ပြန်လည်မွေးဖွားပြီးအကျင့်ပုပ်တဲ့ယောက်မကိုနှိပ်စက်မယ်

Chapter 30

(ဇနီးကို ချော့ဖို့နည်းလမ်းများအား တွေးခြင်း)

သူမ၏ အတိတ်က ကြိုးစားအားထုတ်မှုအားလုံးကို တွေးနေမိသည်။ ထိုကြိုးစားအားထုတ်မှု အားလုံးကို နောက်ဆုံးအရေးကြီးသော အခိုက်အတန့်တွင် အလဟဿမဖြစ်စေရအောင် မကြာခင် အစ်ကိုဝေ့ထင်တို့လင်မယား ကွာရှင်းမှဖြစ်မည်။

ဝေ့ထင် သည် ရှေးဟောင်းပစ္စည်းဆိုင်မှ ထွက်သွားပြီးနောက် ကုမ္ပဏီသို့ ချက်ချင်းပြန်သွားခဲ့သည်။သူ အလုပ်ကနေ၍ အပြင်ထွက်လာသည်မှာ နာရီအနည်းငယ်ကြာနေပြီဖြစ်ကာ ညပင်မှောင်လုနီးလေပြီ။ကုမ္ပဏီတွင် တာဝန်ကျ လုံခြုံရေးအစောင့်များမှလွဲ၍ မည်သူမျှမရှိပေ။ သူ့ရုံးခန်းကို ပြန်လာပြီး ကွန်ပျူတာရှေ့မှာ ထိုင်လိုက်သည်။သို့‌သော် အလုပ်မလုပ်ဖြစ်ဘဲ စုမုန့် အား သူပြောခဲ့သည့် စကားတွေနှင့် ဦးနှောက်တစ်ခုလုံးပြည့်နေရ၏။ သူမကို ကောင်းကောင်းမွန်မွန် ချော့ပါက မကွာရှင်းတော့ဘဲ သူနှင့်အတူ ဝေ့မိသားစုဆီမှာ ဆက်နေဦးမည်ဟု ဆိုသည်။

"သူ အရင်က ဘယ်မိန်းမကိုမှ မချော့ဖူးဘူးဆိုတော့ ဘယ်လိုချော့ရမလဲ…"

ဝေ့ထင်၏ မျက်နှာသည် ရှုပ်ထွေးမှုများနှင့် ပြည့်နှက်နေသည်။ လုပ်ငန်းကိစ္စများကို ကိုင်တွယ်ရန်၊ ကုမ္ပဏီအစီအစဥ်များကို လုပ်ဆောင်ပါက သူ ချွေးတစ်စက်ပင်မထွက်ဘဲ အသာလေး လုပ်ပြနိုင်သည်။ သို့သော် အလုပ်ကိစ္စထက် မိန်းမတစ်ယောက်ကို ချော့ရသည်က အတော်ခက်နေ၏။ သူ ခဏတာ တွေးပြီးနောက် တစ်စုံတစ်ယောက်အကြောင်း စဉ်းစားလိုက်မိသည်။ ထိုလူသည် တစ်နေ့လုံး မိန်းမများနှင့်သာ အချိန်ကုန်နေသူဖြစ်၍ ဤကိစ္စနှင့်ပတ်သတ်၍ အတော်တတ်သိနားလည်နိုင်သည်။ ဤအတွေးနှင့် သူ့ဖုန်းကို ကောက်ကိုင်လိုက်ပြီး ဖုန်းတစ်ကောလ်ခေါ်လိုက်သည်။အချိန်အတော်ကြာအောင် မြည်ပြီးမှ ဖုန်းကို တစ်ဖက်မှကောက်ကိုင်လိုက်ပြီး အမျိုးသမီးအသံတစ်ခု ထွက်ပေါ်လာသည်။ 

"မင်္ဂလာပါရှင်"

ဝေ့ထင် မျက်မှောင်ကြုတ်ပြီးလေးနက်သော အသံဖြင့် ပြောသည်။