سلمان : جاوبيني وينك !
ترف : بالبيت !
سلمان : اخ يالقهر عبالي انك عند ليال
ابتسمت وقفلت بخوف من شافت حمد يدخل غرفتها
سكر حمد الباب ودخل عندها : تكلمين مين
ترف بتوتر : صديقتي
حمد وهو يجلس : شصار عليكم رحتوا السوق
ترف وهي تتذكر : ايي تخيل فيه واحد ضايق ليال وكبت عليه قهوه
رفع حاجبه واعتدل : نعم ؟ منهو
ترف بخوف : مدري صراحه ماعرفه بس ليال تقول انه قال لها كيف شعورك وانتي بتصيرين حرم حمد
انهبل ووقف بغضب : صادقه انتي !
ترف وهي تشوف عصبيته بلعت ريقها : اي
طلع من البيت وهو معصب واخذ جواله يتصل على ليال
ترف وهي تمسك قلبها : اللي سويته غلط ؟ لا مو غلط لازم يعرف عشان مايضايق ليوولتي
ابتسمت ورجعت تصور نفسها على اغاني بروقان وترسل للبنات
عند ليال بغرفتها شافت رقم حمد وردت بتردد : هلا
حمد بعصبيه : عوض اللي جاك ؟
انصدمت وسكتت
حمد : اخلصي !
ليال : اي
حمد : سوا لك شي
ليال : لا
حمد : تمام
قفل واتصل على نايف
ناظرت جوالها بغضب : خير يقفل بوجهي وجع
فتحت سنابات ترف وضحكت من شافتها تتميلح وتصور وردت على سناباتها : ياحلووووككك
ترف : يمه تراني استحي
الهنوف : كذابه ماتستحي ترا
ترف : انتي شتبين ليكونن تغارين ان ليال تتغزل فيني
الهنوف : نعمم من زينش حبيبتي اقول بس روحي كملي تصويرش
ترف بدلع : ايي بكمل فارقيني
الهنوف : روحي بس
عند ناصر استقبل امه وابوه اللي كانو طالعين مع ريوف وسلمى يتسوقون : هلا هلا والله
ابتسم ابو ناصر : شعندك متحمس
ناصر ببتسامه : تعالوا عندي لكم خبر بيحبه قلوبكم بس اجلسوا ارتاحوا
تحمست سلمى ونزلت عبايتها وجلست : وشوو
ام ناصر وهي تجلس : وشو ياناصر
ناصر : ارتاحوا تقهووا لاحقين على الاخباار كلهاا
صب لهم قهوه وجلس بتوتر يناظرهم : احم انا قررت اني اتزوج
فتحت عيونها بذهول ام ناصر : صدق !
ابو ناصر : ما شاء الله ، تبي الهنوف صح ؟
ناصر بصدمه : يبه وش دراك
ابتسم ابو ناصر : معليه اعرف ، متى تبي تخطب
ناصر ببتسامه : بعد زواج ليال
ابو ناصر : اجل على بركة الله
زغرطت ام ناصر بفرحه : اخيرا بتتزوج ياكبر فرحتي
سلمى ببتسامه : يوونس عاد الهنوف كيوت صراحه
ناصر وهو متحمس : اي عشان كذا ابيهاا
ام ناصر بشك : وليه هي بالذات
ناصر بترقيع : ابد احسها كفو كذا تنفع تتزوجني
ابتسمت سلمى من شافت ليال نازله من الدرج : سلام
الكل : عليكم السلام
ليال : شعندكم مجتمعين كذا وضعكم مو مطمني
سلمى : ناصر بعد زواجك بيخطب الهنوف
ليال بذهول : صدق
ناصر : اي
جلست ليال عندهم : حلوو والله
ناصر بحماس : متى تتزوجين بسرعه
طيرت عينها ليال : وجع هد شفيك طاير
دخلوا عندهم سلمان وعبدالله اللي كانو يسولفون
عند الهنوف اللي كانت تتابع مباراة الهلال وتاكل لفت على اتصال ليال وابتسمت ترد : هلااا
ليال ببتسامه وهي تقوم من عندهم : هلا الهنوف
فز ناصر وقام ورا ليال للمطبخ
ليال : وش تسوين
الهنوف : اتابع المباراة شعندش
ليال : امم ماقالك ناصر شي !
