عاصفة الهوى

عاصفة الهوى ١٧

عاصفة الهوى (١٧)
بقلم / الشيماء محمد احمد
#شيموووو

خاطر مسك الموبايل منها و قرأ كل المكتوب بهدوء تام لحد ما خلص فبصلها : مش شايف فين مشكلتك برضه ؟ كله كلام قديم عن كريم المرشدي وهي كانت خطيبته وكل ده معروف مش جديد فين مشكلتك بقى ؟ معترضة على ايه ؟
فاتن جالها حالة ذهول من تفكيره، ضربت كف بكف وهي باصاله بغيظ : يا راجل مرات ابنك سيرتها على كل لسان ، كل ما حاجة هتحصل هيجيبوا سيرتها كده ، عاطل مع باطل ، أنا مش فاهمة انت جرالك ايه ؟
خاطر وقف ينهي الجدال العقيم ورد بحزم : ابنك اخترها زوجة له وقال انه من يوم ما عرفها والبنت كويسة ، كانت متجوزة قبل كده ؟ اه ، كانت وحشة في يوم من الأيام ؟ اه ، بس ده مش فارق مع ابنك ومهتم بحاضرها ولو هي دي الإنسانة اللي هتسعده فهو حر ، حياته حر فيها ، هو اللي عايش وهو اللي بيتعذب وهو اللي وحيد أنا مش بشاركه ليالي وحدته علشان أحكم مين اللي يقضي معاه لياليه ولحد هنا واقفلي الحوار ده وحاولي تتقبلي ملك في حياة ابنك علشان ما تخسريش ابنك .
فاتن ماعجبهاش الكلام وردت بتهكم : هو لسه هخسره ؟ ما خسرته خلاص ، عليه العوض ومنه العوض .
خاطر سابها وتمتم وهو داخل أوضته : لا حول ولا قوة إلا بالله العلي العظيم .

