Under the Sky

Part 32

කෙසේ නමුත් කවීන් අයියා තවමත් සාජන්ගේ අණ නො තකා හැරීමට තරම් නිර්භීත වී නො තිබිණි. එබැවින් ඔහු එතරම් ප්‍රසන්න නොවූ මුහුණකින් යුක්ත ව ශිෂ්‍යභට කාමරය වෙත අනෙක් සිසුන් සමඟ පියමැන්නේ ය.

කවීන් අයියාගේ ආගමනය මම කෙතරම් අප්‍රිය කරන්නේ ද යන්න මා හට තේරුම්ගියේ ඒ මොහොතෙදීයි. මන් ද යත් ඔහු ප්‍රධාන ශාලාවෙන් පිටවී අවසන්වනවාත් සමඟ ම මම සැහැල්ලුවට පත් ව සුසුමක් මුදාහැරි බැවිනි. ඔහු සිටිනා විට දී අවට වාතාවරණය ශරීරය තුල වේදනාවක් ඇති කරවීමට සමත්වන තරම් පීඩාකාරී වූයේ ය. නමුත් එම හැඟීම කෙතරම් කල් ඉවසා සිටීමට සිදුවන්නේදැයි මා හට අවබෝධයක් නො මැත.

" ශේන් එන්න. එක පාරක් ඩ්‍රාමා එක මුල ඉඳන් කරලා ඊට පස්සේ හෙමිහිට තව තියන අඩුපාඩු හදාගෙන් යමු. "

තුසිත අයියාට එකඟවෙමින් මම වේදිකාවේ මා හට අදාළ තැන්හි ස්ථානගත වූයෙමි. අනතුරුව සංගීතය වාදනය වූ අතර මම මාගේ කොටස ඉදිරිපත් කිරීම ඇරඹූයෙමි. පෙරට වඩා හොඳින් මේ වන විට මා හට නර්ථනයේ යෙදීමට හැකියාව ලබාගෙන තිබූ අතර ලාස්‍ය රසය මාගේ ශරීරාංග උකහාගෙන තිබිණි. ඒ නිසා ම මාගේ දෑත් දෙපා නිරායාසයෙන් ම සංගීතය සමඟ මුහුවූයේ ය.

නමුත් තවමත් යුගල නර්ථනය තිබූයේ හොඳ මට්ටමක නොවේ. අභිමාන් අයියා මේ වන විට දී පියවර සියල්ල නිවැරදි ලෙස සිදුකිරීම ඉගෙනගෙන තිබූ නමුත් ඒ චලන සියල්ල යාන්ත්‍රික විය. නමුත් අවම වශයෙන් අප දෙදෙනා පියවර පැටලී එකිනෙකා මතට ඇද වැටීම එයින් අවම වී තිබිණි. එය තරම් අපහසුදායක, හුස්ම හිරකරවනසුළු හැඟීමක් තවත්නම් නැත. ඔහු මා වෙත සමීපවන වාරයක් වාරයක් පාසා උදරයෙන් නැඟෙන්නාවූ පෙරළි කරන්නාක් බඳු වූ හැඟීම ද තවදුරටත් එලෙසින් ම පැවතිණි. අභිමාන් අයියාට නර්ථනය පුහුණුකරවීම මා හට සරඹ පුහුණු කරවීමටත් වඩා අසීරු බව තුසිත අයියා පැවසූවේ විහිළුවට ම පමණක් නො වන බව පසක්වූයේ ඔහු වේදිකාවට පය තැබූ මොහොතේ පටන්ම ය.

එයින් පසුව අනෙක් කොටස් ද පිළිවෙලින් ඉදිරිපත් කෙරුණ අතර අවසානයේ එකිනෙකාගේ කොටස්වල අඩුපාඩු වෙන වෙන ම නිවැරදිකරන ලද්දේ තුසිත අයියාගේ මූලිකත්වයෙනි. ඔහු නර්ථනය විශයක් ලෙස හදාරා තිබීම සෑහෙන තරමේ ප්‍රයෝජනවත් තරම් උපකාරයක් වූයේ ය. ඔහුගේ පුහුණු කාලයෙන් වැඩි වේලාවක් යුගල නර්ථනය වෙත යොමු කිරීමට සිදුවීම තවදුරටත් පුදුමයට කාරණයක් නො වීය. කෙසේ නමුත් මාගේ නිරීක්ෂණයට ලක් වූ තවත් එක් කාරණයක් වූයේ අභිමාන් අයියා තනි ව නර්ථනයේ යෙදෙන විටදී අප දෙදෙනා ම සිටින මොහොතට වඩා සාර්ථකව ඉදිරිපත්කිරීම සිදුකරන් බවයි. එය මාගේ සිතළුවක් ලෙස මුල දී සිතා සිටිය් ද තුසිත අයියා ද   එය ම නිරීක්ෂණයට ලක් කර තිබිණි.