طلع رائد برا ولف يرفع السلاح بوجه حمد اللي كان يسمع حوارهم
رفع سلاحه حمد وطلق على يد رائد وطاحت منها السلاح تقدم وهو يشوف رائد يتالم واخذ المسدس منه وعض شفته بغضب : امش
مسكه حمد وابو حمد وطلعوه برا واتصلوا بالشرطه عشان ياخذونه
رجع حمد للبيت ودخل شاف امه وترف اللي مرعوبين : بدريه وين؟
لفت ترف ودخلت الغرفه وصرخت : بدريييه
ركض حمد وهو يرفعها على الكنب ويرشها بالمويا ويضرب خدها بخفه : بدريه بدريه
فتحت عيونها برعب وهي تناظر له : حمد !
عقد حواجبه : صار لك شي ؟
رفعت نفسها وتعدلت بخوف : حمد انت بخير ؟
حمد بهدوء : الحمدلله ، اخذنا الكلب لقسم الشرطه لاتشيلين هم !
تنهدت براحه ورفعت يدينها تحضن امها وترف وهي تبكي
عند ليال بعد ما اتصلت عليها الهنوف
اخذت جوالها وفتحت غرفتها ونزلت تحت شافت البنات مجتمعين ، جلست بهدوء بعد ما سلمت عليهم : وش السالفه !
الهنوف ببتسامه وهي ماسكه اللاب توب : بنقدم كلنا الحين على الجامعه
ناظرت لها ليال : قدموا
ترف وهي تمسك يد ليال بدلع : قلبوو شفيك ؟
سكتت ليال واخذت المويا تشرب وهي تناظر لهم
تقدمت نوف وجلست قدامها : ليال مايصلح تسوين بنفسك كذا ، ان شاء الله يطلع سلمان وهو بخير انتي بس ادعي له وغير كذا اكيد مابيتهمونه بشيء لانه مو سبب كل شي هو مجرد ضحيه
ليال : تمام
الهنوف وهي تضرب كتف ليال : جعلني فدا هالوجه
ابتسمت ليال وردت الضربه للهنوف : جعلني اهفك يالجنوبيه
الهنوف وهي ترفع حاجبها : هاا بدييناا !
ليال وهي ترفع كتوفها ببتسامه : مالي علاقه
فتحت الموقع : يلا بنقدم الحين ان شاء الله ننقبل
ترف وهي تناظرهم : بنات اخاف ما انقبل
ليال : ليه ؟ نسبتك زينه شدعوه خلي عندك يقين وتفائل مو تشائمين وانتي لسى ماشفتي النتيجه
ترف ببتسامه وهي تحضن ليال : اموووتتت انا بالمتفائله يااربي
ضحكت ليال وهي تبعدها : الا صح وين خالاتي ؟
نوف وهي تصب القهوه : مجتمعين عند امي
ليال : وامي معهم ؟
نوف وهي تمد الفنجال: ايوا ، سمي
اخذت ليال الفنجال وقربته من خشمها تستنشق الرائحة : اخخ يالبييه
ترف بضحك : يالمدمنـه
ليال وهي تاخذ جوالها : ناصر يدق
ردت : هلا
ناصر : هلا ليال اخبارك واخبار امي؟
ليال : الحمدلله ، ناصر شصار طمني
ناصر : حكموا على وليد اعدام
ليال بفرحه : احسن ، وسلوم ؟
كمل ناصر بضيق : وسلمان حكموا عليه سجن شهرين
ليال بصدمه وقهر : لييه ، طيب هو ماسوا شي
ناصر : وش نسوي الحمدلله مو اكثر من شهرين اسمعي امي تدق علي ثواني بس
قفل الجوال ، ولفت للبنات بضيق : سلمان بينسجن شهرين
شهقت الهنوف : ليشش
ترف بعصبيه : طيب هو ماغلط !!!
حنت راسها ليال بقهر
تنهدت نوف : معليه شهرين ترا افضل من سنه او سنتين تطمني ليال تمر بسرعه ترا
ليال بضيق نزلت دمعتها : بشتاق له بنات مقدر اتخيل انه بيبعد عني
الهنوف وهي تمسح على كتفها بحنان : ليال حبيبتي خليش قويه لا تحزنين ويشوفونك اهلك ويتضايقون الحمدلله مو سنه او سنتين الوقت يمر بسرعه صدقيني
سندت ظهرها على الكنب وهي تناظرهم بضيق
عند فيصل وريناد
ريناد وهي تحاول تتمسك : فيصل ماشوف اخاف اطيح !
