عند بدريه
كانت تسوي القهوه ولفت على صوت رسالة فتحت جوالها وشافت رائد مرسل لها ارتجفت وهي تقرا الكلام
" قدرتي تهربين مع حمد بس ترا
مو كل هروب يعني النجاة !! "
حذفت جوالها بالارض بغضب وانكسر رجعت على ورا بخوف وعيونها امتلت دموع
دخل عبدالله بسرعه : امي شفيـ..
ناظرها وانصدم ولف شاف جوالها منكسر وتبكي
مسك يدها : بدريه شفيك
بكت زياده وهي تغطي وجهها
عبدالله وهو يهديها : بدريه هدي !
بكت وهي تناظر جوالها وترجف
عبدالله : عشان جوالك انكسر ؟ اجيب لك جديد معليك
بكت اكثر : لا لا معاد ابييييه اكره رائد اكرهه يارب يموتت
عصب عبدالله : مرسل لك شي؟
هزت راسها وهي تبكي وعلمته وش كاتب لها
تنهد بضيق ومسك يدها : قومي ارتاحي مايجيك منه شي وانا ولد ابوي
ركبوا البنات مع العيال وهم متحمسين
واخذو بخاخات ثلج
ليال وهي عند باب السياره : اقدر هنا اسيطر على الكل
ترف وهي عند الباب الثاني : متحمسسهه
نوف وهي بالوسط : انا بس بصور انتوا العبوا بكيفكم
الهنوف وهي راكبه بسيارة ناصر ومعها عبير ومتحمسين مره
ناصر وهو يناظر حمد بجنبه : ابتلشنا بهم
ضحك حمد وهو يناظر سيارة سلمان : لازم ننتبه للورعان ذول
ضحك ناصر ومشوا كلهم
عند بدريه وسلمى
جالسين برا وحاطين الفرشه يتقهوون
سلمى وهي تشوف تصوير البنات : شوفي شوفي
ضحكت بدريه : مو صاحيين
قفلت جوالها سلمى وناظرت لـ بدريه : حللتي؟
بدريه بخوف : لا للحين
سلمى : وش تنتظرين طيب ليكون حامل وانتي ماتدرين
بدريه : مدري ياسلمى خاييفه اكون حامل وابتلش
وخاصة لقيته مرسل لي الصبح
سلمى : ايشش وش قايل ؟
بدريه : يقول قدرتي تهربين مع حمد بس ترا
مو كل هروب يعني النجاة
سلمى بعصبيه : شفيه ذا كلب!
سكتت بدريه وهي تناظر فنجالها
سلمى : معليك منه مراح يسوي لك شي
بدريه : انا مو هامني هو كثر ماهمني حمد خايفه عليه منهم
سلمى : معليك حمد ذكي ويعرف لهم صدقيني مايقدرون عليه
عند البنات بسيارة سلمان
ليال وهي تفتح الدريشه وتصور : هاييي
جاء ولد عندها وعطاها حلاو ، ابتسمت وممداها تفرح الا ويرش عليها بخاخ على طول صرخت : ياكلبب
سلمان وهو يلف لها : تستاهلين
ترف وهي بالجهه الثانيه مدت يدها بدلع : عطوني حلاااوو
جوها ولدين وعطوها كميه كبيره من الحلويات
ويتغزلون وهي تضحك ، سكر دريشتها سلمان
ترف بعصبيه : لييه تقفلها
سلمان : مزاج
سكتت وهي تناظرهم ، تقدم واحد وهو يدق الباب حقها وياشر لها تفتح فتحت الباب ورش عليها بخاخ وصرخت : عينييي
لفت نوف : شفيك
وقف السياره سلمان ولف لها : شصاير؟
ترف وهي حاطه يدها على عينها وتبكي : عيني توجعني
الولد : والله اني اسف
ناظره سلمان بغضب وراح يركض
نزل سلمان من السياره وجاء عند بابها وطلعها ، اخذ علبة المويا : افتحي عينك
ترف وهي مغمضه : لااا مابي
كانت ليال بعالم ثاني وهي تتصور مع بنات وتاخذ سناباتهم ، نزلت من السياره وهي تركب مع شلة بنات
البنت ١ : ياحظظنااا شسمك؟
ليال بضحك: اسمي ليال وانتي
البنت١ : ساميا
ليال وهي تناظر للبنات بجنبها : وانتوا ؟
ساميا بتوتر : مايتكلمون بس بالاشاره
ليال : اهاا ياعمريي
نوف وهي تاشر لليال: وش تبين راكبه معهم
ساميا بضحك : انا قلت لها تجين؟
نوف بتوتر : لا مابي شكرا
ساميا : شدعوه شفيك ترا بس نفرفر وننزلكم
نوف : مابي طيب مو غصب!
ليال : شفيك نوف والله ياحلوهم
ساميا وهي تبوس خد ليال : ياحلوك انتي
توترت ليال وهي تناظر نوف ، اشرت لها نوف تنزل لكن كانت بالوسط بينها بنتين
عند سلمان وترف
سلمان بعصبيه : قلت افتحي لازم يجيها مويا
ترف وهي تبكي : وخر خلاص مابي
تنهد سلمان : طيب ادخلي السياره
ركبت وهي تمسح دموعها وتتالم : حسبي الله عليه
جلس بجنبها بحنيه : تروفه خليك واثقه فيني مراح اعورك والله بس لازم يجيها مويا عشان ماتتحسس
سكتت وهي تفتح عينها بصعوبه : طيب
ابتسم بخفه : شاطره
اخذ المويا وحط شوي باصبعه يدخلها بعينها
رمشت بألم بعد مادخل المويا : اهخ
