" كنّك وطن لا غبت عنّك تغربت"

البارت التاسع والثلاثون " الخِتامْ "

قربت ليال من غرفة العنود اول ما شافت اخوها طالع منها وطلع من البيت وبدأت تدق الباب بخفه ونطقت بهمس: ادخل؟
فتحت العنود الباب ورفعت حاجبها: وش بلاك مستحيه!
ابتسمت ودخلت: ابد والله ما بيننا حياء بس ما كان ودي ادق الباب ومازن موجود، انتظرت الين راح وجيتك
بادلتها العنود الأبتسامه وجلست وطلعت مشطها وفكت جديلتها: كان بيطلع اليوم قبل العصر بس مدري وش اشغله فيه خالي حمد وتأخر للحين
توسعت ابتسامت ليال وهي تتأمل العنود: ما تدرين شكثر استوحش القعده فالبيت لوحدي بس الحين خلاص دام انك معي بتونس معك!
ضحكت العنود بسخريه: زين وإذا تزوجتي بقعد وقتها لوحدي!!
ادركت ليال كلام العنود ونطقت بحزن: يوهه توني افكر فالموضوع!! ما عليك ما بتزوج ألين تخلفين وتجيبين من يأنسك فالبيت ومازن وابوي مشغولين!
هزت العنود راسها بتفهم: معليه لاحقين عالوغدان خلينا ننبسط كذا احسن بعدين نفكر بالموضوع!
قوست ليال حواجبها: لا والله اني اشتاق لحسهم! تخليلي شكثر اموتتت بأوس وانبسط فيه شلون لو كان ولد اخوي!
اعتدلت العنود بجلستها: لأنك وحيده ولا ما كنتي حبيتيه " رجعت شعرها على ورا وربطته وقامت" وش رايك نسوي كيكه؟
زمت ليال شفتها وهي تحاول تخفي حماسها المفضوح: من زمان مشتهيته!
ابتسمت العنود واشرت لها تلحقها: بسوي كيكه عمرك ما ذقتي نفسها!
قامت ليال وراها بسرعه ونطقت وهي تترجاها: تكفين نفس الي سويتيها زمان!
وقفت العنود مكانها وهي تحاول تتذكر وش تقصد: أي كيكه!
رفعت ليال يديها قدم العنود وهي تشرح لها طعم الكيكه وشكلها ونطقت بحماس: كان فيها لوز إن ما خاب ضني!!
هزت العنود راسها بتفهم اول ما تذكرت وش تقصد: زين تعالي وراي
دخلت العنود المطبخ وقلبت عيونها تدور مكونات الكيكه الي طلبتها ليال، وبحكم ان الأيام الي قبل كانت ليال المسؤوله عن الأكل والعنود تساعدها على خفيف بحكم انها عروس ولاحقه عالكرف، التفتت العنود ونطقت بعد ما تعبت وهي تتلفت حولها: وين البيض!
وزعت ليال انظارها حول المطبخ : ايه صح خلص اليوم الصبح! كنت ناويه اروح لرحمه تجيب لي بيضتين ونسيت!
رفعت العنود طرف حاجبها: زين والسمن؟
ابتسمت ليال وقربت من علبة السمن وفتحتها لكن المفاجئه انها كانت فاضيه تماما!
تنهدت العنود ونطقت: لو جاك خالي حمد وقال مشتهي بيض على سمنه او اي شي وش بتسوين!
زمت ليال شفتها واكتفت بالصمت وكملت العنود: مره ثانيه قولي لهم يجيبون الناقص قبل لا يخلص حتى فهمتي!
هزت ليال راسها بتفهم ونطقت العنود وعيونها على العلب الي كانت فالرف: واللوز طيب!
فهمت العنود من نظرات ليال ان حتى اللوز مو موجود والي هو اساس الكيكه! ضحكت العنود بسخريه وطلعت من المطبخ وليال وراها: شلون لك وجه تشتهينها وحتى اللوز مو متوفر!
ليال: معليه نروح لدكان الي جنب البيت ونشتري ونرجع!
دخلت العنود الديوان وجلست تتأمل بحكم انه مخصص لرجال ومحد من حريم الحاره يدخلونه: خلاص بكلم مازن يجيب الأغراض ومن بكره بطبخ معك وبسوي الكيكه الي بخاطرك إن شاء الله
رفعت ليال حاجبه ونطقت برفض: لا والله وش هالحكي! اقدر اسوي كل شي انتي عروس ما ينفع تدخلين المطبخ!
التفتت العنود لها: ادري انك شاطره بس ما بقعد طول عمري عروس! لاعد اسمع منك هالكلمه! الحين احنا مع بعض نساعد بعض فاهمه؟ تعبت من القعده فزاوية المطبخ خلاص ودي اتحرك شوي!
رفعت ليال يدينها بأستسلام: انتي ادرى! عاد يا ويلك تسكتين إذا هزؤني!
ضحكت العنود وهزت راسها بتفهم: ماهي منك لله يعني! وانا احسبها حنيه منك!
ضحكت ليال وقربت جنب العنود الي جلست فطرف الديوان: لا والله بس تدرين لسان الحريم ما توقف!
العنود: إذا سكتي محد بيدري!
