بعد المغرب ابوي لمن جا ريناد قالت لي مرام دي اتأخرت هسي كان سألنا نقول ليهو شنو، قلت ليها قولي ليهو مع هديل، بعد ما ابوي اتغدا عملت الشاي ومشيت قعدت معاهو في الحوش قعدنا نتونس انا وهو رهام لحدي العشا بعد داك طلع يصلي ، اول ما طلع ريناد جات شايله تلفونو كان بضرب قلت ليها لحقيهو ليهو ما بكون مشى بعيد.... صليت وقعدت في الحوش قلقت لمن ابوي اتأخر قلت لي رهام مالو ياربي قالت لي يكون دخل للجيران ، دخلت جوا وبعد مسافه سمعت صوت كواريك طلعت برا لقيت ابوي بضرب في مرام ووشها دا مليان دم ،رهام كانت بتجر فيهو وريناد بتبكي مشيت جريت مرام منو وقلت ليهو في شنو يا ابوي ،مدا عليها سبابتو وقال ليها انتي لا بتي ولا بعرفك تطلعي من البيت دا هسي وما اشوف خلقتك دي تاني في وشي، قلت ليهو ابوي استهدى بالله الحاصل شنو، قال لي انا في اخر عمري يضربو لي ناس الاداب ويقولو لي قبضنا بتك في وضع مُخل؟؟؟ انتو ما حترتاحوا كان ما قتلتوني بجلطة ووقعت قدامكم ؟؟ انا عمري دا كلو بربي فيكم وبحاول بقدر الامكان اوفر ليكم اي شي محتاجنو وما انقص منكم حاجه ليه مصرين تنزلو راسي قدام الناس اسوي ليكم شنو انا بس وروني؟؟؟؟حسيت كأنو ضربتني كهرباء جسمي كلو ارتعش وانا بعاين لي مرام كانت مغطيه وشها بتبكي بدون صوت وجسمها برجف ،ابوي كان لسه بكورك قال ليها اخلي ليك البيت انا وامشي؟؟ رهام جرتني قالت لي جمان سوقي مرام وامشي بيتكم جمان سامعاني؟؟ هزيت ليها راسي قلت ليها مرام تعالي معاي، لبست لي توب وسقتها بيتي دخلنا الحمام غسلت ليها وشها من الدم وطلعت خليتها تستحمى ،قعدنا في الصاله كانت لسه بتبكي وبتشهق قلت ليها تعالي دخلت بيها الغرفه عقمت ليها الجرح الفي جبتها وعملت ليها لصقه قلت ليها خليك هنا لحدي ما تهدي لو عايزه حاجه انا برا، قعدت في الصاله وانا حيلي ما شايلني غلبني البعملوا، ابكي؟؟ دموعي زاتا خلصت والبكى ما بحل لي شي غير ينفسن بي ذيادة، اقوم اضربها زي ما عمل ابوي؟ حتى لو ضربتها ما حاقدر ارجع الزمن واوقف الحصل دا قبل ما يحصل، الحاله الشفت فيها ابوي الليله ما حصل شفتها فيهو خفت عليهو شديد شلت تلفوني واتصلت على رهام قلت ليها ابوي كيف ما هدا شويه؟ قالت لي بعد طلعتو هبط لكن عملنا ليهو جلكوز هسي احسن شويه لكن ما عايز يسكت يا جمان شغال انا ما عرفت اربي وياريتني مت قبل ما اشوف اليوم دا.. قفلت منها وبدل ما اطمن على ابوي قلقت ذيادة ، بعد مسافه ايهاب اتصل لي قال لي قبضو ظافر ولقو عندو جواز مزور ومؤشر دي خطوه كبيره وحتساعدنا عارفه كمان لقو معاهو واحده في الشقه مرام لو عرفت حتتأثر شديد لكن في النهايه حتفهم انو ظافر دا زول لعب بس وما جادي، لمن سكت قال لي جمان انتي معاي ؟ قلت ليهو معاك، قال لي مالك في شنو؟ قلت ليهو مافي شي حتجي الصباح ؟ قال لي للظهر كدا بكون وصلت، قلت ليهو طيب تصبح على خير ، قال لي متأكده مافي شي ،قلت ليهو اي.. قفلت منو وعملت عصير ليمون دخلت الغرفه لقيتها قاعده طرف السرير ومتكله على راسو وسرحانه مشيت قعدت جمبها ومديت ليها العصير ما شالتو قلت ليها اشربيهو حيهديك شويه، ما ردت علي ختيتو وقلت ليها عايزه تحكي لي؟ هزت راسها يعني لا ، زحيت منها مسافه ومسكتها من راسها رقدتها في رجولي بقيت بمشي يدي على شعرها فكيتو ليها وجا نازل على الارض ضحكت و قلت ليها تتذكري زمان لمن امي تسرحنا واقول ليها الا تسرحيني زي مرام؟ شعرك عشان طويل كنت بقول ليها سرحيني زيها لأني قايلاهو حيبقى زي حقك ،مع اني كنت كبيره لكن كنت عويره ، حسيت بيها ضحكت ضحكه خفيفه، قلت ليها ولمن نمشي المدرسه والبنات يدقوك ما كنتي بتكلميني الا هديل تجي تقول لي تعالي اجري يا جمان البنات دقو مرام كنت بجي ادقهم دق العيش لمن مرات يفصلوني وامي في النهايه تدقنا نحن الاتنين ، تتذكري لمن بنات عمتي خديجه بقولو ليك فاطنه السميحه وانا بقولو لي فاطنه الزريقه؟ ضحكت وقالت لي مع انك سمراء زيهم لكن بحبو يبالغو، قلت ليها انتي عشان لونك فاتح شديد كنت بتشاف جمبك خدراء عديل، تتذكري يوم كنتي شايله ريناد ووقعتيها امي كانت عند ناس خالتو سعديه وقعدتي تبكي قلت لي عليك الله ما تكلميها بقيت بهددك بالوقعه دي في اي شي لو ابيتي تجيبي لي مويه ساي بقول لي اصبري لي لي امي، قالت لي في النهايه لمن زهجت منك كلمتها براي، ضحكنا الاتنين بعديها سكتنا مسافه قلت ليها ياريتنا ما كبرنا، قالت لي ياريت💔💔💔 قلت ليها انا نعست الليله حتضايقيني في سريري لو لقيتك بترفسيني بجدعك في الأرض طوالي، قامت زحت شعرها وقالت لي جمان، ابوي ما حيسامحني عمرو كلو، قلت ليها لمن تصبح نتكلم في الموضوع الوقت اتأخر خلينا ننوم.. رقدنا وكنت بسمع صوت انينها طول الليل، ما عرفت نفسي نمت متين لمن صحيت لقيت الساعه ٧ مرام كانت لسه نايمه قمت صليت وقبلت على الغسيل دخلت المطبخ اعمل دمعه للفطور اثناء ما شغاله ريناد جات قالت لي صباح الخير قلت ليها صباح النور كملتي النوم، قالت لي صليت الصبح ونمت، قلت ليها الوقت اتأخر ما تشربي الشاي استني الفطور.. بعد خلصت الغسيل عملت الفطور ومرام قطعت لي السلطه فطرنا وما اكلت غير لقمتين حسيت بيها قعدت عشان ما ازن عليها بس بعد فطرنا قالت لي عايزه ارجع بيتنا قلت ليها ما بنفع هسي يا مرام خليك هنا اليومين ديل لحدي ما ابوي يهدا شويه.. الظهر كدا ايهاب جا ختيت ليهو الفطور بعد استحمى فطر وصلى وجا قعد معانا مرام استأذنت ودخلت الغرفه التانيه بتاعت المكتب، ايهاب قال لي كلمتيها؟ قلت ليهو بشنو؟ .. كنت فاهمهو لكن ما قادره اقول شي ، قال لي بموضوع ظافر ،قلت ليهو اي حتقعد معانا اليومين ديل ،قال لي حبابها، قلت ليهو عملت شنو، قال لي الجلسه الجايه حنخلص ان شاء الله ،قلت ليهو حتكون متين، قال لي بعد ٣ اسابيع .... مرام قعدت معانا يومين ورجعت البيت رهام قالت لي ابوك ما قاعد يتكلم معاها نهائي حنى وشها قال ما عايز يشوفو ،لمن رهام تحكي لي كنا بحس بيها مبسوطه ما عارفه اذا احساسي دا صح ولا غلط لكن بتمنى بشدة انو اكون بتوهم بس، ريناد نزلت امتحانات ومرام ابوي حماها تمشي الجامعه قلت ليها اتكلم ليك معاهو ؟ قالت لي كونو خلاني لحدي الان عايشه دي براها كفايه ما عايزه قرايه ولا غيرو ، ما كلمت ايهاب بي شي لكن كان حاسي اني داسه منو حاجه ، ال٣ اسابيع عدو بامان شويه احسن من الفاتو يوم جيت طالعه الجامعه ايهاب قال لي برضو ما حتجي الجلسه؟ قلت ليهو ح اجي، مشيت الجامعه كان عندي محاضره واحده لمن رجعت غشيت بيتنا قلت لي مرام تمشي معاي؟ قالت لي وين ، قلت ليها الليله الجلسه، قالت لي ما ماشه، قلت ليها لو على ابوي انا بحاول اقنعو حاقول ليهو سايقاها معاي الدكتور قالت لي ما عايزه امشي والله يا جمان لو مشيت وشفتو حاوجع قلبي بس.. قبل ما اطلع رهام قالت لي تعالي عايزاك قلت ليها في شنو ؟ قالت لي مرام دي من امس ما كويسه ، قلت ليها مالا؟ قالت لي تستفرغ وتقول عندها طمام ولفة راس خايفه يطلع الفي بالي صح، قلت ليها ما سقتوها فحصتو ليها، قالت لي البقدر يكلم ابوك منو؟ دخلت تاني وقلت لي مرام قومي معاي قالت لي ما ماشه يا جمان ياخ، قلت ليها حنمشي نفحص ليك ، نطت لي عيونها قلت ليها يلا، قالت لي طمام عادي بروح، قلت ليها قومي يا مرام انا مستنياك برا .. قعدت لحدي ما جات طالعه ولابسه عبايتها قلت لي رهام ابوي لو جا قولي ليهو جمان عيانه مشت تفحص وساقت معاها مرام، مشينا المركز فحصنا ليها وكنا مستنين النتيجه ايهاب اتصل لي قلت ليهو ما بقدر اجي حسيت بيهو زعل لكن موضوع مرام كان عندي اهم من الجلسه بعد مسافه الدكتوره نادتنا نزلت نظارتها و عاينت لي مرام قالت ليها انتي مرام صح ؟ هزت راسها، قالت ليها مبروك عليك حامل في الاسبوع التاني ... رجعنا البيت وكنا ساكتين الطريق كلو لحدي ما وصلنا ،جمب الباب قالت لي حتكلمي ابوي؟ قلت ليها اكيد حاكلمو ، اديتها الكيس بتاع الادويه دخلت الغرفه وانا قعدت مع رهام وكلمتها قالت لي اها ما قلت ليكم الليله ابوك البكلمو منو خليك من ابوك نقول للناس شنو وووب علينا ، قلت ليها ما عارفه يا رهام ما عارفه.. قعدت معاهم لحدي المغرب لمن ابوي جا كلنا كنا متوترين كنت بسوي في الشاي ريناد جات قالت لي ابوي بناديك .. شلت صينية الشاي وطلعت الحوش رهام كانت قاعده معاهو وساكته ساي، قلت لي ابوي الليله وديت مرام المستشفى ، قال لي مالا؟ سكت ، بي نهرة قال لينا مالكم ما بتردو اتكلمو في شنو، رهام قالت ليهو بتك حامل .. ابوي سكت مسافه بعدين قال نادو لي مرام، قمت ناديتها كانت منزله راسها وبتدعك يدينها وواقفه قدامو قال ليها اقعدي ،قعدت وقالت ليهو انا عايزه انزلو يا ابوي، قال ليها تنزليهو؟؟ لمن غلطي غلطتك دي في زول قتلك لمن هسي تقتليهو؟ دي روح خلقها الله فيك وما انتي البتقرري تعيش ولا لا.. اتفاجأنا كلنا من ردة فعل ابوي بعد كلامو دا تاني ما قال حاجه لمن دخلنا جوا رهام قالت ليها الحمدلله ربنا جاب العواقب سليمه لحكي ما مصدقة ردة فعل محمد، بعد العشاء رجعت بيتي لقيت ايهاب في المطبخ بعمل شاي جيت وقفت جمب الباب وتكلت راسي عليهو قال لي اكب ليك معاي؟ هزيت راسي وقلت ليهو تؤ.. مشيت قلعت عبايتي وجيت الصاله قعدت جمبو كان شغال بي تلفونو لمن جيت ختاهو وقال لي ما حتسأليني حصل شنو ،قلت ليهو اول شي حمدلله على السلامه، قال لي الله يسلمك لكن ما انتهت بالطريقه العايزنها، قلت ليهو كيف؟ قال لي لبسوها عملائهم بس لكن كبارهم طلعو منها، قلت ليهو ما مشكله برضو أنجزتو، قال لي جمان انا ما كنت عايز افتح معاك الموضوع كنت قايلك حتحكي لي براك لكن ما قادر اشوفك بالحاله دي واكون مكتف يدي كدا، قلت ليهو ما فهمتك، قال لي انا كنت شغال في القضيه دي وعارف اي صغيره وكبيره فيها فاكراني ما حاعرف الكانت مع ظافر منو؟ نزلت راسي وانا ساكته رفع لي راسي وقال لي ما تنزلي راسك ليه ما حكيتي لي انا غريب عليك ولا ما حاسباني جزء من عيلتك؟ قلت ليهو الموضوع ما كان هين علي يا ايهاب، مسك يديني وقال لي عارف عشان كدا قلت ليك ليه ما حكيتي، انا فايدتي شنو لو ما وقفت معاك في مواقف زي دي انتي كنتي معاي في اصعب فتره في حياتي بالرغم من انك كنتي خايفه واتعرضتي لي مواقف كتيره خطره لكن ما حسستيني انك متضايقه ولا زهجانه من الوضع دا ولا طلبتي مني اني اوقف شغل على القضيه، انا عمري ما حانسى وقفتك دي معاي متأكد لو اي واحده غيرك ما كانت حتستحمل الوضع دا.. دموعي جات نازله مسحها لي وقال لي والله ما بهون علي اشوفك وانتي بالحاله دي صدقيني اي شي حيعدي ويبقى ماضي ، قلت ليهو بعدي لكن ما بتنسي ، قال لي يمكن ما يتنسي لكن انا هنا عشان اهون عليك، قلت ليهو ما حتسألني ما جيت حضرت الجلسه ليه؟ قال لي عارف لو ما سبب قوي ما كنتي فوتيها، قلت ليهو مشيت مع مرام الفحص، مرام حامل، قال لي مفروض تتوقعو حاجه زي دي ، قلت ليهو مرام لسه صغيره ما عارفه حتقدر على المسؤوليه دي ولا لا، قال لي بتقدر ان شاء الله بعدين رهام معاها وانتي برضو معاها حتساعدوها اذا احتاجت ليكم...
الفتره البعديها عدت سريع كانت كلها ورا المشروع والجامعه كنت بمشي بيتنا مره مره اطمن على مرام ورهام يوم مشيت لقيتهم طلعوا لي ناس هديل وريناد بس في البيت ،قالت لي بقو لي اتنين حوامل في البيت والشغله كلها فوق راسي كان اخير المدرسه ،قلت ليها غايتو انتي لو كنتي عارفه في حاجه اسمها شغل من بطن امي ما كنتي طلعتي، نفس اليوم دا لمن جيت داخله البيت لقيتهم كلهم لابسين وطالعين، سوزان رجعت ليها اسبوع كدا نجوى قالت لي سعيد قال ليها لو ما جيتي بكرا تاني ما ترجعي بتجي مرا بدلك في البيت دا تاني يوم جات ، نجوى جات طالعه شايله في يدها طبق فوقو سد ومزين ،قالت لي جمان استني وقفت جمب الباب بعد دخلتو عربية سعيد جاتني قالت لي كنت عايزه اكلمك لكن امي.. هزيت ليها راسي، قالت لي الليله سد المال ووادين حاجات الحبس قلت ليها ربنا يتم ليهم على خير سوزان جات قالت لي نجوى اتأخرنا ياخ اتحركي ، عاينت لي من فوق لي تحت ولوت خشمها ومشت ،نجوى قالت لي غايتو سوزي دي الله يهديها بس، حجه سيده نزلت الشباك وكوركت لي نجوى قالت ليها ياخ ما تتحركي لو في زول عندو كلام معاك خليهو يستنى ما طايره انتي ،نجوى مشت وانا دخلت بيتي العبره خنقتني يعني قدر ما احاول ما امسك في خاطري واتجاوز حركاتهم لكن كل مره بفوزو في انهم يكسروني ويحسسوني اني نكره في البيت دا انا ما زعلت عشان ما كلموني زعلت من كترة التراكمات الجواي كل مره بتجاوز وبقول الوضع حيتصلح لكن غير ماشي للاسوء ماف خلاص وصلت الحد وما قادرة اتحمل اكتر.. ايهاب جا بعد المغرب، العشا كدا كنا بنحضر قلت ليهو اتوقعتك تمشي بهناك، قال لي حيتأخرو ما بقدر اخليك براك، قلت ليهو ما لحقتهم، قال لي انتي بتغطي عليهم ليه ومن منو ناس بيتنا انا بعرفهم كويس وبعدين انا ما سألتك ، قلت ليهو سمح سكت قال لي يلا قومي، قلت ليهو اقوم وين؟ قال لي طولنا ما طلعنا ، قلت ليهو ماشين وين، قال لي ما عليك البسي بس ، قلت ليهو ما عندي نفس قال لي خلاص انا حالبس واشوف لي واحده من الشارع اسوقها معاي، قلت ليهو ان شاء الله تلقى واحده سمحه، قال لي الله ما كتر الا البنات السمحات في الشارع.. فاكراهو بهزر لكن بعد كلامو دا استحمى ولبس وجا طالع قال لي يلا لو اتأخرت نومي ،قمت على حيلي قلت ليهو ماشي وين؟ قال لي الله! هسي انا كنت بقول في شنو، قلت ليهو انت جادي يعني ؟ قال لي البخليني اكذب شنو، قلت ليهو تمام الله يعدلها عليك ،اول ما اتحركت جراني وضماني عليهو قال لي انتي مالك بقيتي زعوله كدا زي الشفع، قلت ليهو كنت حتوقعني، قال لي كان ضحكت شويه، ضربتو في صدرو وقلت ليهو بايخ، قال لي يلا اجهزي مستنيك.. دخلت لبست فستان بني مخطط بالمنقاوي عملت ميكب خفيف وطلعنا مشينا اكلنا اسكريم في محل في شارع النيل واتمشينا شويه قال لي مبسوطه ؟ قلت ليهو يعني، قال لي بنسبة كم كدا قلت ليهو ٥٠٪ قال لي وال ٥٠ التانيه وين، ضحكت وقلت ليهو بهزر معاك انبسطت شديد ، كان ماسك يدي باسها وقال لي ان شاء الله دائماً مبسوطه ، قلت ليهو جمعاً يارب نرجع بعد دا عشان عايزه اسلم على ناس بيتنا، قال لي حاضر انتِ تأمري، قلت ليهو بالطريقه دي حاقول لي ناس بيتكم كل يوم اطلعوا، قال لي ما طلعنا عشان ناس بيتنا طلعوا ،طلعنا عشان ننبسط سوا ، قلت ليهو طيب بالطريقه دي كل يوم حاقول ليك ارح ننبسط سوا.. العربيه كانت جمب محل الاسكريم لمن وصلنا قال لي اركبي انا جاي دخل وجا طالع وهو شايل كيس فيهو علب اسكريم ،نزلنا عندهم ريناد قالت لي جايين من وين وجايبين لينا شنو ،شالت الكيس لمن فتحتو قعدت تصرخ قالت واااي والله لي كم يوم نفسي فيهو لكن لو سقتوني معاكم كنت حافرح اكتر، مدت لي رهام ومرام كانت راقده قالت ليها ما عايزه ، قلت ليها مالك؟ رهام قالت لي من الصباح ما اكلت حاجه وبعد المغرب كدا نزل منها دم ، قلت ليها كيف يعني وليه ما مشيتو الدكتور؟ قالت لي الدم ما كتير بكرا المقابله بتاعتها نشوف الحاصل شنو ،قلت ليها هي متابعه مع نفس دكتورك؟ قالت لي اي، قلت لي مرام الاسكريم ظابط والله ضوقيهو ،قالت لي باكلو بعدين ، ريناد قالت ليها ما بتلقيهو والله ، رهام قالت لي ابوك كان قال حنمشي نضحي مع عماتك في شندي لكن هسي ما عارفه الوضع حيكون كيف العيد باقي ليهو اسبوع وما فاهمين ساسنا من راسنا ،قلت ليها ما اظن يكون في سفر ،ريناد قالت لينا سامعه ابوي امس بتكلم مع عمي ابراهيم شكلو هو زاتو ما مسافر، رهام قالت لي معناها حيجونا... لمن رجعنا البيت رنين اتصلت لي وشاكلتني عشان ما مشيت معاهم قلت ليها لمن رجعت من الجامعه لقيتهم طلعو وكنت تعبانه ما قدرت الحقهم، تاني يوم كان الخميس منو وحنأجز للعيد قعدنا للمشروع واتفقنا على الحاجات الحنشتغلها لحدي ما ننزل، لمن مشيت بيتنا اسأل من مرام رهام قالت لي الدكتور قال وضع الجنين ما مستقر و اداها مثبتات..
قبل العيد بي يومين جو اكرم وابوهم سمير وصلو المساء كدا مشينا انا وايهاب نسلم عليهم كنت مطوله اخر مره دخلت عليهم قبل سد المال،بعد دخلنا وسلمنا نجوى قالت لي جمان انتي ما تكوني لسه زعلانه مني،قلت ليها ابدا والله، حجه سيده قالت ليها تزعل من شنو هسي وريني اخر يوم جات دخلت البيت دا متين، كالعاده عملت نفسي ما سامعه شي، نجوى قالت لي رهام واخواتك طولو ما جو علينا خير ان شاء الله مالهم، قلت ليها رهام الحمل متعبها الفتره دي ومرام وريناد ياهو ماسكين البيت ، قالت لي لا ياخ ربنا يعافيها ان شاء الله ، قلت ليها آمين يارب ، الرجال كانو في الصالون جو قعدو معانا عم سمير قال لي اخبارك شنو يا بتي واهلك كيفهم ان شاء الله طيبين، قلت ليهو الحمدلله كلنا كويسين والله