اول ما ايهاب شال الكبايه سمعنا الجرس عايزه اقوم لقيتو قام قبلي فتحو وبقى واقف شايفاهو بتكلم بقيت بتاوق عشان اشوف دا منو بعد شويه ماجد جا داخل،انا قلبي دا حسيتو وقع ونفسي كتم وبقيت خايفه ابوي يجي طالع في اي لحظه قمت جريت ومشيت عليهم قلت ليهو الجابك شنو؟ قال لي برحبو بالزول كدا؟ جيت اشوف عمو محمد وابارك ليكم الخطوبه قلت ليهو ماجد اطلع الله يرضى عليك قال لي انا كنت عارف في شي غلط لو ما وريتيني الحاصل شنو انا من مكاني دا ما متحرك ، ايهاب مسكو من زراعو وقال ليهو تعال معاي ، طلعو برا وانا بقيت واقفه جمب الباب وبعاين لي باب الصالون ومتوترة شديد بعد شويتين سمعت صوت ماجد بقى عالي طلعت لقيتو بكورك في ايهاب قال ليهو انت الدخلك شنو انا جاي بيتك يا زول؟ مشيت قلت ليهو ماجد انت مش عايزنا نتكلم استنى هنا وانت ساكت انا بجي هسي ، ايهاب قال ليهو انا من قبيل محترم نفسي عشان عم محمد لو لسه بقيت تقل في ادبك وما مشيت من هنا ما ح يحصل خير ،ماجد قال ليهو اعلى ما في خيلك اركبو ،جريت ايهاب من يدو ووقفنا جمب الباب كان بعاين لي بطريقه تخوف قلت ليهو لو سمحت خليني انا احل الموضوع دا ما تدخل، قال لي جداً ما بتدخل لكن خليني اكلم ابوك هو البحلو، قلت ليهو خلاص تمام انا بلبس عبايتي وبجي نطلع كلنا من هنا لأنو ابوي لو جا ما بحصل خير ،قال لي نطلع نمشي وين؟ ادخلي جوا يا جمان وما تخليني افقد اعصابي، قلت ليهو ايهاب رجااااءً بوعدك دي اخر مرة اشوفو فيها بس خليني انهي الموضوع دا براحه بدون ما ابوي بعرف شي، سكت ساي قلت ليهو ها؟ قال لي خلاص سريع، جريت دخلت جوا لبست لي اقرب عبايه وطرحه قلت لي رهام تقول لي ابوي اني طلعت مع ايهاب،مشيت لقيت ماجد متكل على عربيتو ومربع يدينو وايهاب بعاين ليهو، لمن جيت جمبهم ماجد فتح لي الباب عاينت لي ايهاب ووقفت ،ماجد قال لي مالك واقفه اركبي، ايهاب قال لي تعالي مشيت وراهو وعملت لي ماجد اشارة بي يدي يعني بتصل ليك ،كنت عارفه فهمو انو ما عايزني اركب مع ماجد ، لمن وصلنا جمب بيتهم عربيتو كانت برا ركبنا واتحركنا قال لي اتصلي ليهو واديني التلفون دا ، شالو وقال ليهو تعال في الكافيه الفي الزلط .. نزلنا وبقينا مستنينو ايهاب قال لي عندك ٥ دقائق بس وانا من الطاولة دي ما بقوم ، سكت لأنو لو اتكلمت كان حيخلينا نرجع قبل ما ماجد يجي، لمن ماجد جا قعد وبقى بعاين ليهو ايهاب شبك يدينو وختاهم في الطاولة قال ليهو انجز عايز شنو؟ ماجد قال ليهو انا جاي اسمعها هي واخر مره اقول ليك ما تدخل ،ايهاب مسح وشو بي زهج انا كنت خايفه اتكلم ويعمل حاجه عاين لي وقال لي اتكلمي، عاينت لي ماجد قلت ليهو ماجد انا بقيت مخطوبه وايهاب اشترط علي انو ما يكون عندي اصحاب اولاد عشان كدا انا مضطرة اقطع علاقتي بيك، ماجد بقى بعاين لي وبعاين ليهو قعد يضحك وقال لي فاكراني ح اصدق العبط دا؟ ايهاب قال ليهو احترم نفسك ، قلت ليهو لو ما عايز تصدق بي راحتك، قال لي طيب ليه حميتيني ادخل بيتكم ؟ ليه كنتي خايفه كدا لمن جيت ، قلت ليهو لاني وعدت ابوي احقق لي ايهاب شرطو ولو عرف حيشاكلني، ماجد قال لي بي ذمتك انتي مصدقه الهبد اللي بتهبدي فيهو دا؟ ايهاب قام وقال لي يلا ،قمت وقلت لي ماجد انت كنت صاحب كويس وما حانسى وقفاتك معاي لكن انا بحب ايهاب وما بقدر اخسرو عشانك ياريت تبعد عشان ما تحصل مشاكل تاني ، مسكت يد ايهاب ومشينا لمن وصلنا العربيه فكيتو وركبت ، طبعاً هو كان مستغرب فيني لكن ما اتكلم نهائي، انا قلبي وجعني على الكلام القلتو لي ماجد واحتقرت نفسي شديد لكن ما كنت عايزه اوقعو في مشاكل بي سببي، ابوي لو عرف بالحصل الليله دا كان حيقتلوا عديل لكن كنت زعلانه من ايهاب شديد لو كان خلانا برانا يمكن كنت ح اقدر احكي ليهو اي شي من العملوهو اصحابو لحدي ما وصلت لي هنا.. قلت لي ايهاب انت ما عندك اي حق تدخل في حياتي بالشكل دا،، ما عارفه قلت كلامي دا كيف لأنو كان زهجان شديد وسايق بي سرعه لكن لساني زلق.. عاين لي وسكت ما قال حاجه لحدي ما وصلنا نزلت ولمن دخلت ابوي قال لي كنتو وين ليه ما كلمتوني انكم طالعين قلت ليهو كان نفسي في ايسكريم ومشينا المحل الفي الزلط دا بس وجينا ، ابوي ابتسم لمن وقال لي ما مشكله المهم انبسطوا.. صليت العشا ودخلت غرفتي وانا متضايقه شديد بسبب تصرفاتي دي بقيت بخسر اي زول بحبو في حياتي ،استاذ حسام لو ما كنت قلت ليهو اني بحبو واتصرفت كأنو ما حاصل شي يمكن ما كنا وصلنا لمرحلة انو بقى يكرهني وفقدت وجودو في حياتي.. وهسي ماجد، ما قادرة احكي ليهو الحصل وفوق دا اتواقحت معاهو وقلت ليهو ما عايزه اشوفك تاني، انا بقيت ما عارفه هل العيب مني ولا من الظروف ولا منهم هم زاتهم ، ثقتي في نفسي اتهزت شديد وبقيت خايفه اخسر اي زول تاني واجي اندم والوم نفسي واقول يا ريتني ما عرفتو، بقيت اخاف اتعرف على ناس جداد ويحصل نفس البحصل لي كل مره، وايهاب ..
