My Sweetheart Cupid

၂၁

Uni

" ဟေ့ ကားတွေအဆင်သင့်ဖြစ်ရဲ့လား "

ဦးရောင်ထည်က တက်ကြွသောအသံဖြင့် သူ့အလုပ်သမားများကို မေး၏။
ယနေ့က သူတို့မိသားစုအတွက် အရေးကြီးသည့် နေ့တစ်နေ့လည်းဖြစ်သည်။

ဒီရေ့မိသားစုနှင့် မိဘဆွေမျိုးများအားလုံး လာရောက်ကြမည်ဖြစ်သဖြင့် ဦးရောင်ထည်တို့ ဆွေမျိုးတစ်စုကလည်း မြို့အဝင်အထိ သွားရောက်စောင့်ကြိုကြရန် ပြင်ဆင်နေကြခြင်းဖြစ်၏။ အိမ်စီးကားငါးစီးဖြင့် သွားရောက်ကြိုဆိုရန် ပြင်ဆင်ထားကြ၏။

ဆွေမျိုးများကလည်း ဝတ်ကောင်းစားလှများဖြင့် တောက်ပနေကြပြီး နှစ်ဖက်ဆွေမျိုးများ တွေ့ဆုံကြိုဆိုကြရန် အဆင်သင့်ဖြစ်နေကြလေသည်။ ကားသမားများက ကားများကို စနစ်တကျစီတန်းထားပြီးနောက် ထွက်ရန်အဆင်သင့်ဖြစ်ကြ၏။ ဦးရောင်ထည်က ရူပါနှင့်ဒီရေတို့ကိုကြည့်၍...

" မြေးတို့နှစ်ယောက်က ရှေ့ဆုံးကကားမှာစီးလိုက်ကြ၊ ကျန်တဲ့သူတွေက အဆင်သင့်သလို စီးကြတာပေါ့ "

ဦးရောင်ထည်က အားလုံးကိုစီမံပေးပြီး သူစီးရမည့်ကားဆီသို့ ထွက်သွား၏။ အားလုံးသည် မင်္ဂလာရှိလှသည့်နေ့ဖြစ်သဖြင့် အပြုံးကိုယ်စီဖြင့် ကားများဆီသို့ လျှောက်သွားလိုက်ကြသည်။

" မောင်ရွက်သစ်ကရော ဘယ်ကားနဲ့လိုက်မလဲ ၊ ဘိုးဘိုးနဲ့ အတူလိုက်မလား "

" ဟို ကျွန်တော်... "

ရွက်သစ် လိုက်သင့်မလိုက်သင့် ဝေခွဲမရဖြစ်နေဆဲဖြစ်၏။ ဒီရေ့ဖခင်က ရွက်သစ်ကို အမြင်မကြည်ပေ။ ဒီရေ့ရှေ့ရေးကို ပိတ်ပင်သည်ဟု မြင်သည်ကတစ်ကြောင်း... ရွက်သစ်ကို ဂရုစိုက်ပေးနေရသဖြင့် ဖခင်ဖြစ်သူထံမှ မေတ္တာကို ဆုံးရှုံးခဲ့ရသည်ဟု လက်ခံထားခဲ့ဖူးသည်ကတစ်ကြောင်းကြောင့် ရွက်သစ်၏ ဘဝအမှန်ကို သိနေသည့်တိုင် ရွက်သစ်အပေါ် အမြင်မကြည်နိုင်ခြင်းဖြစ်လေသည်။

ထို့ကြောင့် ရွက်သစ် တွေဝေနေရခြင်းဖြစ်၏။ ထိုစဉ် ရွက်သစ်၏ပခုံးထက်သို့ လက်တစ်ဖက်ရောက်လာကာ သိုင်းဖက်လိုက်၏။

" ရွက်သစ်ပုံနှိုင်းက ကျွန်တော်နဲ့လိုက်လိမ့်မယ် ဘိုးဘိုး၊ ဘိုးဘိုးတို့ သွားနှင့်ကြပါ "