زوجة الكولونيل [ 2 ] COLONEL'S WIFE

Part 60

  • الـمـغـرب_طـنـجة...

_ الأحد - 7 ديال العشية _

واقف على واحد التل كايطل منو على طنجة .. متكي على الطوموبيل من وراه وحاط التيليفون غير من فوقها كايتسنا فواحد المكالمة ... عينيه سارحين مع منظر المدينة وسط الظلام مضويينو ضواو الزنقة... سارح بعينو ففصالة المدينة والدخان مرة مرة كايضبب ليه الشوفة ، كانت عندها فصالة ديال مدينة أوروپية وحتى هي الصراحة تستاهل يعيطو لها لاكاپيطال إيكونوميك...

خرّج الدخان لي كان حاضن عليه وحدر عينو لداك الظرف لي كان فيديه ... كان شكلو بحال شي رسالة هاربة من العصر الڤيكتوري داكشي ديال النخبة وطبقة النبلاء كايجيب لك الله غير مستر سيلز ولا دوراس هربو من القرن 19 مخليين لك ميساج فبرا بطابع الشمع

شي 4 أيام دابا باش وصلاتو فوقت ماشي وقتها ... وقت لي قلب الحرفة من غبّار للفارناتشي

#قبل_أربع_أيام
ــ الأربعاء - 2h30 ديال الصباح في الحسيمة ــ

الشتا كاتصب والليل مكحل بدموسيتو ... ماكايدور مش خلوي فديك الزنقة... كانت تقريباً شي الوحدة ونص ديال الصباح  الدرب خاوي والضواو طافيين شاعل ضو واحد ففران الحومة باين شعاه من تحت الباب الكبيرة ديال الحديد ... الفران لي كان موالف يطيب خبز الناس جايبينو ليه خام اليوم نارو كاتݣدي ناوي يݣرمل واحد من دوك الناس

• واقف قدام ديك حفرة العافية وقبالتو كسدة مرا مربوطة كلها مدݣدݣة .. دفعها للفرّان بواحد اللوح كايشبه للسكيطة فالهيكل غير هو كبر منو كان مبعـد عليها الحطب باش ماتشوطش دغيا وفنفس الوقت عندهاا منين تنفس

كانت كاتهضر ولكن صوتها مكتووم بالتوب المخشي ففمها مخليها تخرج انين ماكانش عندو الفضول يعرفها اش كاتقول فيه ... واقف متكي ضهرو على الكونطوار المسيــم شاد فيديه ݣاروه وعاطي لعينيه فاش يتمنظرو ... منظر فين تبان الخضورية والمناظر الخلابة .. منظر الثأر بنار مهيييلة ، ساروت الفرّان شدو على سومة 10 أيام غير على ودها اما حتى مولاه جاتو ديك الفلوس لي عطاه من الجنة والناس حدو شدها وهو يسافر للراشيدية بيدما رجع لو ساروتو ... مولاه نيت لي ماكان فراسو كاع بنادم ناويين يديرو لو طياب الخبز فالفرّاان و هو حي يرزق ... وفعلا كان هادشي لي غايوقع فديك الليلة كون ماقاطعو الدقان فباب الݣراج

طل عليه من شقة الݣراج وبصوت ذكوري نطق ” وصلاتك هاد السخرة عاد دابا من عند واحد خونا “

غير دار لو بيدو ديك اجي قرب دخل مد ليه البريّـة لي وصلاتو
عِز : [ قلبها للقدام واللور ونطق بلا مايشوف فيه ] وهاد خونا كانعرفوه؟

سولو فالوقت لي كان غادي لجهة الباب .. خرج للزنقة كايقلب على يمينو وشمالو مابان ليه حد كان الدرب خاوي ... على ما حسب مافهم منو السيد كايبان فيه نقي ... الطوموبيل لي جا فيها من الحديد التقيييل ولكن على ماكايبان ماشي حديدتو .. هو غير شيفور ، شيفور ديال داك لي كان جالس اللور كايطل من الزاج فيمي...