فيصل وهو مغطي عيونها : قربنا يلا واااحد ثنيييين ثلاثه
ابعد يدينه عن عيونها وفتحت عيونها ببطئ وابتسمت بأعجاب : وواااوو !!
ضحك فيصل وحط يده على كتفها : حلو ؟
ريناد وهي تتأمل المكان : يجنن مو بس حلوو
ابتسمت وهي تشوف الورد والشموع والاكل بأنواعه : يااربيي
مسك يدها ودخل معها داخل وجلسوا على الكنب
فيصل : نتابع فلم ؟
ريناد : قدام !
شغل فيصل التلفزيون وطفى الانوار وكان الجو دافي بسبب الشموع اللي ماليه المكان نزلت راسها على كتفه ومسكت يده : فيصل
فيصل : همم
ريناد : تدري اني محضوضه فيك !
فيصل ببتسامه حضنها بقوه : وانا محضوض الف مرة فيك
ابتسمت ريناد ولفوا كلهم من بدا الفلم وتعدلوا بحماس وشدت ريناد اللحاف عليها من برودة الجو
عند سلمان كان منسدح ويناظر السقف لف على مهلهل وشافه نايم تنهد وهو يفكر بأهله وعيال عمه و أصدقائه وحساباته والستريك ، هز راسه بضيق ولف على صوت الشرطي اللي يفتح الزنزانة : سلمان فيه زائر لك تفضل معي
استغرب سلمان وطلع من الزنزانة وتوجه للغرفة دخل وانصدم اول ماشاف فهد ، ابتسم بأتساع : فهييد !
ركض فهد وحضنه بقوه وشـوق : اهخ سلوم ياكلب
ابتسم سلمان بفرحه : وش جابك
فهد ببتسامه واسـعه : جابني الشوووق !
ضحك سلمان وهو يضرب كتف فهد : ياشينك وانت مشتاق
فهد بضحك : يووه ياحضي بقعد شهرين بدون بثاره
ابتسم سلمان بضيق : هذي سوايا الرفقه الشينه
تنحنح فهد وربت على كتف سلمان : معليك فتره وتهون وانا كل شوي بزورك لين تطفش
سلمان : لاتطفشني مايحتاج عندي واحد هنا يونسس
فهد وهو يقرص اذن سلمان : منهو ذا بعد
سلمان بألم : عورتني ، واحد اسمه مهلهل والله ونيس
فهد وهو يقرصه بقوه : بديناا يا سلمان ! لاتتعرف على احد وتضيفه ستريك نفس اووول تفهم
سلمان بألم : وخر خلاص تراني مب بزر
تركه فهد وناظر فيه : الا بزر وتراك ورعي لازم انتبه لك
سلمان بضحك : ياشييخ ! والله صدق تراه اجودي وعلومه زيينه
فهد وهو يرفع حاجب : زين لاتمدحه كذا لا اهفك طراق
سلمان : تغار علي ياقلبي ؟
فهد بتكشير : وعوه
سلمان : اسمع شف جوالي بالسياره اذا ماراح الستريك ارسل ستريك ، وشف حسابي بالانستا والتيك توك وش صار جاني دعم شي تكفى تكفى فهيد
فهد بذهول : الناس تتضايق بالسجن وتتمنى تشوف اهلها وانت تبي حساباتك ماتطير ، عجيب
دخل العسكري : خلاص انتهى الوقت تفضل معي
سلمان بتكشير : خلاص بروح من نفسي لاتمد يدك وتجرني كاني عنز
ابتسم الشرطي : تمام
سلمان وهو يلف : ودعتك الله وسلم لي على اهلي كلهم وخصص سلامي للقطوه ، ولاتنسى اللي وصيتك عليه
ابتسم فهد : فمان الله ، ابشر
طلع سلمان من عند فهد ودخل الزنزانة وشاف مهلهل لحد الان نايم انسدح وهو يحاول ينام
