Under the Sky

Part 11

එය හිරු අවරට ගොස් පසු භාගය විය. මඳින් මද වියැකෙමින් ගිය හිරු කිරණ තරමක පාළු බවක් ඉසිළීය. සුළං රැළිති වියළි පත්‍ර සමඟ දඟ කරමින් උන්නේ නිදහස යනු කුමක්දැයි විවේකයක් නො මැති ව පුහුණුවෙමින් උන් අපහට පෙන්වමින් සරදම් කරන නියාවෙනි. කෙසේ නමුත් ක්‍රීඩා පිටියේ කොණක වූ විදුලි පහන් කණුව ආලෝකය සපයන හෝරාවේ පුහුණුවීම් අවසන් වූයේ ය.

" ගෙනාපු බඩු ඔක්කො ම ගන්න. රූම් එකට ගිහාම කොටසක් යන්න වොෂ් දාන්න. ඉතුරු අය අස්කරන වැඩ ඉවර වෙලා තියරි පාඩම් කරන්න ගන්න. "

අභිමාන් අයියා ඛණ්ඩයක් ලෙසින් වූ අප හට අණ කළේ ය. ඒ අතරතුර ඛණ්ඩභාර ගුරුතුමා ද ගුරු විවේකාගාරය අසළ වූ ගුරුවරුන් හෝ ආගන්තුකයින් සඳහා විශේෂ අවස්ථාවල දී නවාතැන් ගැනීමට වූ කුටිය වෙත පියමැන්නේ අපගේ වැඩකටයුතු අවසන් වන විට පැමිණෙන බව පවසමිනි.

ශිෂ්‍යභට කාමරයට පැමිණි විගස අභිමාන් අයියා නම් කරන ලද කොටසට මාත් අයත් වූ බැවින් මම යුහුසුළු ව රාත්‍රී ඇඳුම සහිත ඉටි බෑගය හා සබන් කැටයක් ද රැගෙන අනෙක් අයත් සමඟ පහළ තට්ටුවෙහි වූ නාන කාමරය වෙත පිවිසියෙමි. තෙතැති පොළව මත නො ලිස්සා හැකි පමණ වේගයෙන් අඩි තබමින් ඇවිද ගිය මම නාන කුටියකට වැදී දොර වසා ගතිමි. දැන් වූ ලොකු ම අභියෝගය වූයේ ස්නානයයි.

" පළවෙනි දවස නිසා පැය භාගයක් දෙනවා.... නාලා රෙදි හෝදනවා නම් හෝදලා කරන එකක් කරලා මෙතන ඉන්න ඕනි වෙලාවට. සසිරු... වෙලාවට අරන් එන්න මෙයාල ව. "

යශේන් අයියා සසිරු අයියා වෙත අත් ඔරලෝසුවක් විසි කරමින් පැවසුවේ ය. මා නිවසේ දී නම් පැයක කාලයක් පමණ නිවී සැනසිල්ලේ ස්නානයෙහි යෙදෙන නමුත් ඉන් අඩක කාලයකින් සිදු කරන්නේ කෙසේ ද???

ජල මලෙන් නිකුත් වූ දිය බිඳු සුවදායක විය. ඒවා ගතෙහි විඩාබර බව ඔවුන් සමඟ ම රැගෙන යන්නට මෙන් මාගේ හිසේ සිට දෙපතුළ දක්වා ම තෙමාලන්නට වූයේ ය. ශරීරය යන්තමින් තෙමී ගිය වහා ම මම සබන් කැටය ශරීරය පුරාවට ම අතුල්ලා ගන්නට වූයෙමි. ඒ අතර සසිරු අයියා අනෙක් පස වූ නාන කාමරයේ සිට කෑ ගසන්නට වූයේ ය.