My Sweetheart Cupid

၁၅

Uni

ရွက်သစ်၏တိုက်ခန်းရှိ ဧည့်ခန်းတွင်ဖြစ်သည်။ ဧည့်ခန်းရှိ စားပွဲပုလေး၏ မျက်နှာပြင်အလယ်တွင် သစ်ပင်ငယ်လေးကို တင်ထားကာ လူသုံးယောက်သား သေချာကြည့်ရှုနေမိကြသည်။

အပင်ငယ်လေးက လေမတိုက်ပါဘဲ တောင်ပံသဏ္ဌာန် အဖြူရောင်အရွက်အစုံလေးများက အသက်ဝင်နေသည့်နှယ် တနွဲ့နွဲ့လှုပ်ခါနေကြ၏။ အသက်ဝင်လာသည့် သားလောင်းလေးကဲ့သို့ အရွက်လေးများက အသက်ဝင်စပြုလာကြသည်မှာ စိတ်လှုပ်ရှားဖွယ်ကောင်းလေသည်။ ကြည့်ရသည်မှာလည်း စိတ်လှုပ်ရှားစရာကောင်း၏။ လူသားတို့၏လောကတွင် မရှိဖူး၊ မမြင်ဖူးခဲ့သည့် အဖြစ်မျိုးဖြစ်သဖြင့် ပို၍ စိတ်ဝင်စားဖွယ်ကောင်းနေခြင်းလည်း ဖြစ်နိုင်သည်။

" ဒါ တကယ်ပဲ ပန်းဖူးလေးလားဟင် "

ဒီရေက မယုံနိုင်သည့်နှယ် မေးလိုက်သည်။ ဒီရေက အဘိုးဖြစ်သူ၏ စကားများကြောင့် ရွက်သစ်အကြောင်း သိသင့်သမျှသိသဖြင့် ရွက်သစ် ထိုသစ်ပင်ငယ်လေးထံမှ ပန်းပွင့်သည့်အချိန်ကို စောင့်နေကြောင်း နားလည်လေသည်။ သူသိသမျှကိုလည်း ရွက်သစ်ကို မသိစေဘဲ အလိုက်သင့်သာ နေထိုင်ခြင်းဖြင့် ရွက်သစ်ကို ဂရုစိုက်ပေး၏။

ရွက်သစ်က ခေါင်းငြိမ့်၏။

" ဟုတ်တယ် သူ ပန်းပွင့်လာတော့မယ်လို့ ငါထင်တယ် "

ရွက်သစ်၏အကြည့်က မရယ်မပြုံးဖြင့် သစ်ပင်ငယ်ကို စိုက်ကြည့်နေသည့် ဓနထံ ကျရောက်နေသည်။ ဓနက သစ်ပင်ငယ်မှ ပန်းဖူးလေးထံ ‌စိုက်ကြည့်နေသည်။ ထိုအကြည့်များကို ရွက်သစ် ဝေခွဲမရနိုင်ဖြစ်နေသည်။

ဓန၏အကြည့်တို့က ထိုပန်းဖူးလေးထွက်‌ပြူလာခြင်းကို မနှစ်သက်နေသည့်နှယ် ခံစားနေရ၏။ ပန်းဖူးငုံလေးကို ကြည့်နေပုံက ဖြစ်နိုင်လျှင် ထိုပန်းဖူးလေးကို ဆွဲယူလွှင့်ပစ်ချင်နေသည်ဟုပင် ထင်နေရသောကြောင့်

" ဓန "

သူတိုးတိုးခေါ်လိုက်သော် ဓနက ရွက်သစ်ကို ကြည့်လာ၏။

" မင်း တစ်ခုခု စဉ်းစားနေတာလား "

ရွက်သစ်မေးလိုက်သောအခါ ဓနက မျက်လွှာချသွားသည်။ ထို့နောက် ရွက်သစ်ကို မျက်လွှာပင့်ကြည့်လာကာ