لاڤندر .

31

لاڤـندر ..
لزهـراء عـلي .
-----------
- تفاعلو .

أيلين : درت وجهي و باوعت على الشباك و شفت سيارة چسَر عابره عليها بـرادو من السايد الثاني و جايه بـجهة چسَر !، مفلشه الباب و عافسته لـجوه و جام السيارة الأمامي كُله متكسر و شباك چسَر متكسر عليه !

صار هدوء بـعقلي و تفكيري و ڪُلشي ما اسمع رُغم ضجة صريخ النسوان العالي .. عيوني فاتحتهن عـلى كبرهن و صافنه على السياره و شصار بيها ، نشلت اطرافي اريد اتحرك و اگوم اريد اصيح اريد انزل ڪُلشي ما گدرت اسوي ..

بس من شفت جَـسور و الولد الـتموا على السياره و يحاولون يطلعوهم فزيت ، دفعت جُمانه و وگفت اريد انزل بس لزمني البنات و احاول افلت منهن ما اگدر المُكان ضيگ حيل ظليت بَـس اصيح ..

أيلين : عوووفنيي وخـرررن عني خل اشووفه ، چسَرررررر لٱاا لااا تـروح ، ولجن وخـرن عـني خل وخـررن .

أيناس : ولج يروحي وين تنزلين ما يرضون كلها زلم .

ام أيَهم : يُمه اسم الله الرحمن بنيتي لٱ تفاولين عليه عايش عايش بأذن الله .

اجت اُمي حضنتني و هي تعدل شالي على راسي ، لزمت أديها و گلتلها ..

أيلين : يُـمه راح يـروح مني بَـس هدني خل اشوفه ابوس ايدچ .

ام چسَر : يـعلي يابو اليتامه احظرن و خلصلي وليدي افزعلي يـبو المـروه ، ولج عمه راح بَـچري رااحح .

الشيخه سَـميره : ما يرووح ماا يروح چسَر گـوي ما يطيح بساع .

باوعت من الشباك طلعوهم كُـلهم بَـس هـوه بقى لازگ بابه ، لطمت على خدي و دفعتهن عـني و من وصلت للـباب گـوه و هـنه يسحلن بيه وگعت بـالدرجات و هـدني ، وانـه اعدل بـروحي اريد اوگف التمن عليه و عمتي گومتني و گالت بـصوت حاد ..

ام چسَر : گومي ، گومي اعدلي شالچ خن نطلع نشوفه .

وگفتني و لفيت شالي و هي نزلت قبلي فتحت الباب و نزلت وراها ، جانت هـواي ناس ملتمه على السيارتين ، شفت امير و ضرغام شايلين أيَهم الـوجهه كُـله دم ، هو جان گاعد وره چسَر و الگزاز كله جاي عليه ، و جدي و عمي ابو چسَر ما بيهم شي و صاحين بس مهبوطين ..

و الشيخ عَـناد فاقد لان جايته كزازه من بلور السيارة بـصدره و راسه مضروب ، و چسَر !

روحي تلوچ عليه ما اگدر اشوفه ولا اگدر اطر فوچ الزلم و اطبله و ظاله اردد " احظرنه يـبو الحسنين " و الوچ ادير عيوني مـنا و مـنا بلكت اشوفه ..

لـمن اجت الشرطه و جابوا وياهُم سيارة اسعاف و عُـمال فـتحوا الباب بالكوسره و طلعوه المُسعفين ، ركضتله بسرعه و امشي وياها اباوعله شضال بي !