﷽
الشيهانة والعاصوف
بقلمي ياسمين
٠
٠
صلوا عالحبيب المصطفى وال بيته الطيبين الطاهرين وأهداء ثوابها لمولاي موسى ابن جعفر عليه السلام
٠
٠
اعتذر عالتاخير البارحة تمرضت بنتي وطلع بيها التهاب بالدم اسم الله عليكم وعلى اطفالكم رجعت واني مصدعة من التعب
٠
٠
علقوا اذا متصير زحمة عالفقرات وصوتوا ولاتنسون متابعتي على حساباتي كلهم
٠
٠
فلاش باك
٠
٠
درة..
نايمة بحضنه بثاني نزول اله بعد زواجنا وحلمت بنفس الحلم بحارث الشفته قبل سنين فزيت گلبي يركض من وراه من الصدمة والخوف تحسست وجهه بيدي ودموعي تهمل دمع
فتح عينه نص ونص شافني ابجي گعد نص گعدة
صافن عليه
_ شبيج يابة ليش تبجين
حضنته وفحطت اشكيله تعبي من الحلم
_ حلمت بيك حلم مو زين وخايفة عليك..... حاارث عليك النبي لتروح للجيش واعفيني من هالقلق فدوة
حضني لصدره يمسح بدموعي يضحك عليه
_ والله خبلة عبالي شو شبيج... بعدين انتي المؤمنة والي تخاف الله هيج تحجي شخليتي لعد لغيرج اذا هيج عقلج
_ شتريد تحسبها احسبها بس لتروح فدوة والله گلبي ومعدتي مايتحملن قهر بعد
_ ههههه ياابة الروح وحدة ماياخذها غير الخالقها لو نايم بصفج هم اموت بطلي خوف حمامتي
باسني راسي وغلس عليه ولا اهتم بقى يهودلي لحد مارجعت نمت غصب ودمعتي بعيني
فزيت ثاني يوم خليت حارث على نومته بدلت ونزلت لكيت السرايا فارغة بس مليكا تفتر بيها سألت عن عمتي گلتلي طالعة بمشوار هية وغنوة
ونهى وكيناز بغرفهن
سويت ريوگ وصعدت لحارث ناكل سوية گوة گعد يريد يعوض نوم
من خلصنا هو طلع واني مريت على كنوو لگيتها كاعدة تكوي بغتر الاكثم وترتب بملابسه صبحت عليها وكعدت يمها حجينا عن نهى وشغلة اهلها كتلها
_ حارث يكول بالنزول الجاي ياخذ عنوان نسيبهم ويرجعها ويشمر عليها يمين الطلاگ وتفض
_ يالله ولج درة نذر عليه اذا افتكينا منها الا اخلي غرفتها لمليكا طايحة الحظ الماعدها احساس
_ هههههه اول مرة اسمع بهيج نذر
_ يمعودة هو هذا الاجه ببالي المهم نخلص منها
بقيت يمها شوية ونزلت لمليكا اساعدها لحد وقت الغدة الكل رجع والتمينا عالغدة الامور طبيعية
بوقتها جانت غنوة حالتها ماتسر العدو متكركبة كلش
حتى عمتي ناهد ايست منها تفك او تفضفضلها
طلال جان مصر عليها تتواصل وياه واذا حظرته من رقم يطلعلها من الف رقم كلش متعلق بيها
ومصداقيته بالمحاولة حتى وية اهله عجزت تفصل عليه وهو يحارب لعيونها ولوحده
