Under the Sky

Part 06

ලකීෂ් මා හට නිවසට යන අතරමග දී ශිෂ්‍යභට බලකාය පිළිබඳ බොහෝ දෑ උගන්වන ලදී. එයට විශේෂයෙන් ම ඇතුළත් වූ කාරණාවක් වූයේ ඛණ්ඩය තුළ ජ්‍යෙෂ්ඨත්වයට ගරු කරන ආකාරයයි.

" අපි අපිට වඩා සීනියර් කෙනෙක් එද්දි නැඟිටින්න ඕනි වාඩි වෙලා ඉන්නවා නම්. අයියලාට ඔයා මෙයා කියන්නත් එපා. තව මොනව හරි අපි කනවා නම් එතන ඉන්න සීනියර් ම කෙනාට මුලින් ම දීලා ඉන්න ඕනි. ඊට පස්සේ රෑන්ක් පිළිවෙළට දෙන්න ඕනි. වතුර බොද්දිත් එහෙමයි. තව ප්‍රැක්ටිස් අතරතුර බ්‍රේක් එකක් දුන්නහමත් එයාලා කියන්න කලින් වතුර එක පාස් කරන්න ඕනි. "

" ඒ මොන විදිහෙ නීති ද? අපිට ඕනි වෙලාවට කන්නවත් බැරිද ??? අපි මොකට ද එයාලා කියන විදිහට ඉන්නේ... "

මම එයට දැඩි ලෙස විරුද්ධ වූයෙමි. කෙතරම් අසාධාරණ සම්ප්‍රදායන් ද...

" ඒකට තමයි ඩිසිප්ලීන් කියන්නේ... "

එදින නිවසට යාමෙන් පසු ස්නානය කල වහා ම මම ඇඳට වැටී නින්ද වැළඳගත්තේ අද දිනය අධික වෙහෙසකාරී දිනයක් වූ නිසාවෙනි. මම නැවත රාත්‍රියේ අවදි වූයේ රාත්‍රී ආහාරය ගැනීම සඳහායි.

" මොක ද පුතා... මහන්සි ද? "

" අවුලක් නෑ අම්මා... "

මගේ මුළු ශරීරය ම රිදුම් දුන්න ද මම එය නො කීවෙමි. මම භාරගත් දෙයින් හමුවන් ප්‍රතිවිපාක ද මම තනි ව භාරගත යුතු ය.

" අමාරු නම් හෙට ගෙදර ඉන්න. "

මට ඇත්තවශයෙන් ම නිවසට වී විවේක ගැනීමට ඇවැසි විය. නමුත් එසේ කළහොත් මම පරාජය භාරගත්තා වැනිය. මා හට එසේ කළ නො හැක.

" නෑ මම යන්නම්. "

ආහාරගෙන අවසන් වූ විගස මම හෙට දිනයට නියමිත පාසලේ වැඩ කටයුතු නිමකළ වහා ම නැවතත් නින්දට ගියේ පැනඩෝල් දෙකක් ද ගිල දමමිනි.

පසු දිනයේ ද මම වෙනදාටත් වඩා උදෑසනින් පාසල වෙත පිවිසියේ අද දිනයේ ද උදෑසන වරුවේ පුහුණුවීම් පැවැත්වුණ බැවිනි.

" ආ... ශේන් ආව ද? මම හිතුවේ අමාරු නිසා ඉස්කෝලේ එන එකක් නැහැ කියලා... "