Under the Sky

Part 22

මම සිටියේ පාසලේ ප්‍රධාන ශාලාවේ පසෙකින් වූ සඳළුතලයක් වන් වූ කොටසෙහියි. හිරු එළිය ඍජුව ම එහි පතනය වූ බැවින් එහි වූයේ සූර්‍යය රශ්මියේ උණුසුමයි. හිරු කිරණ පැමිණ දුඹුරු පැහැයට හැරෙමින් තිබූ ටයිල් පොළව හා අහස් තලය වෙත යොමු කරගෙන සිටි මාගේ කම්මුල් ස්පර්ශ කළේ ය. පරිසරය උණුසුම් සහගත වූවත් සෙමෙන් හමාගිය සුළං රැළිතිවලින් සුවදායී බවක් දනවන්නට වූයේ ය.

සුවපහසු ලෙස දෑස් අඩවන් කරගෙන උන් මාගේ බඳ වටා දෑත් යුග්මයක් ගමන් ගත්තේ ය. සුවපහසු උණුසුම් බවක් ඔහු වෙතින් දැණුන අතර ම ඔහු කෙරෙන් නික්මුණු ආවේණික සුගන්ධය ද නිදිමත දනවන තරම් සුවදායී ය. මෘදු ලෙස ඔහු මාව සමීපයට ඇදගත් අතර මාගේ පිට ප්‍රදේශය ඔහුගේ පුළුල් පැතලි පපුවෙහි ස්පර්ශය විය. අභිමාන් අයියා ඔහුගේ නිකට මාගේ උරහිස හා ගෙල අතර වූ ඉඩෙහි තබාගත් අතර මාගේ කන් පෙත්ත සමීපයෙහි කුමක්දෝ මුමුණන්නට වූයේ කෙළිලොල් ආකාරයෙනි.

" ශේන්.... ශේන්.... "

මම ගැස්සී අවදි වූයෙමි. අම්මා මාගේ කාමරයේ දොර ආසන්නයේ සිට මා අවදි කිරීම සඳහා කතා කරන්නට වූවා ය.

" සුදු පුතා... නැඟිටින්න. ඉස්කෝලේ යන්න පරක්කු වෙනවා.... "

මම තවමත් ඇඳ මත අසුන්ගෙන සිටියේ අන්දමන්ද වී ගිය ආකාරයෙනි. එය සිහිනයකි. නමුත් ඒ ස්පර්ශයන් පවා තවමත් තාත්වික ලෙස දැන්න්නට වූයේ ය. දකුණතින් ගෙල පිරිමදිමින් මම නාන කාමරයට පිවිසියේ තවත් ප්‍රමාද විය නො හැකි බව ක්ෂ්ණිකව මාගේ මොළයට වැටහී ගිය නිසාවෙනි.

" ඒ පාර හීනෙනුත් පේන්න අරන් ද? මොන කරදරයක් ද මේ..... "

මම ක්ෂණික ව හිස සලා සිහින යනු යටි සිතෙහි පවතින ආශාවන් යන අදහස ඉවත්කර ගත්තෙමි. ඉන්පසු දත් බුරුසුවට දත්බෙහෙත් දමා මුවේ රුවා ගත්තේ කණ්ණාඩියට ද එබෙමිනි.

උදෑසන පුහුණුවීම් සඳහා ලකීෂ් මෙන් ම මම පැමිණියේ වේලාවට ම වාගේ ය. කෙසේ නමුත් ශිෂ්‍යභට කාමරයට ඇතුළුවන මොහොතේ ම තියුණු බැල්මක් මාගේ සර්වාංගය හරහා විනිවිද යනු දැණුනි. මා ඒ දෙස බැලීමට උත්සහ කළත් පෙර දින දුටු සිහිනය සිහි වී ක්ෂණික ව අනෙක් පස බලා ගතිමි.