زوجة الكولونيل [ 2 ] COLONEL'S WIFE

Part 53

1236

لاحت ليه الهضرة وبلعاني ماقالتش ليه الهضرة لي ضارت بيناتهم ... خلات ليه الفدّان فين يسرح بلا ماتبان شعالة العوافي مازادت مانقصات نتا و خيالك و مدام قلقاتني مرتك بهضرة مابغيتش نزيد عليك بهمها الا وراها قالت هضرة ماتهزها البالة.

عِز : و أش باقي درتي معاها فداكشي

الحاجة هنية : شغانقولك ا ولدي [ تنهدات و شيرات بيديها للسقف ] قالك هي ماليها يد فلي صاب مرات خوك و ختيمة عاود قالك عسات عليها تابغات طلع للسطح وبقات عليها هادي تنفع هادي ضر ماتعرف شكون تيق ولكن تا مرتك ماساهلاش ولا كانت هي مولاتها راه لا اله الا الله محمد رسول الله ديك الحالة مايديروها تا الكفار لحمها مسكينة كلو تبرطع دور دور و دعي فلي كان حيلة و سباب

عِز : [ دعك محاجر عينو بصبعانو ساكت ]

الحاجة هنية : [ تحنات للقدام عاقدة حجبانها ] ياكما الشقيقة عاود؟

عِز : الشقيقة هي لي كاينة الفوق [ شبك يدو بنفاذ صبر ] دابا باش فاريتي معاهم هادشي؟

الحاجة هنية : مابغيتش نزيدك بهمهم لانتا لا مُصعب عارفة لي فيكم كافيكم والايني ا ولدي ماكاين مانقولك فهادشي مرت خوك حلفات ماتمشي تا ديكلاري بيها خليتها الفوق كاتلبس جلابيتها غاتهز داكشي فاش سحرات لها يهزو منها شي بصمات قالك ومول الحق يبان ديك الساعة

عِز : [ ببرود ] من حقها [ شاف فوحدة من الخدامات بانت لو خارجة من الكوزينة و نده عليها ] يزّا طلعي ݣولها توجد راسها وتجي

الحاجة هنية : [ حطات يد فوق يد و تكات كاتقلقل فالسوق ] فين غاتمشيو ا ولدي خارجين غير هنا وغاتوليو؟

عِز : [ ناض من فوق السداري هز تيليفونو ] غاديين للدار

                          ° عـنـدهـا °

طلعات لعندها الخدامة عيطات لها باش تلبس حوايجها و هبطات ... وقفات قدام الفيكس كانت مطابية النمرة ديال جدها هضرة هنية بااقا لااعبة علييها بعلامات الاستفهام لي كان جوابهم عند جدها بوحدوو باش تفهم على شمن ورقة كاتهضر هادي واخا دييجا فبالها واحد الشك وحقيقةً ماستبعداتوش اساساً ولات متوقعة اي حاجة.

فيروز : [ حطات لاباراي على ودنها كاتسنا الجواب حتى دازت لابيل ] الو

الحاج قاسم : هادي نتي

فيروز : [ حدرات راسها للرض بسُخريّة مزيرة على ديك لاباراي فيديها ] اه هادي انا ومادخافش ا بَابَا... [ بلعات ريقها بصعوبة ] مالاغيتش باش نشكي بغيت نهضار مع بّا سيدي, كيشناهُــوَ؟ [ كي داير ] وفاين راه؟

الحاج قاسم : جدك شاد الفراش ليه مدة مابقاش كايتحرك من بلاصتو

فيروز : [ زيرات على لاباراي بيدييها قلبها تخطف من بلاصتو ] من فيواخ [ فوقاش ] هادشي؟ شعاندو؟؟