﷽
الشيهانة والعاصوف
بقلمي ياسمين حـ 58
٠
٠
٠
مساء الانوار عليكم يارب
احتاج تعليقاتكم للفقرات بگد اعجابكم للقصة وتصويت من اناملكم تثمين لجهودي اذا امكن
٠
٠
٠
لاتنسون متابعة حساباتي
تيك توك / um_ghaith33
انستا حسابي الاول /mgyth529
الحساب الثاني / um_ghaoth
٠
٠
٠
شهر سيفه الزمن هل من منازل صاح
اعزل ماخفت والــــــــــــــــزمن نازلته
مالحته ابد لكن ترســــــــــــني جروح
بس عدي المهم ما عـــــــــــفته قاتلته
٠
٠
الاكثم....
خمس شهور اني مرابط يمها لاسالت بعدها عالدنيا ولا اني النشدت عن حال التجارة شصفى عليها الوكت
سكنت ظلها خايف عليها من الحزن ومصابها جان امر لابد منه دوهنتني عليها واعرف حزنها تطول ايامه وبگد ماصبرت عليها مستعد اصبر الضعف
في سبيل تتخطى وفاته
ضليت امشي الشغل عالموبايل وارجع يمها تنام لحظات وتفز مخنوگة تبجي تريد تروحله واضطر اطاوعها تروحله تسولف وياه وتبجي لمن تتعب واسحبها منه بدون روح
وبقت طول الفترة الفاتت هية هذا حالها لاتنام ولاتاكل ولا تقبل تهود وكلما احجي واسولف واقنع تجري دموعها سكتة وتبقى تشاهگ عليه مردت حالي عليها مرد
صارت روحاتنا للمگبرة روتينية معروفة نطخ مرات مرتين نزوره اذا مو اكثر ساعة تعاتبه شلون عافها وراح وساعات تعاتب ابوها ليش اخذوه من عدها
وزنها نزل وعظام صدرها برزت ووجناتها الجانن موردات شحبن ... من غير عيونها ذبلن وصوتها مختفي نهائي تحجي وياي بالاشارة
بالنهاية قررت اخذها للنجف لعد داحي باب خيبر عليه السلام اسلمه امرها ويكفلي وضعها
نزلنا المطار النجف مباشرة خلصتها كله نوم على جتفي گعدتها من وصلنا
ومن خارج المطار اخذت تكسي للحضرة العلوية
نزلنا عد اقرب مكان ياخذنا للامام نزلت ولزمت ايدها عن الشارع خايف عليها عيونها شابحة ونظراتها ضايعة عن الدنيا وناسها
مشيت على ممشاها لحد ماوصلنا التفتيش اشرتلها تروح لنقطة النساء صفنت لحظات الا استدركت ضليت اراقبها لحد ماتخطت ودخلت الا عبرت منتظرها
طلعت تمشي تدورني بعيونها خايفة اجيتها لزمتها بس شافتني هملت دموعها تناشغ
مسحتهن الها وعبرنا اهديها
_ منتظرج ابوية انتي ليش هالبجي بعد
ماحجت ولا اشرت مجرد تريد عذر وحجة تبجي
وصلنا للبوابة اشرتلها اني انزل گدامها تشوفني گبالها هزت راسها خشمها احمر وعيونها مطعونة من البجي