عند هند آخر اليوم ركبت العربية جنب بدر واستنوا أنس يخرج من المدرسة
هند بصت لبدر : ماما كلمتني وطلبت مني أعدي عليها ضروري وصوتها كان متعصب مش عارفة ليه ؟ ينفع توديني عندها الأول ؟ ولا آخد تاكسي وانتم تروحوا ؟
بدر بصلها بتهكم : تاخدي تاكسي يا سلام - مسك ايدها باسها بابتسامة- يا روح قلبي من جوا انتِ بس تؤمري مش تقولي تاخدي تاكسي  .
ابتسمتله بحب : ربنا ما يحرمني من حبك أبدا أبدا .
أمن على كلامها : ولا منك يا عمري كله - حط ايده على بطنها - طمنيني بندقة الصغنونة دي أخبارها ايه ؟
حطت ايدها فوق ايده بابتسامة: هو انت كل يوم باسم ؟ سمسمة ، حمصة ، فستقة، ، ايه بقى ؟
ضحك بمرح: ما أنا بسميها حسب التطور بتاعها ، هي دلوقتي بقت بندقة .
ضحكوا الاتنين وقاطعهم وصول أنس اللي ركب وقعد في نص الكنبة ورا وحط ايديه على الكراسي قدام : النهارده بجد كان يوم حلو ، غدونا برا بقى يلا انطلقوا .
بدر بسعادة لحماس ابنه : الأول تيتا طلبت هند هتروحلها وبعدها نشوف هنعمل ايه ؟
هند اقترحت : طيب روحوا انتم الاتنين اتغدوا و
قاطعوها في نفس الوقت : لا 
بدر ابتسم ان ابنه مهتم ان هند تكون معاهم
أنس بإصرار : هنود مش هناكل من غيرك أكيد يعني ، انتِ و - بص لأبوه بتساؤل - اسمها ايه النهارده؟ ولا لسه معتمدين فستقة ؟
ضحك بدر وهند اللي جاوبته : لا أبوك النهارده أطلق عليها بندقة .
أنس بضحك : حلو أنا بحب البندق بس يا ترى الاسم الجاي هيكون ايه ؟
بدر بتفكير : مش عارف لسه انت ايه رأيك ؟ برتقالة مثلا ؟
كشر باعتراض : لا خليها تفاحة أحلى .
استمر الهزار لحد ما وصلوا وبدر وقف : انزلي يا هند .
هند اقترحت : طيب انزلوا معايا يلا
بدر رفض : لا يا قلبي انزلي انتِ شوفي والدتك ممكن تكون عايزاكي في حاجة خاصة واحنا هنستناكي لو هتطولي بلغيني برسالة نروح نغير هدومنا .
هند نزلت وطلعت لأمها اللي كانت مستنية على نار وأول ما دخلت وقبل ما تسلم حتى عليها قالت بغيظ: شوفتي أبوكي وأخوكي اللي هيموتوني ناقصة عمر ؟
هند بصتلها بذهول حطت شنطتها على الكنبة : بعد الشر عليكي يا ماما في ايه بس لكل ده ؟
خاطر طلع على رنة الجرس وأول ما شاف هند قال بابتسامة : ازيك يا بنتي وحشتينا .
هند راحت لأبوها تسلم عليه وبعدها سألته : ماما مالها ؟
خاطر بص ناحيتها وبص لبنته : عاملة حما على خطيبة أخوكي .
هند استغربت وبصت لأمها بعدم فهم أما فاتن فزعقت : أنا مش موافقة عليها أصلا ومش هكون حماتها ولو اتجوزها هيكون بعدم رضايا هو حر الله يسهله بقى لكن ولا أدخله بيت ولا يجيبهالي هنا .
هند قعدت جنب أمها وقالت بهدوء: في ايه بس يا ماما لكل ده ؟ انتِ تعرفي ملك علشان تعترضي عليها كل ده ؟ وبعدين لو هي وحشة أصلا لا يمكن نادر يحبها ، طالما نادر حبها تبقى إنسانة كويسة وده أنا واثقة منه تماما .
خاطر ابتسم من عقل بنته : ربنا يكملك بعقلك يا عاقلة يا غالية ده اللي غلبت أفهمه ليها ، ان ابنها مش الشاب الطايش ولا المتهور وطالما حبها تبقى تستاهل الحب ده .
فاتن بصتلهم الاتنين وفكرت تسيبهم وتقوم بس هي طلبت من بنتها تيجي يبقى تفهمها : حبيبتي أخوكي عاقل أيوة بس حنين وعلى نياته قبل كده حب بسمة المريضة اللي صعبت عليه ودلوقتي جاي يحب ملك اللي برضه صعبت عليه بظروفها و وحدتها ، أخوكي بيحب البنت الضعيفة المغلوبة على أمرها .
هند اعترضت بذهول تام : انتِ مين ضحك عليكي وقالك ان ملك ضعيفة أو مغلوبة على أمرها ؟ ماما ملك ماسكة شركة من أكبر الشركات ، انتِ شوفتي شركة سيف شركتها لا تقل عن شركة سيف وأبوها شريك المرشدي ودلوقتي بعد انضمامهم كلهم مع بعض بقوا كيان ضخم وهي مديرة في الكيان الضخم ده ، انتِ ازاي شايفاها ضعيفة ؟
فاتن بتبرير : اهو ده سبب تاني يخليني أرفضها انها من طبقة فوق أوي وأخوكي مش قدها ولا قد طلباتها ، انتِ متخيلة أخوكي يقدر يصرف عليها ؟
هند أخدت نفس طويل وردت بعقلانية: والله الموضوع ده نادر اللي يجاوبك عليه ، هل هي فعلا متطلبة وهو مش هيقدر يجاريها ولا هي بسيطة وبتحبه وهتعيش معاه في المستوى اللي يقدر يوفره ؟ بعدين نادر شغال في مستشفى خاص كبير كل عملية بفلوسها وكل نبطشية بفلوسها ده غير عيادته اللي كان فاتحها هنا كانت بتعمل قرش حلو ودلوقتي مأجرها فنادر مبسوط ماديا مش وحش .
فاتن بإصرار : يعني نادر زي سيف مثلا ؟ ولا زي كريم المرشدي ولا أبوها هي ؟ سيف اللي كانت شركته بتفلس وهتنهار كان بيصرف في الخروجة الواحدة بتاع ١٠٠ ألف وده بالنسباله عادي جدا وكان بيمر بأزمة متخيلة في وضعه الطبيعي مستواه ايه ؟ الناس دول غيرنا ، الناس دول بيتكلموا في مليارات ، يروح فين أخوكي وسطهم ؟
هند بصت لأبوها باستنجاد فرفع ايديه بقلة حيلة : أنا تعبت من الكلام معاها ما تبصيليش
فاتن بضجر : أيوة علشان انت مش عارف بتعمل ايه في ابنك وبعدين كل ده سيبنا منه ، البنت دي مطلقة وقبلها كانت مع كريم اللي سابها علشان أخلاقها يقوم ابني يتجوزها ؟
هند باعتراض : يا ماما ده كان زمان دلوقتي هي اتغيرت ، كلنا كنا متهورين وبنعقل ، هي عقلت وركزت وبقت إنسانة كويسة وبتحب نادر ونادر بيحبها .
فاتن زعقت : يعني أخرج منها صح ؟ قومي يا بت امشي على بيتك أنا غلطانة اني كلمتك ، أنا قلت انتِ عاقلة وبتفكري دايما بعقلك مش عواطفك بس .
هند قربت منها وباست كتفها : حبيبتي يا فتون ، انتِ ربيتينا كلنا كويس وعلمتينا دايما نواجه ومش بنخاف وبنخوض أي تجربة للآخر والحمدلله كلنا شخصياتنا قوية ، ثقي في عيالك واختياراتهم ، بدر حبيته ومفيش زيه في العالم وهمس حبت سيف اللي مستعد يجيب نجمة من السما علشانها ونادر اختار ملك اصبري عليه وخليه يكمل حياته مع اختياره يا ماما ، كلنا كنتي شايفانا مجانين في اختياراتنا بس الأيام أثبتتلك اننا اخترنا صح ، سيبي نادر الأيام تثبتلك انه اختار صح .
فاتن لفت وشها بعيد وهند وقفت : أنا هقوم أشوف بدر وأنس .
خاطر وقفها باستفسار: هما فين صح والله نسيت أسالك حتى
هند ابتسمت : تحت في العربية
خاطر بلوم : اخص عليكي بجد سايباهم تحت ؟ أنا هنزل أجيبهم
هند مسكت دراعه : لا يا بابا احنا هنخرج أصلا نتغدى برا .
فاتن وقفت وبصت لجوزها : أنا عاملة محشي انزل ناديهم يا خاطر يتغدوا هنا معانا وانتِ يااللي بقول عاقلة سايبة جوزك في الشارع ؟ يارب صبرني على خيبتي في عيالي
هند ضحكت وباست خدها : والله دمك شربات يا فتون بس عليكي قلبة وش
أمها زقتها : امشي يا بت قال قلبة وش قال هو أنا عارفة آخد معاكم حق ولا باطل ؟!
خاطر نزل جابهم بعد محاولات كتيرة وهند نزلت أقنعته يطلع هو وأنس يتغدوا كلهم مع بعض .