لاڤندر .

41

لاڤـندر ..
لزهـراء عـلي .
———————————
- تفاعلو .

هـبه ..

ما مرتاحه خايفه لا جدي متخربط لو بي شي اني اصلًا ما ردت اجي بس أيناس لحت عليه ، بألف يا علي اجه امير طلعنه بسرعه صعدت يمه و گلت ..

هـبه : امير الله عليك شكو جدي بي شي ؟

أمير : لا مابي شي .

هـبه : جاا شنو هاي الهوسه مساع خابرت أيَهم يمه هوسه .

أمير : عدنه گعده غير .

نرجس : ان شاء الله خير .

وصلنه للبيت و جان هوسه سيارات هـواي و اصوات عاليه طالعه من الديوان ، ديور السيارة و دخلنه من الباب الخلفي دخلت اركض لگيت بيبيتي واگفه تباوع من الشباك و تسبح و عمتي يمها ..

هـبه : عمه خيركم شصاير ؟

أم أيَهم : اجيتي ، گعده بالديوان مبينه موش هينه و جدج خاف يتخربط وضعه من يسمع الهوسه .

هـبه : هسه جدي وين بغرفته ؟

أم أيَهم : أي جاا وين .

هـبه : خير ان شاء الله .

صعدت بسرعه مسحت وجهي و غيرت ملابسي و نزلت اركض من سمعت الاصوات تعالت ، بعدني اركض على الدرج و راح حيلي من سمعت صوت تلث طلقات بالعراضه مالتنه ..

سحلت روحي سحل رجليه ماتن اريد بس اخلص الدرج صار شطوله ، انعاد بذاكرتي مشهد عمي مُسلم من طلعوه من الديوان دمه بـطوله و راحت روحي بس لا واحد من اهلي تصوب ،

وصلت يمهن ارجف بيبيتي گاعده على التخم دايخه و عمتي تفرك بيديها و تباوع للشباك حايره بيمن تحير !،
ركضت للشباك گوه وخرت البرده و باوعت جانوا كُلهم طالعين من الديوان بس محد متصوب و أيَهم جان بنصهم يحجي وي رجال بعصبيه ..

و الرجال هذا رفع أيده و الزلم كلهم انسحبوا لسيارتهم و طلعوا من البيت ، أيَهم جان عصبي حيل و ضَرغام يحجي وي عمي بحرگه و دخلوا كلهم للديوان ،

گعدت على للتخم تعبانه اباوع لـبيبيتي استقر وضعها و جابتلها عمتي ماي شربت و دخلت لـجدي تشوفه ، و وره هاي الهوسه كلها طلعت امي من الغرفة تحجي وي خالتي بالموبايلي ولا يمها السالفه ..

هزيت أيدي و گمت بديت اطبخ العـشا و عمتي وياي لمن أذن الأذان دخلوا كُلهم أيَهم مثل كل مَـره يروح بـوجهه لغرفة جدي يظل يمه يوكله الشوربه لمن يكملها ..