لاڤندر .

17

لاڤـندر ..
لزهـراء عـلي .
-----------
- تفاعلو .

أيلين : ذيج الفتره جانت حيل صعبه ، هدت حيلنه ، عمتي فاطمه ماتت من الحرگة و صبحت جامده ، و جدي من عرف بگتل بيداء و السبب هان عمي و فلاح بنص الديوانية و ضرب كرار لان جان هامل بيداء و المفروض ما يخليها تمشي وي عمتي اصلاً ..

و صارت الفاتحه ، راحن عمتي ام فلاح و امي وي عمتي فاطمه للمغيسل و جابوها باتت بالبيت و لسه اتذكر ذيج الليلة ، نمنه كلنه احنه النسوان يمها بالچادر برره وهي نايمه بنصنه بتابوتها ، و كلها نامت و ما نمت ولا غمضت عين ، عماتي و نسوان عمامي و بناتهم كلهن جانن يبجن بس مو صدگ ، و جانت مروه حيل وحيده ، جنت وياها والله ما تركتها بس جانت ساكته وما بجت ابدا و بس تردد " بردانه "..

و الصبح شالوها بالـ5 و اخذوها للنجف ، و اجت الملالي و انصب الچادر الثاني و الثالث و الچدوره اشتعلت نيرانها ، اجو بـ5 العصر و اجت الزلم كلها عگل و شيوخ ، انترست الـ3 چوادر و النسوان اخذت البيت ، جانت فاتحه ضخمه حيل و تعبنه بيها لان جانت بنفس الوكت الزلم تجي تشوف جدي و تجي للفاتحه ،

وره اسبوعين خفت شويه و صار محد يجي ، تعبت حيل و نفسيتي تأذت ، بحيث صرت لٱ اكل ولا اشرب و مگضيتها بس نوم ، الكل لاحظ و سئلوا بس جنت اگللهم مالي خلگ ،

اجتني امي اليوم العصر و اني بغرفتي گاعده و اباوع على الشباك گعدت يمي و گالت ..

ام أيَهم : يُمه شرايج ترحين وياي لخوالج هاا ؟، هناك تشوفين بنات خالج و تضحكن و تسولفن و تتونسن .

أيلين : ما بيه حيل .

انفتح الباب و باوعتله شفت أيَهم دخل و بيده علاگه جبيره حطها يمي و گعد و گال ..

أيَهم : شو انتِ جنج تدللين ؟

أيلين : شجبت ؟

اخذت العلاگه و فتحتها جان جايب حلويات و كرزات و عصاير ظليت اگلب بيهن سمعته يگول ..

أيَهم : الج انتِ و هبه .

أيلين : شعليه بـهبه روح جيبلها وحدها .

أيَهم : علاگه بـخمسة و عشرين الف وحدج تاكليها .

أيلين : هاكياها ما اريد اطيهن الـهبه .

أيَهم : شنو صايره حساسه ؟

ام أيَهم : هسه شگلتي ؟

أيلين : ما اروح .

أيَهم : وين ؟

أم أيَهم : گتلها روحي وياي لخوالج جـم يوم تغير نفسيتها شويه .

أيَهم : اسكتي اختي مالنه خلگ فلاح يظل يعوي .

ام أيَهم : و عليمن يعوي يُمه ؟