Under the Sky

Part 23

" හරි මිස්. "

මම හිස කසමින් ම නැටුම් ගුරුතුමිය වෙත සමීප වූයෙමි. ඇය මා ඇතුළු පස් දෙනා හට පියවර කිහිපයක් ඉදිරිපත්කර පෙන්වූවා ය.

" මෙන්න මේ විදිහට තමයි ස්ටෙප්ස් ටික එන්නේ. කරන්න බලන්න ඔය කට්ටියත්. "

කිසිවෙකුත් එය සාර්ථක ව ඉදිරිපත් කිරීමට සමත් වූයේ නැත. ඇය ඇඟිලි තුඩු නළලත තෙරපා ගත්තා ය.

" නැහැ... නැහැ... මෙහෙ ම කකුල තියන්න. ඇඟ ගල් කරන්න එපා සැහැල්ලුවෙන් ඉන්න. මේ පෙරඩ් එකක යනවා නෙමෙයි... ලාලිත්‍ය ඇඟට ගන්න. අහ්... මේ ශේන් කරනවා හරි. එයාගෙන් බලාගන්න. "

මම ලැජ්ජාශීලී ලෙස සිනහසුණ අතර මුල් පියවර කිහිපය මද වේලාවකින් නිවැරදි ව ඉදිරිපත් කිරීමට ඉගෙන ගත්තෙමි. කුඩාකල සිට එතරම් දරඳඩු පුද්ගලයෙක් ලෙස හැදී නො වැඩුන නිසාවෙන් මා තුළ තවමත් නම්‍යශීලී භාවය පැවතුණේ ය. නමුත් අනෙක් කෙල්ලන් වූ ප්‍රිත්වි, සිතුම්, සුරේෂ් හා අවීෂ්ට නම් නර්තනය එතරම් පහසු වූයේ නැත. වාසනාවකට මෙන් මම හය වසර වාර දෙකක් පමණ නර්තනය හදාරා තිබිණි. පසු කාලීන ව මම පෙරදිග සංගීතය සඳහා මාරු වූයේ එය වඩාත් පහසු වේ යැයි සිතමිනි. නමුත් සාමාන්‍ය පෙළ සඳහා මම සියල්ල පසෙකලා සිංහල සාහිත්‍යය තෝරා ගත්තෙමි.

අප පුහුණුවෙන අතරතුර අනෙක් පිරිස යුධ වදිමින් සිටියහ. ලකීෂ් රාම සේනාවේ සිටි අතර ඔවුහු කඩු හා පළිහවල් දෑතේ දරා සිටින බවක් හඟවමින් සටන් වදින ඉරියව් පුහුණුවන්නට වූහ.

ඒ අතරතුර පසෙකින් රාම හා රාවණ එනම් අභිමාන් අයියා හා තුසිත අයියා වෙනම ම නර්තන ගුරුතුමා විසින් පුහුණුකරවමින් සිටියේ ය. යශේන් අයියා ඒ සියලු පියවර ජංගම දුරකතනයක පටිගත කරගන්නට වූයේ පසු ව ප්‍රයෝජනයට ගනු සඳහායි. එය අවසන්කර අපගේ නර්තනයේ ද වීඩියෝවක් ඔහු ලබා ගත්තේ එම පියවර අමතක වුවහොත් ය යන හේතුවත් සමඟිනි.

" හරි එහෙනම් ඔය ටික ලබන සතිය වෙනකොට ප්‍රැක්ටිස් කරලා තියන්න. අද රාමගේ ශිල්ප දක්වන කොටස අපි වෙලාව තිබ්බොත් හදමු. අද. ඊට කලින් සීතාගෙයි රාමගෙයි කොටස හදමු. මොකද මට ලබන සතියේ එන්න වෙන එකක් නැතිවෙයි ළමයි... එන්න බලන්න දෙන්නා.... "