قال لي ياسمين احلف ليك بشنو وقسماً بالله العظيم انا بحبك.. قلت ليهو بس انا ما بحبك، قال لي بتكذبي على نفسك.. قلت ليهو اكذب على نفسي ليه؟ انا ما بحبك يا امير انت كنت مجرد صاحب لي وهسي ما بتعني لي اي شي.... بقى بعاين لي وملامح وشو ما بتتفسر، نبرة صوتو اتغيرت قال لي طيب وكلامنا وونستنا ديك وغزلي ليك ولمن تخجلي داك كلو كان شنو؟ قلت ليهو امير انا حصل لمحت ليك بحاجه زي دي؟ قال لي انا كنت بلمح ليك وانتي ما وقفتيني ولا قلتي اي حاجه توحي بأنك ما متقبلة الكلام دا!! ما عرفت اضحك ولا ابكي قلت ليهو انت هظارك كتير وفي اغلب الاحيان انا كنت بفتكرك بتهزر ولا ختيت احتمال ١٪ حتى انك عندك حاجه لي.. قال لي طيب تمام ما مشكلة يا ياسمين انا اتقبلت الحاجة دي، خلينا اصحاب بس.... اتنهدت وختيت يدي في راسي بنفاذ صبر قلت ليهو امير انت ما بتفهم؟ لا انت ولا اخوك انا ما دايراكم في حياتي بعد الحصل دا خلاص انتهينا 👏... عاين لي مسافه وطلع رزعت باب الصاله بكل قوتي وقعدت ابكي كل ما اتذكر ونستي معاهو وتاني اتذكر كلامو عني في الفيديو بشفق على نفسي، كان في جانب مني بقول لي من متين انتي قلبك قاسي كدا؟ من متين وانتي بتزعلي من زول للدرجه دي وتتكلمي معاهو بالطريقة دي... لكن انا خلاص تعبت، تعبت من انو كل مرة يظلموني ويعملوني لعبه وانا اتجاوز ليهم تعبت من اني اكون هبله وبصدق اي شي... كل حاجه ليها حد وانا خلاص وصلت الحد...
_ _ _ _
كنت متكله على الكرسي وشبه راقده فيهو، بقلب اوراق التحاليل وانا ما فاهمه اي شي قبلت عليهو كان سايق وسرحان كأنو في عالم تاني، انا زاتي سرحت فيهو.. عامل زي المغناطيس البجذبني ليهو نفسي اعرف قلبي دا شنو؟ معقوله قادر لسنين يتعلق فيهو للدرجه دي وما يشوف غيرو؟ كم مرة اُتيحت لي فرص عشان ارتبط وانساه؟.. انا عايزه افهم دا شي طبيعي ولا انا الما طبيعيه؟ رمشت لمن عاين لي ورجع بسرعه عاين للطريق قال لي في حاجه ؟ قبلت قدام وقلت ليهو تؤ... مسك يدي وقال لي كل شي حيكون تمام ان شاء الله عاين لي وابتسم.. حسيت بامان عمري ما حسيتو قبل كدا ما بتذكر مسك يدي واتكلم معاي بحنيه كدا متين؟؟ لو عارفاه حيعمل كدا كنت اتمنيت امرض من زماان.. مجنونه؟ ما بعرف كل العارفاه انو ما عايزه اللحظه دي تخلص ولا عايزاه يفك يدي شديت على قبضة يدو قال لي خايفه ؟ قلت ليهو لا.. قدرت اقرا علامات الاستغراب في وشو بالرغم من انو كان خافيها، قلت ليهو جد والله ما خايفه، قال لي اصلا انتي اقوى انثى شفتها في حياتي... ابتسمت وقلت ليهو وانا بعاين للطريق بالجد؟ قال لي جد والله بس مشكلتك بتستقوي مرات بالغصب، زي هسي، عادي لو قلتي انا خايفه.. عاينت ليهو وقلت انت ليه ما مصدقني ؟ قال لي لأنو حتى لو انا كنت مكانك كنت حـاخاف.. رفعت أيدينا الماسكين بيها بعض وقلت حتى لو كنت ماسكاك كدا؟ قال لي مسكة يد حتخليني ما اخاف؟.. فكيت يدي بقوة وقلت ليهو حنية بربع جنيه ماف.. بعد مسافه قلت ليهو عارف عندي كم امنيه قبل ما اموت؟.. قال لي عارفاني ما بحب السيرة دي، قلت ليهو خمن خمن بس، قال لي ٢٠ ولا ٣٠ .. ضحكت وقلت ليهو اتنين بس، قال لي اها؟ قلت ليهو الاولى أيقنت انها ما حتتحقق بعد دا، والتانيه اذا عشت شهر واااحد بس حاحققها.. قال لي حتعيشي لمن تزهجي وتحققي اي حاجه في بالك
