زوجة الكولونيل [ 2 ] COLONEL'S WIFE

Part 51

1226

مول الپيكوب لي ماكانش هو اللول ولا حتى اللخر لي كايتعامل معاه عِز فبحال هاد الأمور ... كان واحد من بزاف ولي كايتقداهم غالباً يا من دروبة الشعبيين يا من وسط الحبس نييت ... على حسب فاش غايحتاجهم

السجون بالنسبة ليه كانو كايعنيو ليه جوج حوايج ... اللولة فيهم كان بحال شي پلاكار ديال الأسلحة سلاحات بحال مراد بحال سماعيل بحال بابات هناء ويمكن كتر من هادو غير خازنهم واكلين شاربين و مخلصين و بعاااد على العين حتى حد ماعارف شي حاجة عليهم من غيرو و كُلها و فشمن حبس كاين .. مامفرقينش فكاع الحباسات فالمغرب ولكن فشي وحدين منهم كاينين .. اما بخصوص الحاجة الثانية لي كان الحبس كايعنيه ليه كانت حاجة كبررر من هادشي

كان كايعزل واحد الماركة من الناس كاتكون مضروبة ب15 العام للفوق كايتفاهمو معاه على 4000 درهم فالشهر يدوزوها ليه على ود حاجة وحدة ” كونط فالبنك بسمية داك السيد المشدود يخدمو بيه ويسيني على واحد الوكالة يوكلهم عليه “ كانو كايحتاج للحسابات البنكية بسميات ناس حقيقيين يخبع فيهم الفلوس باش مايحطش على كونطو بوحدو ولا كونط باه ولا خوه .. يتفاداو الشُّبُهات ونهار كايحتاجو الفلوس كايجبدوهم منهم ... بالإختصار المفيد كان الحبس بالنسبة ليه بحال شي بنك مركزي حايك فيه شبكة عنكبوتية هاازة اسماء و تواريخ و محاكمات و مبالغ نقدية كايدوزو لكونطات ناس خرين لمئات الاشخاص

                      × فالكويت ×

فمركز التسوق الفاخر ” الأفنيوز “ وسط الأضواء اللامعة والمحلات الفاخرة المصافّة فجوانب الممرات الواسعة ... فين معروض أجمل الأزياء والمجوهرات والعطور كانو كايتمشاو هي و عائشة فداك الجو وسط حركة الناس حتى وقفو قدام واحد المحل كايبيع فساتين سهرة برّاقة ... دازو بجوج ناحية واحد لاغوب حمرة داكنة مرصعة بالأحجار اللامعة , لمعو عيون عائشة كاتحاول تخفي ضعف جسدها المتداعي بسباب السرطان لي كاينخر فيها

عائشة : [ نطقات بالخليجية بصوت خافت كاتحاول تبان قوية مابيها والو ] كي جاك ا سندس؟ ماشي يجيني زوين فالحفلة الجاية لي غانمشي ليها انا وباباك؟

شافت فيه بلا خاطر غير دايرا لها الخاطر وغادا معاها فهبالها تا تشوف فين غايساليو هاد الزعت 
نورة : [ بتاسمات لها بإبتسامة صفرا مبززة على راسها ] مزيون ا ماما جربيه نشوفو كي ايجي عليك

بتاسمات ليها برِقّة كانت الابتسامة ديالها كاتخبع من وراها تعب عمييق ... دخلو بجوج للمحل و وقفو قدام مرايا كبيرة محاوطينها أضواء ناعمة كاتخلي اي حاجة تبان فيها زوينة ... جلسات نورة كاتسناها تجرب لاغوب كاتهزهز رجليها مخبعة عينيها بنظاظر كباااار ضاربين النص ديال وجهها وماحاملاش رااسها غير مفوورصية على راسها و جالسة توزع فالنفاق و الضحكة الصفرا ... قنطوها شوفات الناس ليها و سينورماال هادشي توقعااتو باينة غايكونو كايقولو اش جمع هاد المشوهة بمرا أنيقة