انت كيفك مع تعب السفر ، قال لي والله الحمدلله من امس راقد لكن حاسي جسمي دا كلو واجعني ، قلت ليهو اصلا السفر كدا ، قال لي لالا انا عجزت ، قلت ليهو ما تقول كدا ياخ انت لسه شباب، قال لي شباب بي وين بعد دا باقي لي جمعتين ولا بتقولو شنو انتو الشباب، قعد يضحك وضحكنا معاهو حجه سيده قالت ليهو انا مستغربه الراجل الكنت شغال معاهو مشغلك كيف لحدي هسي ، نجوى قالت ليها امي ما تزعلي من كلامي لكن ابوي شادي حيلو اكتر منك ويتشاف اصغر منك كمان😂 الحجه حمرت ليها عم سمير قال ليها وريها امك دي بالله ، اكرم قال ليها اللييييله بس خليك قدر كلامك دا.. قعدنا معاهم شويه وطلعنا العصر كدا قريب للمغرب طلعت على ناس بيتنا صادفت علي واقف جمب الباب وبتكلم بالتلفون قلت ليهو علي؟!! قفل وقال لي جمان كيفك، قلت ليهو تمام الحمدلله انت كيف وجيت متين، قال لي جيت امس المساء ،قلت ليهو خالتي جات معاك؟ قال لي لالا، دخلنا سوا ابوي كان في الحوش ومعاهو ريناد ورهام ،علي كان داخل الصالون ابوي ناداهو ريناد قامت جابت الكراسي وانا دخلت لي مرام كانت راقده ومقبله على الحيطه قلت ليها مرام ؟ نايمه ولا شنو ، فجأة قامت حضنتني وكانت بتبكي بي حرقه بدون صوت حسيت بجسمها البهتز وهي حاضناني بعد مسافه فكتني ووشها بالبكاء كان ما بتفسر قعدت في السرير ونزلت راسها، من يوم الحصل مرام ما كانت بتعاين في وش زول يا بتعاين للارض ولا سرحانه في اتجاه تاني قعدت جمبها وبقيت بمسح على ظهرها كانت لسه بتبكي قلبي وجعني شديد عليها بقيت ببكي معاها قلت ليها مرام ياخ ما تعملي في نفسك كدا،بقت بتهز في راسها وهي عاضه شفتها السفلي، شفايفها اهتزو وهي بتشهق من البكاء بعد مسافه مسحت دموعها وقالت لي قاعد لسه ولا مشا؟ قلت ليها قاعد ، قالت لي عرف💔 قلت ليها عرف كيف منو الكلمو؟ مطت شفايفها وقالت لي ما بعرف، قلت ليها اتكلم معاك؟ هزت راسها يعني لا قالت لي ما كنت عارفه بي جيتو قبيل الظهر مشيت اتوضأ شفتو طالع من الصالون ، قلت ليها طيب عرفتي كيف انو عارف، قالت لي اتكلم مع ابوي ورهام، قلت ليها اها؟ قالت لي علي لسه عايزني بعد ما خليتو وسمعتو كلام قاسي وقلت ليهو اني عرفت غيرو وارتبطت حتى بعد ما عرف اني غلطت مع زول تاني لسه عايزني يا جمان💔💔 قلت ليها انا عارفه علي بحبك قدر شنو وما مستغربه من تصرفو دا، قالت لي انا ما بقدر ، ما بقدر اظلمو معاي اي انا بحبو وشديد كمان حتى لو كان الفتره الاخيره دي معمي على قلبي لكن عرفت اني ما حبيت زول زي علي العملو معاي ماف زول بقدر يعملو لقيتو في اصعب ايام حياتي وقبل ما كنت اقول ليهو محتاجه ليك كنت بلقاهو جمبي، يمكن عشان ما عرفت قيمتو ربنا عاقبني وانا راضيه بقضاء ربنا وحاعيش باقي عمري دا كلو اتوب ليهو واترجى مغفرتو ورحمتو يمكن ابوي ما يغفر لي لكن ربنا رحمتو واسعه وباب توبتو ما بتقفل ومع اني يائسه لكن حافضل ادعي لاخر عمري انو ابوي يغفر لي ما عايزاهو يرجع يعاملني زي زمان بس كل العايزاهو يكون راضي عني، بدعي ربنا يرزق علي الزوجه البتستاهلو، انا لو وافقت حاعيش عمري كلو بلوم نفسي لأنو ما بستاهلني ولا انا بستاهل ظفرو .. بعد كلامها دا قلبي وجعني اكتر منو الكان متوقع في يوم وليله حياة اختي مرام وحياتنا كلنا تتقلب بالطريقه دي؟ ضيعت مستقبلها وحياتها المهنيه والزوجيه كلها بسبب الحيوان الاسمو ظافر بتمنى هسي اشوفو قدامي عشان اخنقو بديني الاتنين ديل كرهتو اكتر مما كنت بكرهو ومرات كنت بلوم نفسي واقول انا السبب في الحصل دا يمكن يومتها لو ما شافتني وخليتها تزعل كدا ما كان طلعت او لو ما كلمت ايهاب انو ظافر مسافر ما كان الشرطه مشت💔.. قلت ليها ما كنت فاكراك قويه كدا صدقيني انتي بتستاهلي كل الخير يا مرام شوفي علي دايرك بالرغم من انو عارف الحصل لو ما كان بحبك للدرجه دي ما كان جا من هناك وطلبك تاني من ابوي، قالت لي انا ما عايزه شي من الدنيا دي تاني غير ابوي يسامحني ادعي لي يا جمان.. المغرب لمن اذن صليت وشربت معاهم شاي المغرب قاعدين كدا ابوي دخل جوا عرفتو عايز يتكلم مع مرام في موضوع علي ، بعد مسافه سمعنا صوت كواريك ابوي جرينا كلنا جوا لقيناهو جاريها من شعرها وبكفت فيها ومرام بتبكي، علي جرا ابوي وانا حضنت مرام، ابوي قال ليها لشنو ما تقبلي بيهو انتي فيك العيب ولا هو لاقيه زول يجيك لحدي عندك وعارف البيك والعليك يقول داير يسترك؟؟ رفع سبابتو وقال ليها هوي يا مرام احسن ليك انا ماسك نفسي من شهرين لكن لو قعدتي تعملي في حركاتك دي بضبحك بي يدي دي وما بقول دي بتي ، عاين لي علي وقال ليهو بكرا دي نعقد ليك عليها ... قدر ما اتكلمنا مع ابوي ما نفع حتى علي اتكلم معاهو ، قعدت مع مرام لحدي ما هدت بعدين طلعت علي جا وراي قال لي الوقت اتأخر خليني اقدمك قلت ليهو ارح، مشينا قال لي مرام ليه ما راضيه؟ قلت ليهو بتعاقب في نفسها ، قال لي متأكده؟ عاينت ليهو وكشرت حواجبي قال لي يعني قصدي هي لسه بتحبني؟ قلت ليهو اصلا ما حبت غيرك الحيوان داك لعب عليها بس وقدر ياكل راسها، قال لي انا ما عايز اكون غاصبها على حاجه لكن زي ما عارفه لو ما عقدنا هسي بعدين بتحصل مشاكل في الاسم اصلا انا لو عارف من بدري ما كنت استنيت لحدي الان، قلت ليهو عايز تسجل الطفل باسمك؟ قال لي اي طبعاً.. وصلنا البيت قلت ليهو ادخل قال لي لالا سلمي على ايهاب ، لمن دخلت ايهاب قال لي لقيتيهم كيف ، قلت ليهو كويسين ، قال لي ومرام ، حكيت ليهو الحصل قال لي دا احسن شي ممكن يتعمل حالياً، تاني يوم من الصباح مشيت ليهم رهام وابوي وريناد كانو في العريشه سلمت وقعدت قلت ليهم علي وينو؟ ماف زول رد علي ابوي قام طلع برا رهام قالت لي سافر، قلت ليها سافر كيف يعني مش مفروض يعقدو الليله؟ قالت لي مافي عقد ، قلت ليها حاقعد اسحب منك الكلام كدا؟ وريني حصل شنو، قالت لي امس بالليل بعد رقدنا خالتك جميله اتصلت على ابوك قالت ليهو انتو عملتو لي ولدي شنو عشان يعرس بتكم الحامل ولو عرسها انا بفضحها قدام اهلنا كلهم ، قلت ليها خالتي قالت كدا؟؟ قالت لي والله ابوك كان فاتح السماعه الخارجيه لأنو تلفونو واطي ،الكلام دا لو ما سمعت باضاني منها ما كنت بصدق دي هي القالتو، ريناد قالت بري خالتي جميله دي ما كانت كدا عارفه انها اتغيرت لكن ما اتوقعتها تصل للدرجه دي وتقول كلام زي دا، قلت ليهم وعلي طوالي سافر؟ رهام قالت لي قال لي ابوك ما تشتغل بيها وامي بتتكلم ساي لكن ابوك ابى نهائي.. لو ما بعرف رهام كويس كان قلت بتكذب وخالتي مستحيل تقول كلام زي دا .... اول يوم في العيد في الفطور كان ضابحين ناس عم سمير والغدا ضبح اكرم ، تاني يوم كان سعيد واخر يوم نحن، شغلنا واكلنا كلو كان تحت سوزان كانت بتجي وقت الوجبه تقعد شويه وترجع نجوى يوم قالت لي حقو ولا نناديها للاكل زاتو تتحشي وتمشي ترقد في شقتها دي شنو الغياظه دي قلت ليها انتي ما عارفه سوزان ما توجعي قلبك ساي، العرس كان سادس يوم ومن تالت يوم المساء الناس بقت تجي اهلهم الفي البلد جو رابع يوم، قبل العرس بيوم جات حنانه رسمت لينا كلنا، اخر يومين ديل كنا اليوم كلو بنكون شغالين لحدي ما نرقد، طبعاً شقتنا اتملت وشقة ناس سعيد برضو كنت بمشي ببيت في بيتنا وبرجع الصباح، يوم العرس بيتا في شقتي بعد نجوى قالت لي لو مشيتي بيت ابوك بتحسسوا خليك معاهم، صحيت جهزت الشاي في الترمسه وخليتهم نايمين ونزلت لقيتهم بنظفو بعد نظفنا نجوى قالت لي بعد شويه كدا نطلع الكوفير، قلت ليها الحجه لو عرفت ما بتخلينا نحضر باقي العرس دا، قالت لي ما بتلاحظ ارح ساي،فعلا بعد الفطور مشينا الكوفير رنين لمن شافتني قالت لي وااي الحمدلله جيتي ما متوقعاك تجي ،قلت ليها هربنا عديل نحن اسكتي بس ،قالت لي خليتوني براي ريا كمان عندها عرس بت خالتها، قلت ليها اي كلمتني، قالت لي متوتره يا جمان ياخ حاسه اني اتسرعت،اتسرعت صح؟ ما كان اوافق طوالي اكرم كبير صح ؟ ضحكت وقلت ليها اسكتي نجوى ما تسمعك قال لي ياخ ما عارفه اسوي شنو، قلت ليها اهدي مافي شي ما تتوتري عشان اكرم ما يشوفك شينه ، قالت لي شينه؟ بالجد منظري شين؟ ضحكت بأعلى صوت ضربتني في كتفي وقالت لي غياظه... ما كانو عاملين حفله بس العزومه غدا ودلوكه وخلاص ، لمن طلعنا من الكوفير لقيت ايهاب واقف برا قلت ليهو الجابك شنو ؟ قال لي جيت ارجعك لكن شكلي حاغير رائي واسوقك مكان تاني، قلت ليهو وين؟ قال لي مكان ما يقدر يشوفك فيهو زول غيري ، قلت ليهو لا معليش انا ماشه العرس، قال لي رومانسيه بربع جنيه معاك ماف، عاين لي مسافه وقال لي انتي كويسه ؟ قلت ليهو اي ليه؟ قال لي عيونك واقعه، قلت ليهو عندي لفة راس بس ،فتح الباب وقال لي خلاص دا كمان عزر عشان ما تمشي العرس، مشيت بالباب التاني قلت ليهو مصر يعني؟ خلاص طيب بس انا عايزه اسوق، قال لي بعد الحركه دي كان تجامليني وتركبي، بعد ركبنا قال لي نجوى وينا قلت ليهو مشت مع بنات خال رنين.. وصلنا بعديهم بمسافع الباب كان فاتح لقيناهم شغالين بدقو في الدلوكه وبنات اهلهم يرقصو قلت ليهو يلا حدك هنا امشي صيوان الرجال ، قال لي ليه ، قلت ليهو حتدخل معاي صيوان الحريم؟ قال لي شايف في رجال واقفين وصوت غناء كدي احضر شويه وامشي ،بقيت بعاين ليهو ضحك وقال لي ما ماشي خلاص ما تصري لي كدا... دخلت ونجوى بقت تجر فيني عشان ارقص قلت ليها انتي عايزه اخوك يرجعني بيتنا، قالت لي تعالي ياخ كلنا بنات في بعضنا ، قلت ليها ما شايفه الرجال الواقفين ديل بعدين انا تعبانه وما فيني حيل ارقص خليني قاعده في كرسيي دا، قالت لي بايخه دي خلاص خليك قاعده.. كنت تعبانه شديد ما صدقت العرسان مشو لملمنا القدرنا عليهو وكنت ماشه شقتي معاي بنات من اهلهم اول ما وصلت باب السلم حسيت رجولي اتشلو والارض دي كلها بتلف بي.. ما وعيت الا وانا في المركز عاينت لقيت مركبين لي درب بعد دقيقتين ايهاب جا داخل لمن ما شافني صاحيه جا علي حاوط وشي بي يدو وباسني في راسي قلت ليهو حصل شنو ؟ ختا يدو على بطني وقال لي ولدنا من هسي ناوي يعذبك
يتبع....
