Under the Sky

Part 20

" සර්... "

ඔහු විසින් අප වෙත යොමුකළ බැල්ම නම් එතරම් මිත්‍රශීලී නො වීය. ඔහු එක් කෙළවරක සිට අප සියල්ලන්ගේ ම මුහුණු විනිවිද බලමින් අවසානයේ මා වෙතින් නතර විය.

" ආ ශේන්... තමුනුත් අහුවුණාද මේ නසරාණියෝ සෙට් එකට... කැඩෙටින්වලට ගිය දවසේ ඉඳන් තමයි මේ... "

මට මා වෙත දෝෂාරෝපණ එල්ල කිරීම දරාගත හැකි වුව ද ශිෂ්‍යභට ඛණ්ඩය වෙත චෝදනාකරනා අවස්ථාවේ දි නම් මාගේ කෝපය ඉහවහා යන්නට වූයේ ය. මම නිදහසට කාරණා ඉදිරිපත් කිරීමට සූදානම් වුවත් ඒ වදන් නැවත ගිලගත්තේ අභිමාන් අයියා හා යශේන් අයියා ඒ වන විටත් අංශභාර ගුරුතුමා වෙත සැහැල්ලුවෙන් ඇවිද එමින් උන් බැවිනි. නමුත් ඒ සැහැල්ලු බව සැනෙකින් ඔවුන් කෙරෙන් වියැකී ගියේ එහි වූ සිසු කැලෙහි මම හා ලකීෂ් ද සිටිනා බව දුටු නිසාවෙනි. බැලූ බැල්මට ම අප වරදක් සිදුකර ඇති බව පැවසිය හැකි ය.

අප වෙතට බැල්මක් හෙළමින් ම අභිමාන් අයියා ඔහු අත වූ ෆයිල් කවරය අංශභාර ගුරුතුමා අතට ලබා දුන්නේ ය.

" සර් මේ අපේ ප්‍රැක්ටිස් ශෙඩියුල් එක. සතියක් ස්කූල් ටයිම් කැඩෙට්ස්ලා ව ප්‍රැක්ටිස් ගන්න වෙනවා සර්. "

මාගේ මුහුණේ මෙන් ම ලකීෂ්ගේ මුහුණේ ද ඇඳී ගියේ එක ම ආකාරයේ බැල්මකි. ඒ මෙම තත්ත්වය මත කෙලෙසකවත් පුහුණුවීම් සඳහා අවසර ගැනීම සිහිනයක් බඳු වූ බැවිනි.

" ප්‍රැක්ටිස්... ප්‍රැක්ටිස් තමයි... පේනවානේ... ඔය පීරියඩ් කට් කරලා අහුවෙලා ඉන්නේ. තව අවුරුද්දයි විභාගෙට. මෙහෙම ගිහින් නම් ෆේල් වෙන්න තමයි වෙන්නේ. සාජන් නේද? කියලා දෙන්නේ නැත්ද පොඩි අයට ඔයලා... ඔය ළමයි ටික... ඉන්නවා දණ ගහන් පීරියඩ් එක ඉවර වෙනකන්. "

අප සියල්ලන් ම ඔහුගේ කාර්‍යාලය ඉදිරිපිට දණගසා ගන්නා අතරතුර අභිමාන් අයියා හා යශේන් අයියා ඔහුගේ කාර්‍යාලය තුළට පිවිසියහ. ඔවුහු නැවත පිටතට පැමිණියේ මිනිත්තු දහයකට පමණ පසුව ය. ඔවුන් පැමිණෙන විට ම වාගේ කාලච්ඡේදය අවසන් කරන සීනුව නාද වූ අතර අංශභාර ගුරුතුමා ඔහුගේ කාර්‍යාලයේ සිට අපට පිට ව යන ලෙස පැවසීය. මම හා ලකීෂ් හැකි විගස නැඟී සිටියේ අභිමාන් අයියාගේ දෑසින් ගැලවී ඒ මොහොතේ නිදහස් වීමටයි. නමුත් අපගේ සැලසුම ව්‍යර්ථ කරමින් ඔහු අප ඇමතුවේ ය.