زوجة الكولونيل [ 2 ] COLONEL'S WIFE

Part 13

جوايه الوحدة ونص كان واقف قبالة الشرجم فالبرطمة و هاز فيدو التيليفون باقي لدابا ماخرجش من الدار مدورها بليزاپيل فالتيليفون و مسبق فيها 3 ديال الحوايج هاد الساعة
” الإجراءات الوقائية “ ... ” تقييم المخاطِر “ ... ” تحليل اش وقع من الوقت لي جا للهنا “

ماكانش من ديك الماركة لي غايحط رجل على رجل و يتسنا بنادم حتى يجي يوقف عليه يعلمو بعداوتو معاه و يخليو كمامرهم اخر كمارة يشوفها قبل مايسيفطوه لجهنم .. داك الضومين كانو القواعد ديالو بساااط ” القرطاس كايتخلص بالإنش والݣرام “ ماكايناش شي حاجة سميتها رصاصة طائشة كانت طايشة ربيها خررجتيها ݣد بيها

سمع صوت الباب ديال الدوش كاتتسد للمرة التاانية منين وصلو لهاد الپرطمة كانت بااينة باقا عياانة بحالها بحال دجاج الضو

دخلات للدوش كاتجري حاطة يديها على فمها ووجهها معصور بالترويعة .. الخاطر هارب و الوجه صفرر مخطوف منو اللون ، بقات كاتررد وهي ماعارفة اش ترد كرشها خاااوية .. رشات شوية ديال الما على عنقها دوزاتو عليها و تسندات على لاڤابو .. الدخان ديال البارح وديك جبدة ديال الطريق لي ضربو بالجوع تحت داك الجو المتقلب داارو خدمتهم فيها .. هزات الفوطة كاتنشف عنقها وخرجات من الدوش كاتشوف فيه غير بنص عين قهرهااا دايرها قد راسو و مزاال زااايد فيه؟؟ باغيها تبقا صم بكم غير كاتحنزز وقاطعاهم

تحركات للبيت مافيها مااتااكل الشهية تسداات ليها بسبتو وعلى ود البنت كانت ناوية تدخل حتى حبسها بهضرتو كانت واحد القضية فهادشي فوقها علامة إستفهام 
عِز : البارح خليتك لتحت أش وصلك للفوق؟

فيروز : [ جلسات كاترتاح وترد النفس ] ياك هادشي ݣاز؟

بععد من جهة الشرجم لي كان مضوي البرطمة ومشا لجهتها مبدل الصيغة
عِز : اش وصلك لديك الشومبرا

فيروز : شوفت داك خانا داخل من الباب وتبعتو [ جمعات يديها بين فخاضها و قلبات وجهها ] ماكونتشي عارفاه اصلا بيتا

بقا واقف قبالتها وحادر راسو فين كانت جالسة
عِز : ومنين دخل؟

فيروز : دخول من الباب لي وريتك فالفيديو

جلس جلسة القرفصاء قدامها مكونصونطري مع هضرتها
عِز : فوقاش دخل؟ قبل ولا مور ماتقطع الضو؟

شافت فيه بإستغراب بحالا كاتشوف فشي فضائي .. مالو مادار هاد الإهتمام على البنت فاش كانت باقا حية؟؟ قلبات وجهها لسانها كان عاجز عن التعبير فحالتو
فيروز : من مور ماتقطَع الضو فاش كانت شاعلة العافية ولا كونتي اتساقسي ادا كان دخول معاه شي حَد انقولك دخول غا مع راسو 

ناض من حداها وراسو بقا غير مع ديك الڤيلا ومع بلان واحد بالتحدييد ... حط لها التيليفونات ديالها بجوج من مور مافلاهم فالسبيطار وتحرك للباب بلا مايوصيها حتى على حاجة