Chapter 93 : ကောလဟာလများပြန်စတင်ခြင်း
ချောင်ဝေ့မင်သည် သူမအား ညွှန်ကြားချက်များပေး၍ ထွက်သွားပြီးနောက် ချောင်ဟုန်ယဲ့၏ စိတ်သည် အတော်လေး ကသိကအောက် ဖြစ်နေသည်။
သူမသည် မူလက ဤအပတ်တွင် သူမ၏ သူငယ်ချင်းများနှင့် နွေဦးရာသီအပန်းဖြေခရီးတစ်ခု သွားရန် စီစဥ်ထားခဲ့၏။ အဆုံး၌ သူမ၏ အားလပ်ချိန်နှင့် ပျော်စရာအချိန်လေးများသည် ကျင်းယွင်ကျောင်းကြောင့် ပျက်စီးသွားရသည်။ အထူးသဖြင့် ကျင်းယွင်ကျောင်းက ခရားအစုတ်တစ်လုံးအတွက် ယွမ်နှစ်သိန်းသုံးသွားကြောင်း သတိရသောအခါ သူမ စိတ်ဓါတ်ကျသွား၏။
"ဟုန်ယဲ့၊ နင့်ကြည့်ရတာ ဘာလို့ အရမ်းစိတ်ညစ်နေတာလဲ။ အ်ိမ်မှာ တစ်ခုခုများ ဖြစ်လို့လား"
ချောင်ဟုန်ယဲ့ ကျောင်းသို့ပြန်လာပြီးနောက် ကြည့်ရသည်မှာ စိတ်ဓါတ်ကျနေပုံပေါက်နေသည်။ သူမ၏ မကြည်သာသော အမူအရာက ဘေးမှ လူများ၏ အာရုံကို ဆွဲဆောင်နေ၏။
ချောင်ဟုန်ယဲ့က နှုတ်ခမ်းကို ဖိကိုက်ထားပြီး ခေါင်းယမ်းပြလိုက်၏။ သူမ၏ စကားပြောချင်စိတ်မရှိခြင်းက ဘေးမှကျောင်းသားများအား သူမကို ပို၍ကူညီချင်စိတ်ပေါက်စေသည်။
"ကျင်းယွင်ကျောင်းက နင့်အဖေကို တစ်ခုခုများ ပြောလိုက်လို့လား"
တစ်ယောက်က မေးလိုက်၏။
ချောင်ဟုန်ယဲ့၏ အပေါင်းအသင်းများအားလုံးက ကျင်းယွင်ကျောင်းအား သပိတ်လွယ်ငှက်၏ အသိုက်ကို အပိုင်စီးသည့် ချိုးငှက်အဖြစ်သိကြ၏။ သူတို့က သူမသည် အကြံကြီးသော မိန်းကလေးတစ်ယောက်ဖြစ်ပြီး အိမ်၌ ချောင်ဟုန်ယဲ့အား မကြာခဏ အနိုင်ကျင့်တတ်သည် ဟူ၍လည်း သိထားကြသည်။ သို့ရာတွင် ချောင်ဟုန်ယဲ့သည် ကြင်နာတတ်၍ သည်းခံတတ်ပြီး အရာအားလုံးကို ရင်ထဲတွင်သာ မျိုသိပ်ထားတတ်၏။ အကယ်၍ ကျင်းယွင်ကျောင်းသာ ချောင်ဟုန်ယဲ့ကို စိတ်ထိခိုက်အောင် မလုပ်ပါက ကျောင်း၏ အဆင့်တစ် ဖြစ်လာလိမ့်မည်လားဆိုသည်ကို မည်သူသိနိုင်မည်နည်း။
(T/N : သပိတ်လွယ်ငှက်၏အသိုက်ကို အပိုင်စီးသည့် ချိုးငှက်ဆိုတာ သူတစ်ပါးပိုင်တဲ့ပစ္စည်းကို ကိုယ့်ဟာမဟုတ်ဘဲ အတင်းအကြပ် မောင်ပိုင်စီးတာကို ပြောတာပါ။)
