Sunshine Of My Life [ Ongoing ]

Chapter - 3

ညအချိန်မှာမှိုင်းညှို့မှောင်မိုက်လှပြီးအလွန်အထီးကျန်စရာလည်းကောင်းလှသည် ။ လူသားတို့အိပ်စက်ချိန်ဖြစ်သောညအချိန်မှာဝိညာဥ်လောကသားများအတွက်မူအပြင်သို့ကျက်စားသွားလာရန်အချိန်ကောင်းပင်ဖြစ်သည် ။ ဝိညာဥ်များ၏ပျော်ရွှင်မြူးတူးချိန်ပင်တည်း....။

ဝိညာဥ်လောကတွင်လူသားတို့နှင့်ဆင်တူသောအချက်ရှိသည် ။ လူတို့တွင်အဆင့်အတန်း၊ရာထူးဂုဏ်ပုဒ်များခွဲခြားထားသကဲ့သို့ဝိညာဥ်လောကတွင်လည်းသက်တမ်းရင့်လုပ်ပိုင်ခွင့်ရှိသည့်ဝိညာဥ်၊သက်တမ်းနုအားနည်းသည့်ဝိညာဥ်များဟူ၍ရှိသည် ။ သက်တမ်းရင့်လေလုပ်နိုင်စွမ်းအားပိုမြင့်လေဖြစ်ပြီးသက်တမ်းနုဝိညာဥ်အချို့များမှာထိုဝိညာဥ်ကြီးများ၏ထိန်းချုပ်ခြင်းကိုခံကြရတတ်သည် ။ စောင့်ရှောက်တတ်သောဝိညာဥ်များရှိသကဲ့သို့ဆိုးသွမ်းဝိညာဥ်များလည်းအတူယှဥ်တွဲရှိတတ်သည် ။ ရှင်းလေရှုပ်လေဖြစ်သောဤလောကမှထွက်ခွာမသွားနိုင်ပဲကျင်လည်နေကြရသည်မှာလည်းယင်းတို့၏
သံယောဇဥ်အစွဲများကြောင့်ပင်......။

ထို့အတူဘယ်ဘုံဘဝ၊ဘယ်နေရာတွင်မဆိုအုပ်ချုပ်သူခေါင်းဆောင်( သို့ )ဦးဆောင်သူဆိုသည်မှာလည်းရှိရမည်မဟုတ်ပါလား ။ ဦးဆောင်သူခေါင်းဆောင်မရှိလျှင်လုပ်ငန်းခွင်ပင်ဖြစ်စေ၊နိုင်ငံတစ်ခုပင်ဖြစ်စေ၊မည်သည့်နေရာပင်ဖြစ်စေလမ်းပျောက်သွားနိုင်သည်။
ဝိညာဥ်လောကတွင်လည်းထိုနည်းတူပင်။ သက်တမ်းရင့်ဝိညာဥ်များထက်ပို၍ဩဇာအာဏာကြီးမားသူ၊တစ်နည်းအားဖြင့်ဆိုသော်ဝိညာဥ်ဘုံဘဝအားထိန်းသိမ်းသူဟူ၍ရှိသည် ။ ထိန်းသိမ်းသူမရှိပါက မြင်းဇောင်းမှမြင်းများလွတ်ထွက်သွားသကဲ့သို့လူ့ဘုံဘဝနှင့်ပြသနာများရှိလာနိုင်သည်မဟုတ်ပါလား ။

ရှုပ်ထွေးလှသောဤဘုံဘဝတွင်အရှုပ်များမှရှောင်၍
သင်းကွဲနေသည့်ဝိညာဥ်တစ်ကောင်လည်းရှိသည် ။

" ဝိညာဥ်အံ့မှိုင်းညီ ၊ ခြေငြိမ်သွားပုံများဒီနေ့မှပဲငါ့ဆီရောက်လာပါတော့လား "

".............."

အဝါရောင်မျက်ဆံနှင့်အနည်းငယ်မှေးကျဥ်းသည့်မျက်ဝန်းတစ်စုံရှိသည့်ထိုဝိညာဥ်မှာဝိညာဥ်များအားထိန်းသိမ်းသူ (သို့) ဝိညာဥ်များအရှင်ဖြစ်သည့်
ဝီဉာဏ၏ထိုစကားအားကြားသော်မည်သည့်စကားမှပြန်မဆိုသော်ငြားသွေးရောင်မရှိသည့်နှုတ်ခမ်းမထူမပါးတစ်စုံမှာတော့ပြုံးယောင်သမ်းသွားလေသည်။
မျက်ခုံးထူထူ၊မျက်တောင်ခပ်ရှည်ရှည်များရှိကာအချိုးအစားကျလှသည့်မျက်နှာအသွင်အပြင်နှင့်ပေါင်းစပ်လိုက်သောအခါအလွန်တရာခန့်ညားလှပေသည် ။ သို့သော်သွေးရောင်မရှိဖြူစွတ်နေသည့်အသားအရည်နှင့်အဝါရောင်မျက်ဆံနှင့်မျက်ဝန်းအစုံကြောင့်အနည်းငယ်လည်းထိတ်လန့်စရာကောင်းသည့်ပုံပေါ်သည် ။ မည်သို့ပင်ဆိုဆိုခန့်ညားလှသည့်မျက်နှာနှင့်မြင့်မားလှသည့်အရပ်တို့နှင့်ပေါင်းစပ်လိုက်သော်လူသားတစ်ယောက်သာဖြစ်ပါကထိုဝိညာဥ်မှာပျိုတိုင်းကြိုက်သည့်နှင်းဆီခိုင်ဖြစ်မည်မှာအမှန်ပင် ။