" كنّك وطن لا غبت عنّك تغربت"

البارت العاشر

وسع الشيخ رعد عيونه ولف عالباب وقفله وهو يلتفت على ملاذ بجديه: وش شهدتي!
ملاذ: أمس الليل طلعت انشر الملابس فالسطح قبل ما انام ولمحت راشد وأخوه عبيد يطلعون من البيت ويروحون بيت عمي ثنيان
هز الشيخ رعد راسه وهو يأشر لها تكمل : وما رجعو البيت إلا متأخر واليوم جلست فالبيت وما رحت الميدان مع البنات ولما طلعت اجمع الملابس لقيتهم الأثنين يتحرشون بوغدان الحاره والي ضربوهم كذا هم الوغدان يبه
أخذ الشيخ رعد نفس بعمق وزفر بأنفاسه على هيئة تنهيده طويله ، هز راسه بتفهم وهو يدف ملاذ عن الباب : متأكده من كل كلمه طلعت من حلقك؟
اكتفت ملاذ انها تهز راسها بإيجاب، مد الشبخ رعد يده وهو يدفها عن الباب بلطف: يصير خير خلاص ارجعي عند الحريم لحد يشوفك
مشت عنه وهي تعدل طرحتها وتتجه لمجلس الحريم من الجهه الثانيه

دخل الشيخ رعد الديوان بتعايبر اكثر جديه من الي سمعه وتوسط مكانه الديوان وهو يمرر عيونه على الجالسين وعلى عبيد وراشد الواقفين قدامه
نطق بحده وعيونه على كنان : الي دخل الأسطبل فالليل سوا فالخيول كلها هالسواه؟
ارتبكت كنان من نظرات عمها وكأنه ينتظرها تتكلم بلعت ريقها بخوف وبدأت تفرك كفوفها بتوتر ، نطق فيصل اول ما لاحظ توترها: كلهم يا شيخ ما خلا واحد صاحي
وسع عبيد عيونه بدهشه ونطق بألم وكلام غير مفهوم: " كذابيننن والله ما قصيت غير الأبيض!"
عقد الشيخ رعد عواجبه بعدم فهم: اشكت لا تتكلم ما ندري وش تقول " تنهد وهو يعدل بشته ورفع عيونه على راشد وعبيد ورفع نبرته : وانتوا وش سويتوا عشان يجيكم هالجلد كله؟
رفع راشد حواجبه بغباء: وانا لو ادري ليه ما جيتك !
نزل الشيخ رعد راسه وهو يعض باطن طرف شفته ونطق ببرود : اشوف كل واحد يرجع بيته ونقفل السالفه هنا كل واحد اخذ حقه
وسع راشد عيونه بدهشه وعبيد الي مو قادر ينطق زي الناس بسبب سنونه المتكسره وكنان ألي ابتسمت بأنتصار
رفع راشد نبرته بغضب: وش الي كل واحد اخذ حقه !! وانا وين حقي !
وقف الشيخ رعد وهو يمسك راشد من زلفه ويسحبه خارج الديوان ووراه محمد وعبيد ونطق وهو راص على أسنانه بعد ما قفل الباب وراه: احترم نفسك وشوف على مين ترفع صوتك!! ثانياا ادري من سوا سوات الخيول وما تكلمت قدام رجال الحاره عشان ما افشلكم!! والي جاكم اليوم أدب وعقاب من ربكم يوم انكم تتحرشون بوغدان الحاره وكل واحد فيكم كبر الباب وباقي تتصرفين نفس الوغدان!؟
مسك راشد أذنه بألم : من قال اني تحرشت فيهم!!! وقسما ب...
قاطعه الشيخ رعد وهو يدفه بقوه : اصص ولا كلمه لحد يسمعنا ويخلينا سيرة الديره كلها " ألتفت على محمد أخوه الي كان واقف وراه "تصرف مع عيالك ولا اتركهم لي وانا اتصرف معهم
محمد : يصير خير
دخل الشيخ رعد الديوان وهو يسحب أطراف بشته عشان يحافظ على هيبة حظوره : الي صار صار وإن شاء الله ما يتكرر مرتين وخلونا نقفل الموضوع هنا الدنيا عيد ما يصلح يروح اليوم بين المشاكل
أويس: أبشر يبه الي تبيه يصير
هزوا العيال راسهم بإيجاب وطلعوا من الديوان ومشوا طريق الوادي
...
عند البنات ألي تزينوا ولبسوا ملابسهم وبدأو يوزعوا حلويات وعيديات للأطفال
دخلت ملاذ ونزلت طرحتها على كتفها وجلست بين البنات
ليال: وين كنتي؟ فاتككك الي صار فالوادي
رفعت ملاذ حواجبها بأستغراب : وش صار بعد!
دلال: تخيلي في واحد دخل اسطبل الخيول حق عمك ثنيان امس وقص شعر الخيول
غمضت ملاذ عيونها بملل: تكفين جيبي شي جديد ترا كنت جنبكم يوم طلعت الخيول قدامنا
عقدت دلال حواجبها: وانا وش دراني متى رحتي من جنبنا طيب تدرين أن فجأه وقت السباق هاج خيل كنان ومحد قدر يسحبه منه إلا اخوك وفيصل اخو الغزلان!
وسعت ملاذ عيونها بدهشه: وش تقولين!! شفت كنان قبل شوي مافيه إلا العافيه!
العنود: مافيه إلا العافيه العيال مسكوه قبل لا يطيح عالأرض
ليال: تخيلي الخيل حقه هرب فالوادي ولما سألوه قال خلوه بيرجع من نفسه
دخلت عليهم ريم وهي تقاطعهم: عن وش تتكلم وش صار له كنان!
ابتسمت العنود عشان ما تخوف خالتها: ولا شي يا خاله كنا نتكلم عن سباق اليوم
هزت ريم راسها ومشت عنهم وجلست بين الحريم  التفتت غزلان وهي تضحك: مو مستوعبه ان وليد فاز والله ولا واحد بالميه حتى!
ملاذ: أما ذا العمود فاز!! ما استغرب رجوله طويله اكيد كان يساعد الخيل وهو يركض
رفعت العنود يدها وهي تضرب كتف ملاذ بخفه تحت ضحك البنات على كلامها: اصص قولي ما شاء الله لا يتكسرون رجوله
رفعت ملاذ كتوفها بعدم اهتمام: قلنا ماشاء الله بس ولو خليه يمكن يعتدل طوله
قامت مسك وهي تسحب الراديو من على الرف وتشغل الأغاني وهي تتمايل قدام البنات وتسحبهم : قووموو عيد خلونا نرقص شوي
قاموا البنات بحماس وهم يرقصون ويتمايلون بفساتينهم الجديده
تقدمت مسك بخفه وهي تسحب ملاذ ألي كانت جالسه وسرحانه وتجبرها تقوم ترقص معهم قامت ملاذ وهي تقلب عيونها بدون نفس
مسك بهمس: والله ان تقومين غصب مثل ما قومتيني امس الليل
قرصتها ملاذ بخفه وهي تأشر لها تسكت ولحد يسمعها
عقدت أصايل حواجبها وهي تسمع الازعاج والبنات فجأه قاموا يرقصون وتضيق عيونها على مسك: وش بلاها ذي قولوا لها تقعد فشلتنا!
ضحكت الهنوف وهي تمسح على كتفها: خليها عيد وفرحه خليهم يستانسون
تنهدت أصايل وهي تدعي لهم بالهدايه
...