لاڤندر .

5

لاڤـندر ..
لزهـراء عـلي .
-----------
- تفاعلو .

هبه : حظرنه الاماعين اني و أيلين على الكاونتر و من كملنه باوعت لدشداشتي لگيتها نصها تراب و ماي ، گلت لأيلين راح اصعد ابدلها قبل لٱ يجن عماتي و صعدت ، دخلت لغرفتي فتحت كنتوري و ظليت حايره شلبس ، بالنهايه صفيت على ثوب بنفسجي مخصر و فتحته سبعه و منها لجوه نازل تطريز فضي اشترته امي اليه بالعيد ، ولبست شال اسود وياها و نزلت ..

گعدت يم بيبي بالصاله و شويه و اجن عماتي و نسوان عمامي سلمت عليهن و رحنه احنه البنات گعدنه بالصاله الثانيه نسولف لمن صبو العشه ، رجعنه للصاله و گعدنه نتعشه و مثل كل مَـرّھٌ احنه البنات ناكل و نسولف و نضحك ..

كملنه و گمت شلت الاماعين وي ام سعد و رحت للمطبخ شلت الجاي و قدمته للنسوان و من كملنه رجعت الاماعين خليتهن على الكاونتر و ردت ارجع للصاله و وگفني امير اللازمله ماعون تمن و علي مرگ و لحم ..

امير : هباوي بشاربج اني تضميلياه بغرفتي هذا .

هبه : لٱ تگلي هذا تاكله بـ12 بليل !.

امير : لٱ شني السالفه ما اكله بس اخذ وياه صور و ارجعه .

هبه : يمه شياكله الك هذا ؟، جيبه خلي اولي .

امير : و سدي باب الغرفه وراج .

هبه : خوشَ .

اخذت الماعون و صعدت لفوگ صعدته اغني ..
هبه : حبيب امك متقبل من احاجيك روحي معلگه بيك ، و حبيب امك متقبل من احاجيك ..

و وصلت غرفة امير فتحت الباب و دخلت خليته الماعون على المرايه و سديت الباب و طلعت .. نزلت و بنص الدرج ظليت واگفه ، دخلو الزلم و وياها واحد اول مَـرّھٌ اشوفه ، عرفته أيَهم بس شنو من أيَهم ، صاير يموت شعره طويل شويه و عيونه سود حاده و حواجبه لايگات عليهن و الخشم !، الخشم مرفوع و ما بي عيب واحد و شاربه و لحيته الخفاف و حلگه ! حلگه ما ينوصف صدگ ظليت صافنه .. و انوب الجسم شنو ، مثل ضرغام كله عضلات و ضخم و طويل ..

من وعيت على روحي لطمت روحي راجدي گلت شمالني خفيفه هل الگد فصلت الرجال تفصال .. و هو سلم على نسوان عمي و بناتهم من بعيد و هو مدنگ راسه و هل الحركه عجبتي .. نزلت و گعدت يم البنات الي ماخذات گعده كامله الهن ، ظلو يحجون و لييش تأخر أيَهم يلا اجه و من هاي السوالف ..

شويه و باوعت للساعه لگيتها بـ10 باوعت للوجوه و انسحبت بهدوء و صعدت لغرفتي .. اول ما دخلت نزعت الدشداشه و سبحت و طلعت گبل بس بدلت و نمت ..

گعدت الصبح و اول ما فتحت عيوني شفت مكان أيلين الفارغ شويه و گمت باوعت للساعه لكيتها بـ6:50 گمت غسلت و لبست دشداشه لونها بنفسجي غامق و بيها بس من فتحت الصدر تطريز ذهبي ينتهي بسلاسل ، و هيه مخصره على الجسم ، و لبست شالي شمرته شلون ما جان و نزلت