زوجة الكولونيل [ 2 ] COLONEL'S WIFE

Part 62

وصلو لقاو المحامي ديال العائلة كايتسناهم ... كان راجل أنيق لابس بدلة رسمية محددة مزيااان كلشي فيه هو هداك الّا فيݣورتو .. ماكادخلش للخاطر باين فيه دييب وشمن ديييب

المحامي : [ مد يدو يهدوء و ثقة لنورة ، عينيه كايدورو كي اللّولَب ] أنسة نور ، كنت كانتسناك

غير بان ليها عارف حريرة الشيخ فوزي بان ليها العربون .. مدات يدها حتى هي سلمات عليه اما ساجد صونا عليه التيليفون كي كان كايصوني من الصباح و خلاها مع المحامي والشيخ فوزي نيت لي كان كايتسناها لداخل و مشا هو يقضي شغالو ... حدو بان ليها تحرك و هي تستأذن على اساس باغا تمشي تهضر معاه ، هو ضار مع الدورة خارج وهي مشات ديريكت كاتقلب على أية وفاتي ... ردات لهم البال مابقاوش كايجاوبو فالتيليفون ولكن مالقاتهمش...!!!

كاتقلب بعينيها على شي حد من الخداما القدام لي كانو معاها ولكن والو...!!! ماعدا دوك لي ماكانتش كاتخالط معاهم...!!! سمعات شي هضرة زالقة بحالا قالو بلي رحلو شي وحدين لبلادهم ولكن ماجات فين تتحقق من الموضوع حتى خلط عليها الشيخ فوزي بحالا كان عاارفها غاتهبط للتحت ... رجع طلع هو وياها لعند المحامي باش يبداو يوجدوها على ود اللقاء ديالها مع نسيبتو اما موضوع اية وفاتي سداتو هاد الساعة وتفادات كليا تجبدو معاه حتى تنبش بيديها وتعرف اش كاين...

كان داكشي لي خلاه ليها ساجد كملو لها هاد المحامي بالتفاصيل لي بدا كايعطيها على نسيبة الشيخ فوزي وعلى سندس ... تفاصيل قانونية كاتتعلق بالأملاك ” الديور .. الأراضي .. الحسابات البنكية ... المشاريع التجارية وزيد وزيد والشيخ فوزي فالجهة الثانية كايوضح لها القيمة المعنوية ديال كل وحدة عند نسيبتو و عند بنتو

مارخاو منها داك النهار حتى حسات براسها دار ارور .. كانت دايرا بحال داك السنجاب لي كايعمرر فموو بالبندق و يتسنا حتى يرجع للدار عاد يبدا يصفي و يضرب لكل حبة حسابها واش تصيف معاه ولا تشتوي .. الكونيكسيو كانت عندها تقيلة والمعالج ضعييف بطا عليها غير وقتاش ترجع وتبدا تقاد امورها بشوية بشوية

                       × كـولـومـبـيـا ×

فاقت قبل من مالين الدار كان كلشي باقي ناعس ... راسها عاطيها الحريق بقلة النعاس و هم عائلتها وزاد المشكل اللخر لي وقع مع مراد كمل لها الباهية ... الخدامات كانو ناعسين فهاد الوقت ، طرفات و غطات شعرها هبطات هكااك للكوزينة بوجهها صفرر مافيه والو باغا غير شي كاس ديال القهوة تقاد بيها الراس و تصحصح

حطات الكبسولة فماكينة القهوة وجبدات كاس لاحت فيه طوبة ديال السكر مخلياه تتقطرر عليه القهوة وبالها باقي سارح ، طاح فبالها مراد...

حارت هاد اليامات لي دازو واش غلطات و غير مافهماتوش مزيان؟ فاش كاتجي تشوف كاتلقا عقليتو بعيدة على عقلية خوتها نهار عررفها على كاميلا عرفها عليها عادي واخا من التصاور لي شافت وعلى ماعاودات لها زاراي دوْز هو وصاحبتها الحَمَاق ولكن شايفاه لايح الماضي ديالو معاها