهم
__ شنو المهم ما متذكرة حاجه؟
_ حا.... دقيقه عيد ميلاد سليم؟؟؟
__ بالظبط
_ اها يعني حنعمل ليهو حفلة مثلاً؟
__ نعمل ليهو قعدة صغيرة ونعتذر منو
_ اعتذر لشنو اصلا هو ما زعلان مني
__ طيب اعتذر منو انا
_ انتي عارفة سليم ما بحب الامور دي هسي حيقول ليك انا شافع عشان تعملي لي عيد ميلاد؟
__ طيب اعمل شنو يا يارا والله ضميري مؤنبني شديد
_ ضميرك يأنبك ليه وانتي أساساً ما غلطتي
__ ما شايفاهو بتعامل معاي كيف؟ عينو دي ما بعاين لي بيها
_ خلاص كدي نفكر نفأجو بشنو ولو ما لقينا حاجه نعمل القعدة .... عايني رائك شنو تطلعو انتي وهو سوا
__ نطلع وين وكيف حيوافق؟
_ عايني هو ما شغال جامعه الليله مشا الصالون حيجي بعد المغرب نقول لي امي تقول ليهو عندها خطوبة بت صحبتها وهي ما بتقدر تمشي تصر عليهو عشان نمشي نحن الاتنين ويودينا هو بعربية طارق انا حاعمل نفسي مصدعه عشان ما امشي، وامي تقول ليهو ياسمين عارفة البيت بي وين تقومي انتي توصفي ليهو المكان الحتمشو ليهو
__ حنمشي وين؟
_ ما عارفه ياخ فكري معاي ما ممكن انا براي اخطط
__ اااا نمشي حديقة؟
يارا فكت الضحكة وقالت لي حديقة؟؟؟ ياس انتي قايلة روحك مودية شافعك عشان يلعب حديقة شنو كمان🤣🤣
__ اها طيب نمشي وين
_ شوفو ليكم مطعم ولا محل ايسكريم
__ ما بعرف انا لكن المحلات دي
_ نسأل امي بعدين
__ اها طيب
_ بس اول ما تصلو المحل وقفيهو وقولي ليهو نفسي في ايسكريم او لو مشيتو مطعم تقولي نفسي في بيتزا مثلاً هو طبعا حيستغرب واحتمال يديك كف ما تتخلعي بعدين
