زوجة الكولونيل [ 2 ] COLONEL'S WIFE

part 5

بدا كايحل الباب اما هي فهاد الأثناء رجعات باللور و بقات كاتحقق شحااال فالدااار و فطبقة اللون الزرق باش مصبوغة فالوقت لي كان ضاارها راسها فواحد البلان
أسماء : غير لي قالت و صافي حيت شفتك شديتي فصدرك قبيلا واش عاطيك الحريق ولا مريض بشي حاجة؟

مُراد : [ وقف قدام الباب ] فوقاش؟

أسماء : فاش كنتي كاتهضر معاها عاد دابا شوية

مُراد : [ دخل للداخل و هو كايضحك ] لا سولاتني شكون نتي [ ضار لعندها كايشوف فيها ] وانا وريتها شكون

حدرات راسها للأرض ماحساتش براسها حتى فلتات لها واحد الإبتسامة بلا هواها كان واحد الإحساس فشكل كايدغدغ قلبها خصوصا منين شافتو شيير لقلبو و هو كايوري للسيدة شكون هي

دخلو للدار .. كان ديكورها كايعكس الحياة الفريدة ديال هاد الناس ميكس بين البساطة و التفاصيل الفنية .. أرضيات خشبية دافية متناغمة مع الأثاث اليدوي المخدوم بالخيزران بجوانب طينية .. شراجم كباار مضويين الدار بالضو الطبيعي و كاشفين على الورد و النباتات الإستوائية لي كانو عند واحد جارتهم دارها مقابلة معاهم في حين فسيفساء الحيوط ودوك التماثيل اليدوية كانو كايعكسو الطابع الشعبي ديال هاد الدار بحالهم بحال أي شبر من هاد الدار إبتداءً من الباب الخشبي المزخرف لي رحب بيهم من الدخلة اللول حتى لدوك الستائر أما الصالون كان كايحتاضن أرائك مزينة بالترتر والأقمشة التقليدية مونسين السجادات فلرض

بإختصار كانت دار شعبييية 100% وراها لها قنت بقنت .. كان الإنسان كايحس فيها بواحد الدفء كترر من الديوور الكباار واخا من ريحتها كانت بااينة بقات شحااال مسدودة
أسماء : غزااالة والله , علاش ماجيناش جلسنا هنا علاما تساليو خدمتكم عاد نرجعو للمغرب؟ حتى هادي كاتبان صالحة للمعيشة

مُراد : الدار زوينة ولكن السيكتور خايب بالليل [ حط يدو على كتفها مطمنها ] ماتخافيش غير يعرفوك معايا ماكاينش لي يوصلك كاندوي على الصداع لي كاينوض هنا [ دوور عينيه فأنحاء الدار ] دخلني فيك العجب ا خت عِز ݣلت موحال تعجبك الدار صغيرة غير ديال زوفري

دوزات يديها على الأريكة لي فالصالون
أسماء : ا لااا اويلي علاش ماغاتعجبنيش؟؟ بالعكس عجباتني زوينة كون غير جينا للهنا

كان قادر يلمح تعابير الإعجاب لهاد البلاصة من وجهها حتى لحركاتها
مُراد : باقي مامشاش الحال نمشيو نجيبو حوايجك ولكن باش تكون فراسك الدار فيها بيت واحد

بدات كاتنفض يديها من الغبرة لي لصقات فيديها من واحد الطبلة دوزات عليها صبعها
أسماء : [ قطبات حجبانها ] وها هو فيها بيت واحد؟؟ كاينة الكوزينة الدوش الصالون و شفتي دوك الشراجم والرويحة لي داخلة منهم؟ دابا عاااد نقدر نقول عايشة وسطهم