Under the Sky

part 15

" තමුන් දැන ගන්න සීනියර්ස්ලාට ගරු කරන්න. "

" ඉතින් ඔයා ඒ විදිහට හැසිරෙනවා නම් මට ඒක ප්‍රශ්නයක් නෙමෙයි. අනික ඔයාගේ රෙදි හෝදලා දෙන්න මම ඔයාගේ කවු ද? "

ඔහුගේ දෑස්වල හැඟීම් කෝපය හා නොසන්සුන්බව අතර දෝලනය වනු පෙණිනි. ඔහු සන්සුන් ව කට කොණක සිනහවක් නඟාගත් අතර කුමක් හෝ හේතුවකට මා හට එය කඩවසම් අයුරෙන් දිස් වූයේ ය.

අභිමාන් අයියා මා හට සමීපවත් ම මාගේ හුස්ම ගැනීමේ වේගය මෙන් ම හදවතෙහි ස්පන්ධනය ද දෙගුණයකින් වැඩි විය. ඒ අතර මම සින්කයට වාරු වූයේ එයින් හෝ ශක්තිය උරා ගන්නෙමැයි සිතා ය.

" මො.. මොකක් ද කරන්න හදන්නේ... "

මම යන්තමින් වදන් ගැටගසා ගතිමි. එය බියමත් නො ව නො සන්සුන්බව රැඳි තෝරාබේරා ගත නො හැකි හැඟීමකි. ඔහුගේ මුහුණ කෙතරම් සමීපයෙහි වූයේ ද යත්  ඔහු කෙරෙන් නික්මුණු උණුසුම මාගේ සමෙහි ස්පර්ශවනු දැනෙන්නට විය. ඇසි පිය එකිනෙක ගැටෙන තරම්ම සමීප වූයේ ය.

" ශේන්... "

එහි කෝපක් ගැබ් වී නො තිබිණි. අභිමාන් අයියා මාගේ නම පැවසුවේ මිමිණිල්ලක් බඳු වූ හඬකිනි. මා ඔහු වෙතින් ඉවත්විය යුතු වූව ද මැලියම් ගා ඇලවූවාක් සේ මම එහි ම, ඔහු සමීපයෙහි ම සිටගෙන සිටියෙමි. මාගේ සිරුර ම දරදඬු වී ඇති සෙයක් හැඟෙන්නට වූ අතර මම පාදයේ ඇඟිලි රබර් සෙරෙප්පුවට ම තෙරපා ගතිමි. ඔහු දකුණත මාගේ කම්මුල ස්පර්ශ කරනුවස් එසවූව ද එය සම්පූර්ණ කරගැනීමට හැකිවූයේ නැත.

දඩස්!

එය නාන කාමරයට පතිත වූ හෙනයක් බඳු විය. වෝල්ට් ගණනක විදුලියෙන් අභිමාන් අයියා ක්ෂණික ව පසෙකට පැන්නේ ය. මාගේ මුහුණ මේ වන විට තදින් ම රත්පැහැ ගැන්වී තිබූ බවක් මට දැනී ගිය ද මම වහා ම  එහි වූ හැඟීම් හිස් කර ගත්තෙමි. නමුත් එහි ආ යශේන් අයියාගේ දෑසින් ඒ කිසිවක් වසන් කළ නො හැකි විය.

" යශේන් මම... "

" ශේන්! යන්න රූම් එකට! තුසිතට කියන්න ටීෂර්ට් සයිස් කරන්න ගන්න කියලා. "