زوجة الكولونيل [ 2 ] COLONEL'S WIFE

Part 44

1191

صبح الصباح بتودينة الفجر شي فيقو الاذان و شي فيقاتو المݣانة وشي غير داك السم ديال البرد لي داخل من الزنقة هو لي نوضو.. صوت المقراج فالسفلي كايصفر .. الصقييل وبنادم باقي نااعس كاتسمع غير صوت تقرقيب العكاز كايقرقب فالكوزينة مرة مرة

• فاق الصباح على وجهها ضايرة لجهتو باقا مكمشة فالغطا بأطراف يديها خدودها حمريين بالصهد والنعاس وجهها عاد بدا يرججع اللون الحيوي ديالو ... الفوطة زلقاات لها من راسها فعزز نعاسها وعاد مازادت فاحت من شعرها ريحة القطران خفيفة مخلطة بشمبوان ، كانت رحمة مخلطاه ليها معاه

ناض من حداها طرف و لبس عليه و تم قاصد الدروج كانت اليوم خارجة واحد السلعة جوايه ديك العشرة ديال الصباح داك الوقت عندو عاامر وموحال يكون مسالي يدوز يطل عليهم فيه فين وصلو ، نورمالمون دابا تكون تجمعات وتريݣل ليها الطومپو وبدااو كايشارجيو فيها باش غير توصل وقيتها يتحركو

الحاجة هنية : [ تعرضات ليه فالباب ] وليدي خارج؟

عِز : [ صوتو باقي مدعدع بتدعديعة الصباح ] الحاجة؟ اش مفيقك فهاد الوقت؟

الحاجة هنية : فيقني حالك لي مابقا عاجبني قاليا بّاك غاتخرج مع النبيري تمشي تشوف ولد عمك ، اجي ا ولدي عتق بوحبل

بدا كايقلب بعينيه واش فايق شي حد ولا كاينة شي وحدة من البنات فاقت تعاونها ساعة كان الحس مقطووع
عِز : باقي كلشي ناعس..! علاش شقيتي راسك فهاد الوقت؟

الحاجة هنية : عدابك راحة هاد اليامات مابقيتيش كتعمر فالدار ماعرفتك واش واكل مزيان ولا ناعس [ شافت فيه حتى شاافت و فخاطرها كاتقول ا حبييبي انا من نهار دخلات عندو ݣدام النحس مابقا شاف النهار الزين ] خاطري ماهناليش عليك تا هاد الصباح تخرج بلا فطور؟

عِز : [ طمنها بهضرتو ] غير مالاقيش ليه الوقت نزݣي اش عندي ونشوف الفطور ومايجي معاه

كانت هضرتو بحالا كايخوي الما فالرملة ماشي عمية ماكاتشوفش المرا علاين تقفل القرن و العينين عندها 10/10 .. كمدااتها عندها
الحاجة هنية : وا جلس عافا ولدي شرب لك غير هاد الكويس ديال القهوة

ماكانش عندو الخاطر للفطور ولكن الفياق ديالها فهاد الوقت على ودو و تمارة لي ضربات وهي ماعندها صحة مابغاش يضربهم ليها فزيرو ... جلس وجلسات حداه فوق السداري بدا كايصب لراسو فكاس ديال القهوة كحلة معطرة هي لي كانت محطوطة ... حناه مابانليهاش ديال اتاي هاد الصباح سبقاتها ليه هي باش يفتاتح نهارو و زيداات ليه طبسيل ديال المسمن مع طبسيل خور ديال الحلوة

الحاجة هنية : [ حطات يدها على ضهرو كادوزها بحنية ] كول ا ولدي كول عمر الركابي تلقا باش تكمل النهار ، الله يبعد عليك شر الخلق و يخليك ديما الفوق الفوق