زوجة الكولونيل [ 2 ] COLONEL'S WIFE

Part 30

1121

بانت ليه الطبيبة داخلة لعند فيروز كاتراقب حالتها حاضية لها مع الطونسيو ومعدل نبض القلب مع معدل التنفس .. هاد السوايع لي دازو كان فكل مرة كاتدخل شي طبيبة ولا فرملية تتحقق من الوظائف الحيوية و الأكسجين فالدم

× مُـراد ×

ماكانش جاهل على الحالة لي هما فيهم .. عارف غارقين حتى لودنيهم هاد الساعة ولكن ديك الورقة بالضبط مابغاش يضيعها من بين يديه بغض النظر على ذيول المشاكل لي غاتجرهم معاها ولكن النتيجة ممكن تتحط كمقايضة بالسِلم ليهم مع السيسطيم يجييو لهم اش باغيين مُقابل كل واحد يمشي فطريقو

ماعجبوش الحال بالشك لي شك فيه من ناحية القدرة ديالو باش يتحمل مسؤولية مراتو
مُراد : كون كنتي عارف ختك اش ساوية عندي ماكناش غاندويو فهادشي هاد الساعة [ مسح وجهو بيديه ] أوسوغا ماغايضروهاش ماكايتقلبوش على دياولهم

عِز : كنتي معاهم فواحد الوقت [ نععت ليه بعينيه للوشام ] بقا لك منهم غير داك الوشام غايديرو لكم پرومو فيه؟ جامعينك فيه نتا وياها؟

مُراد : بلا پرومو ماعزيزش عليهم يبقا عندهم شي دين قبل مانولي للمغرب كان عندهم واحد الدين ليا [ مرر يدو على شعرو ] هاد الساعة جامعنا معاهم الحرر و الضرر فلوكة وحدة هازانا , ماغانجيش و نخليها فشي قنت وانا ماعارفوش , هادشي ماداخلش فالخدمة لي جامعاني انا وياك اسماء بالتوصية ديالك و بلا بيها راها مرتي

مازادش حكر ولا شد ليه فداك الموضوع .. الهضرة تختمات بيه مدامو عارفها مراتو و هاد الساعة ماطاري لها والو بشي قرار أرعن منو داكشي لي بغاو كاملين

عِز : دابا نشوف هادشي [ دوز يدو على نيفو ] بغيتك فواحد الغرض

مُراد : هو علاياش جيت [ غمزو ] شمن غرض هدا؟

عِز : [ حط دراعو على كتفو ] باغيك تمشي ليا للدار القديمة

مُراد : [ قطب حواجبو بتساؤل ] اينا وحدة؟

بانت ليه الطبيبة طولات هاد المرة عندها كتر من اخر مرة طلات عليها .. جاوبو و عينيه مع ديك النافذة الزجاجية
عِز : الدار فين كنت مريح هاد السيمانة

ضار لعندو عطاه لادريسا و سوارت الدار لي أساساً كان كايمشي ليها غير باش يبدل حوايجو ولا يدوش اما حتى النعاس كان يكاد يكون معدوم عندو

مُراد : اش غانجيب لك منها؟

عِز : [ بتوضيح ] ديك الدار غير غاطرݣ عليها تهز منها السوارت ولادريسا ديال عيادة داك البسيكاطخ لي كانت متبعة معاه ديك خيتي

غير عطاه السمية عرفو كايهضر على عشيقة القواد ديال السيسطيم لي كان غايقتـ//ـل فيروز اثناء الحريق
مُراد : اش غانجيب لك من تما؟

عِز : شوف لي الراپور ديالها واش كاينين معاه شي كاسيطات مفيلميينها جيبهم لي معاك

مُراد : صافي حسبهم عندك [ شاف فكاميلا ] اش غاندير معاها؟