كانت ليال مبسوطه بوجود العنود معها بحكم انها بعد ما بلغت في بيت ابو فيصل مع خالتها مزنه رجعت بيت ابوها مع اخوها ولا عاد طلعت منه إلا إذا كان عند اهلها وجماعتها مناسبات! كان الشيخ حمد حريص عليها جدا ويحبها ويعزها بمعزت وحب أمها الي توفت وهي باقي صغيره!
.....
في بيت الشيخ رعد والي كان مشحون من بعد ما طلعت منه مسك وكأنها اخذت وراها الهدوء والراحه فهالبيت! طلعت الهنوف من غرفتها اول ما سمعت خطوات اويس داخل البيت ونطقت قبل لا يهرب منها ويدخل غرفته: جهز نفسك بكره بتروح عند عمك محمد مع ابوك
التفت أويس لأمه ونطق بعدم فهم: بيخليني اخذها؟!
زمت الهنوف شفتها بحنق واضح عليها: وانا وش دراني! بتروح تعتذر له وتبوس راسه وتطلب منه السماح وقتها هو يقرر وش يسوي
اعتدل اويس بوقفته ونطق بضيق واضح على صوته: عمي حمد يدري اننا بنجيه؟
لفت عنه وهي ترد عليه: مدري تفاهم مع ابوك وقتها يوم تمسكون الخط انا ما ودي ادخل بهالسالفه خلوني في حالي!
التفت اويس على غرفته بعد ما قفت عنه أمه ودخل بخطوات ثقيله وكأن اوتار سيقانه اسياخ حديد! كانت انفاسه ثقيلهه تسمح لأي أحد يمر من جنبه يسمعها بكل وضوح وكأنه متربع داخل صدره! قربت ملاذ من الغرفه أول ما دخل أويس وقفل الباب وراه ونطقت بتردد: عادي ادخل؟
ميلت راسها داخل الغرفه مندون ما تسمع له حس ونطقت بتردد أكبر وهي تشوفه جالس في نفس المكان الي كانت تنام فيه مسك: أدخل؟
التفت لها أويس الي كان السواد محاوط عيونه تدل على السهر والأرق الي تمكن منه، تنهد بخفه والي فهمتها ملاذ انه سمح لها تدخل له!
دخلت بربكه واضحه على مشيتها ووقفت مكانها بخوف أول ما نطق أويس: شدعوه ما أكل أحد ترا!
زمت ملاذ شفتها وجلست قباله ونطقت وهي تمثل الثقه: ليه من قال انك تاكل بني أدم اساسا!" سكتت لثواني وكأنها نست وش الي خلاها تجيه ونطقت بعدها بثواني" اسمع ودي اكلمك بموضوع!
رفع لها أنظاره ونطقت بربكه: اسمع ادري انك متضايق ولا ودك تتكلم مع أحد بس الحين وجبت أني افتح فمي واتناقش معك عشان كذا امسك اعصابك ولا تسوي شي عشان ما اسكت واطلع برا واخليك على حالك تسبح في افكارك!
نطق أويس بصوت مبحوح: قولي!
اعتدلت ملاذ بجلستها والي كانت تسمح لها بالهروب في حال شافت أي ردت فعل من أخوها ونطقت: انت قليل أدب!
رفع أويس حاجبه ونطق بنفس النبره: هذي بدايتها!!
مدت ملاذ يدها وهي تحاول تسكته وكملت: ليه ما سمعت منها أول يوم؟ ليه تأثرت بكلام عمي ثنيان فيوم عرسك وجيت تطلع حرتك عليها يومها؟
زفر اويس أنفاسه ونطق قبل لا تكمل وتسهب في كلامها: الحين شايفه اني ناقص منك هالكلمتين! يكفي أمي الي رايحه راده علي وأبوي الي مو راضي يطالع في وجهي حتى!
هزت ملاذ راسها بتفهم: عشان كذا جيت اتكلم معك! الحين عندك فرصه تروح وتحاول تصلح غلطتك! وربي ان مسك عسل وحليله! ما تدري شلون كانت خايفه أول يوم طبت فيه بيتنا وشلون كانت ترجف من كل شعره فيها وتبكي بسبب البليه خالتها! وانا الثوره طمنتها وقلت لها أويس حليل وطيب ويدري الصح من الغلط وبيتفهم الي صار لك! ما دريت انك بتصدق كلام عمي ثنيان والي ما ناخذ منه حق ولا بطال من زمان وهذاك الخبر بالذات صدقته!
نزل أويس المفرش الي كان حاضنه بين يدينه ونطق والدموع تزاحم عيونه: يعني انا كرجال متوقعه لما اسمع هالشي بجلس طبيعي! تصرفي طبيعي فهذاك اليوم بحكم اني رجال وعندي غيره وما اقدر امسك نفسي!
مسكت ملاذ راسها ونطقت بقلة حيله: هذا الي جاب فيك العيد!! لو تشيل هالفكره من راسك كنا بخير ومرتاحين! ليه انت بهيمه عشان ما تقدر تتحكم بمشاعرك وغرائزك؟ انت بلا عقل يعني تتحكم فيك كلمه جايه وكلمه رايحه؟ وين الرجوله الي تتكلم عنها ذي خلها تنفعك الحين! ولا شاطريت تبررون افعالكم بهالكلمتين!!! زين يوم دريت انك مخطي ونويت تصلح ليه ما اصلحت!!