الهنوف بأستغراب : وشو
ركض ناصر وهو يحط يده على فم ليال يسكتها : ليال امي تبيك
ضحكت ليال : ناصر وجع وخر
اخذ الجوال منها وركض يطلع برا المطبخ : هلا الهنوف بقفل بعدين تكلمين ليال
سكتت الهنوف باستغراب تناظر جوالها : شفيهم ذول
طنشت وكملت تتابع
ليال وهي تصارخ : ناصر ياحمار
ركض ناصر ودخل عند امه : يمه شوفي بنتك بتفضحني عند الجنوبيه
ام ناصر : شفيك انتي ماتقدرين تسكتين
ليال بعصبيه : طيب جيب جوالي
ناصر وهو يضحك : لا كم لي واعطيك جوالك ؟
سكت من دق جوالها وكان مكتوب : ❤️ hamad
ابتسم بأتساع وهو يرجع لها جوالها : وقلوب بعد ها
سكتت بأحراج وهي تشوف حمد يتصل عليها
دخلت غرفتها وردت : هلا
حمد : وينـك
ليال : بالبيت ليه ؟
حمد وهو يدلك حواجبه ويناظر الاوراق : زين لاتطلعين مكان لين تعلميني
ليال : شصايـر ياحمد
حمد بتنهيده : مـو صاير شي معليك
شدت على يدها ليال بضيق : حمد تـكفى انتبـه لـ نفسك لايصير لك شي
انصدم حمد ونزل اوراقه اللي بيده من كلامها اللي ماتوقعه : ليال ؟
تنهدت بتوتر : خايفه ، لايأذونك !
ابتسم وهو يفتح ازرار ثوبه :
جـيتيني في صبحٍ ماليته الرحابه
مثل حضور الشمس بالطول والعرض
من عقبها اشوف تحتي سحابه
هالحين وش يقنعني اني على الأرض
ابتسمت وحطت يدها على بطنها من فرط المشاعر اللي تحس فيـه
حمد : موجوده ؟
ليال : ا إي اسمعك
ضحك من حس بأرتباكها : انا اقول خليني اشوف شغلي اخاف اتحمس والقاني عند باب غرفتك !
سكتت وقفلت الخط وهي تهوي نفسها : شفيه صاير كلامه غريب
عند سلمان اللي صرخ بفرحه : احللفف يلبييه يعني بنفتك من ليال وناصر مره وحده
ناصر بهدوء : المشكله قايل لك اول واحد يعني ليه كل ذا
سلمان وهو ياخذ جواله ويرد على اتصال ووقف بسعاده : احلف ؟ مببرووككك تعال تعال برسل لك موقع البيت تعال والله لا اقهوييك
كلهم ناظروا لـ سلمان بأستغراب ، قفل سلمان وجلس ولف لـ سلمى : بالله سلمى جهزي القهوه وحطيها بالمجلس
ابو ناصر : ليه من جاي ؟
سلمان ببتسامه : خويي
لفوا له كلهم بصدمه : اايششش !!
ناظرهم باستغراب : خويي مهلهل تعرفه ياناصر
ضحك ناصر من شاف رد فعل اهله : معليكم اعرفه
راحوا كلهم للمجلس عشان يستقبلونه ولفت ام ناصر على سلمى : وين اختك مالها حس
سلمى وهي تتقهوا : تلقينها تكلم حمد
سكتت من شافت ابوها يناظر لها واستوعبت : ا اقصد شفتها تكلم مدري مين اتوقع نوف
..
بارت الييووومم🫡💖
