Under the Sky

Part 25

" මම එනවා කියලා කිව්වේ ඇත්තට ම තමයි සාජන්. "

ඔහු කිසිවක් නො කී අතර මා නො සළකාහරින ආකාරයේ බැල්මක් හෙළී ය. මම ද ඔහු වෙත රැවුමකින් සංග්‍රහකර පෙර දී යශේන් අයියා සිටගෙන සිටි ස්ථානයේ සිට ගත්තේ නර්තනය ආරම්භ කිරීම සඳහායි.

" හරිනේ... ට්‍රැක් එක ප්ලේ කරනවා... "

යශේන් අයියා ජංගම දුරකථනයකින් සංගීතය ආරම්භ කළේ ය. ඒ අතරතුර තුසිත අයියා අප ව සමීපව නිරීක්ෂණය කරන්නට වූයේ ඔහු සාමාන්‍ය පෙළ වන තෙක් නර්තනය හදාරා තිබූ බැවින් ඒ සම්බන්ධයෙන් සැළකිය යුතු දැනුමක් තිබූ බැවිනි.

" සාජන්, කකුල තව පැත්තට කරලා තියන්න. ශේන්, තව ලාලිත්‍ය ගන්න. අයියෝ.... මිස් කිව්ව දේ නම් හරි. ඔය දෙන්නා නිකන් ගහගන්න යනවා වගේ. "

එය සවන්වැකුණු සියලු දෙනා උස් හඬින් සිනහසුණහ. නමුත් මා නම් සිටියේ කෝපයට පත්වයි. අභිමාන් අයියා සමඟ මෙම යුගල නර්තය කිසිලෙසකින්වත් සිදුකල නො හැක. ඔහු අසල දී දැනෙන නො සන්සුන්බව එක් පසෙකින් වූව ද එයටත් වඩා ගැටලුව වූයේ ඔහු කිසි ලෙසකින්වත් නර්තන හැකියා නො දැරීමයි.

" සාජන් ඔය පැත්ත නෙමෙයි මේ පැත්ත බලන්න ඕනි. ආව්... කකුල.... "

නිවැරදි දිශාවට හිස හැරවීමට උත්සහකළ ඔහු අවධානයෙන් තොරවීම හේතුවෙන් මාගේ කකුල මත සිට ගත්තේ ය. ඒ වන විට තුසිත අයියා මදකට සෙබළුන්ගේ නර්තනය නැරඹීමට ගොස් සිටි බැවින් මා එලෙස අභිමාන් අයියා නිවැරදි කිරීමට උත්සහ දැරුවේ නැතහොත් කිසිදා මෙහි අවසානයක් නො දැකිය හැකි බැවිනි.

" ඔහ්. සොරි ශේන්... දැක්කේ නැහැ. "

' දැක්කේ නැහැ තමයි... '

මම මිමිණුවේ ඔහුට නෑසෙන පරිදි ය. මම යශේන් අයියාට සංගීතය නවත්වන මෙන් සන් කළෙමි.

" සාජන් මේක ටිකක් අවුල් වගේ කියලා හිතෙන්නේ නැත් ද ? "

" අවුල් කියන්නේ පේන්නේ නැත් ද මේක තව කොයිතරම් ප්‍රැක්ටිස් කරන්න ඕනි ද කියලා? "

" ඉතින් අනේ මම ද දැන් වරද්දන්නේ...? "

" දැන් තමුසේ කියන්නේ මම වැරදියි කියල ද? "