Under the Sky

Part 35

ප්‍රශ්න පත්‍ර මා සිතූ තරම් අසීරු නො වීය. ලකීෂ් නම් බුද්ධාගම ප්‍රශ්න පත්‍රය අවසන්කර ඩෙස්කයට හිස තබාගෙන හොඳ නින්දක් ද ලබාගත්තේ ය. ඔහු අවදිවූයේ ප්‍රශ්න පත්‍ර එකතුකරගෙන පැමිණෙන මොහොතේයි. එයත් මා පසුපස සිට ඔහුගේ පුටුවට වැරෙන් පා පහරක් එල්ලකිරීම හේතුවෙනි. කලබලයට පත්ව අවදි වූ ඔහු නැවත වරක් පිළිතුරු පත්‍රය පරීක්ෂාකර නිදිබර දෙනෙතින් යුක්තව එය එකතු කරනා ගුරුතුමියට ලබාදුන්නේ ය.

" එච්චරට ම බයවෙන්න දෙයක් නැහැ නේද හැබැයි. "

ලකීෂ් පැවසූවේ පංති කාමරයෙන් පිටවන මොහොතේයි. ඔහු යථාතත්ත්වයට පැමිණතිබූ අතර පෙරට වඩා ආත්මවිශ්වාසයෙන් යුක්තවූයේ ය.

" ඔව්, මමත් හිතුවා ලියාගන්න බැරිවෙයි ද දන්නේ නැහැ කියලා. ඒත් අවුලක් නැහැ ශේප් වගේ. "

මම ද ඔහුට එකඟ වූ නමුත් අසීරු ම විශයන් ආරම්භ වන්නේ හෙට සිටයි. විද්‍යාව විශයෙන් ආරම්භවන එම දින කිහිපය අවසාන වනතෙක් මම උන්නේ ඇඟිලි ගනිමිනි. මම උත්සහ ගත්තේ අවම වශයෙන් සියලුම විශයන්ගේ ලකුණු 70න් හෝ ඉහළ තබාගැනීම උදෙසායි. එය ඉහළ ම ලකුණක් නොවූව ද ගුරුවරුන්ගේ දෝෂාරෝපණයට ලක් වූ ලකුණක් ද නොවී ය. මෙලෙස නොව දෙවන හා තෙවන වාර පරීක්ෂණ වනවිට මම මීටත් වඩා කාර්‍යයබහුල වනු නො අනුමාන ය. එබැවින් හැකි සෑම අවස්ථාවක ම ගුරුවරුන්ගේ හොඳහිත දිනාගැනීමට වූ අවස්ථා මඟහැරගත නොහැක.

ඉදිරි දින කිහිපය ම පැය කිහිපයක නින්දක් පමණක් ලබා ගනිමින් ධෛර්යයමත්ව පාඩම් කටයුතුවල නියැළීමට මා ශිෂ්‍යභට දිවියේ ලත් කටුක පුහුණුව උපකාරී වූයේ ය. එය නොවූයේ නම් මෙතරම් හික්මීමෙන් යුක්තව වැඩකටයුතු සිදුකිරීම සිහිනයකි. ඇත්තවශයෙන් ම නම් මින් පෙර දී තිබූ විභාගයන්හි මා වැඩි ලකුණු ලබාගත්තේ මාගේ උපතින් ම තිබූ දක්ෂතාවයන්ගෙන් විනා දැඩි කැපවීමෙන් නොවේ. මෙවර නම් එය ක්‍රියාත්මක කිරීමට බාධා වැඩි ය. එහෙයින් සැබෑ ලෙස ම දැඩි හික්මීමකින් යුක්තව වැඩකටයුතු සිදුකරන්නට සිදුවූයේ ය. මා වැඩිපුර පැය කිහිපයක් හෝ නිදාගත්තේ සිකුරාදා සවස නිවසට පැමිණීමෙන් අනතුරුවයි.