မျောလွင့်နေသော ပြာမှုန်များ

Chapter 15.2

Chapter 15.2

လက်ထပ်ပွဲအတွက် ပြင်ဆင်နေသည့်အချိန်အတွင်း ယီဟွေ့ Sမြို့နှင့်မြို့တော််ကို မကြာခဏဆိုသလို အသွားအပြန်လုပ်ခဲ့ရသည်။ ယီဟွေ့ လေယာဉ်ကွင်းသို့ သွားသည့်လမ်းတွင် ထိုချားရဟတ်ကို အကြိမ်ရေများများ တွေ့ခဲ့ရခြင်းဖြစ်သည်။

သူ စီးချင်သဖြင့် သူ၏အစ်ကိုနှင့်မရီးကိုခေါ်သွားရန် ပူဆာခဲ့‌လေသည်။ မရီးဖြစ်သူမှာ သဘောတူမည်ပြုသော်လည်း အစ်ကိုကြီး၏ ပေါ့ပေါ့ပါးပါးစကားများဖြင့် ပယ်ချခံလိုက်ရသည် " ကျိုးကျင်ဟမ့်ကိုပဲ ခေါ်သွားခိုင်းလိုက်ပါလေ…"

သူ၏ခင်ပွန်းလောင်းမှာ အလွန်အလုပ်များနေပြီး ထိုအကြောင်းပြောမည်မဟုတ်သည်ကို ယီဟွေ့သိနေခဲ့သည်။ မမျှော်လင့်ပါဘဲ ထိုနေ့လည်ခင်း ဘုရားကျောင်းမှထွက်လာချိန်တွငခ ကျိုးကျင်ဟမ့် ရုတ်တရက် နေကာမျက်မှန်ကို ချွတ်ကာ သူ့ကိုကြည့်၍ မေးလာခဲ့သည် " ရဟတ်သွားစီးချင်လား…"

ယီဟွေ့ ခေါင်းငြိမ့်ပြလိုက်မိသည်။

ကျိုးကျင်ဟမ့် ရှေ့သို့တိုးကာ ကားတံခါးဖွင့်၍ သူ့ကိုတက်ရန်ပြောလိုက်ပြီး " ဘာစောင့်နေတာလဲ သွားမယ်လေ…"

သူ့အစ်ကိုထံမှ အကြံပေးသဖြင့် ကျိုးကျင်ဟမ့်ဤသို့ ပြောလာသည်ကို သူသိနေသည့်တိုင် ယီဟွေ့အလွန်စိတ်လှုပ်ရှားနေဆဲပင်။ သွားနေသည့်လမ်းတစ်လျှောက်တွင် သူ ကျိုးကျင်ဟမ့်၏အခြေအနေကိုသာ အကဲခတ်နေမိသည်။ ကျိုးကျင်ဟမ့် ထိုသို့ ဝေးဝေးသွားရသည်ကို သဘောမကျနေမလား၊ မပျော်ရွှင်နေမလား သို့မဟုတ် မသွားချင်ဘူးဟုပြောလာလေးမလားကို သူကြောက်နေမိသည်။

၎င်းမှာ သူတို့ကစားကွင်းထဲသို့ဝင်ကာ လက်မှတ်မဝယ်ခင်အထိ ဖြစ်နေခဲ့ပြီး ရဟတ်စီးရန် တန်းစီနေသည့်အချိန်မှပင် ကျိုးကျင်ဟမ့်ထွက်မပြေးမည်မှာ သေချာသွားသည့်အတွက် ယီဟွေ့ စိတ်ကိုလျှော့ချလိုက်ရသည်။

အားလပ်ရက်ဖြစ်နေသဖြင့် တန်းစီနေသည့်လူများပြည့်ကျပ်နေကာ မီးလင်းလာသည်နှင့် လူများစုံပြုံတိုးလာကြသည်။ အရှေ့သို့အတင်းတိုးနေကြသူများမှာ ဘေးသို့ငေးနေသည့်ယီဟွေ့ကို တွန်းမိသွားသဖြင့် သူအရှေ့သို့ ယိုင်ကျသွားကာ ချော်လဲမလိုဖြစ်သွားလေသည်။ ဘေးတွင်ရှိသော ကျိုးကျင်ဟမ့်မှသာ အချိန်မီ ဖမ်းမဆွဲထားပေးပါက ယီဟွေ့ပြုတ်ကျသွားမည်မှာ အသေအချာပင်။